ỌWỌ́ ÀWỌN ỌLỌ́PÀÁ AUSTRALIA TẸ ỌMỌ NÀÌJÍRÍÀ TÓ Ń FI ÀWỌN AKẸ́KỌ̀Ọ́ ṢÒWÒ.

Àwọn ọlọ́pàá orílẹ̀-ède Australia ti mú arábìnrin kan tó jẹ́ ọmọ bíbí orílẹ̀-ède Nàìjíríà tí orúkọ rẹ̀ ń jẹ́ Binta Abubakar lórí ẹ̀sùn pé ó ń fi àwọn ọmọ ṣòwò lábẹ́ ètò ẹ̀kọ́ ọ̀fẹ́ tó gbé kalẹ̀.
Ẹni ọdún mẹ́rìndínlọ́gọ́ta ni Binta, òun ni aláṣẹ ilé iṣẹ́ ètò ẹ̀kọ́ kan nílùú Australia tí orúkọ rẹ̀ ń jẹ́ BIN Educational Services and Consulting.
Ètò ìwé òfẹ́ ní orílẹ̀-ède Australia ni ilé iṣẹ́ yìí sọ pé òun ń gbé kalẹ̀ àmọ́ níṣe ni wọ́n ń fi àwọn akẹ́kọ̀ọ́ tó bá kó sí wọn lọ́wọ́ ṣiṣẹ́ oko tí Binta sì ń gba owó ọ̀yà wọn sápò.
Ó ti lé ní ọdún méjì tí ìjọba orílẹ̀-ède Australia ti ń tọpinpin Binta kí wọ́n tó wá he é bí ìgbín lánàá; Ọjọ́rú, ọjọ́ kejìlá, oṣù Okúdù ní pápákọ̀ òfurufú Brisbane.
Ẹ̀sùn tí ìjọba Australia fi kan Binta ni pé ó ń fi ètò ẹ̀kọ́ òfẹ́ tan àwọn akẹ́kọ̀ọ́ láti orílẹ̀-ède Guinea níbi tó tẹ̀dó sí wá sí orílẹ̀-ède Australia, lọ́gán tí àwọn ọmọ náà bá balẹ̀ sí Australia ni yóò kó wọn lọ sí Queensland níbi tí wọn yóò ti fipá tọwọ́ bọ àwọn ìwé àdéhùn pé àwọn jẹ Binta ní owó ìrìnnà wá sí Australia àwọn sì ṣetán àti ṣiṣẹ́ sìn ín.
Lẹ́yìn náà ni yóò kó wọn lọ sí oko èso níbi tí wọn yóò ti máa ṣiṣẹ́ fún wákàtí mẹ́wàá lójúmọ́. Èyíkéyìí nínú àwọn ọmọ náà tó bá kọ̀ láti ṣiṣẹ́, Binta yóò halẹ̀ mọ́ ọn pé òun yóò fi ẹjọ́ rẹ̀ sun àwọn ọlọ́pàá tàbí kí ó dúnkokò mọ́ àwọn ẹbí rẹ̀ nílé.
Ìjọba Australia wí pé ó ti lé ní àwọn ọmọ mẹ́ẹ̀dógún tó ti kó sí ọwọ́ Binta láàrín oṣù Agẹmọ ọdún 2024 sí àsìkò yìí.
Bákan náà ni wọ́n sọ pé ilé iṣẹ́ tó ni àwọn oko náà kò mọ̀ sí ohun tí Binta ń fi àwọn ọmọ náà ṣe yìí, òun kàn ń san owó ọ̀yà wọn fún ọ̀gá wọn ni.
Èsùn oníkókó mọ́kànlélọ́gbọ̀n ni ìjọba Australia fi kan Binta wọ́n sì ti gba onídùúró Binta báyìí yóò sì fi ojú ba ilé ẹjọ́ ní ọjọ́ kọkàndínlógún, oṣù Òwẹ̀wẹ̀, ọdún yìí.

Ìròyìn mìíràn tó tún mi ìlú tìtì ni ìròyìn ìjàm̀bá ọkọ̀ ojú òfurufú tó gbéra ní orílẹ̀-ède India tó sì já lulẹ̀. Ìròyìn náà kà báyìí pé:

Orílẹ̀-èdè India kan lọ́jọ́ kejìlá, oṣù Okúdù nígbà tí ọkọ̀ bàlúù kan tó kó èrò tó lé ní igba já lulẹ̀ tó sì gbaná lẹ́sẹ̀kẹsẹ̀.
Pápákọ̀ òfurufú tó wà ní Ahmedabad ni ọkọ̀ yìí ti gbéra, London ni ó ń lọ àmọ́ kò tó ìṣẹ́jú kan lẹ́yìn tó gbéra ló já lu ilé àwọn dọ́kítà pápákọ̀ òfurufú náà.
Èèyàn kan ṣoṣo ló jáde nínú rẹ̀ láàyè àmọ́ pẹ̀lú àpá ni.
Ìròyìn fi yé wa pé ìjayà ló sẹkú pa ọ̀pọ̀ àwọn èrò náà kó tó di pé ó já gan-an.
Gbogbo àwọn orílẹ̀-èdè káàkiri ni wọ́n ń kí India kú ilédè àwọn èèyàn tó bá ìṣẹlẹ náà rìn.

Ní orílẹ̀-ède wa Nàìjíríà:
Ìjọba ìpínlẹ̀ Èkó ti dá ẹ̀wọ̀n oṣù mẹta lórí ẹ̀sùn pé ó kojú ẹ̀ṣọ́ aláàbò ojú pópó.
Ìròyìn fi yé wa pé Morufudeen Idowu jẹ́ ẹni ọdún méjìléláàdọ́ta, ó ṣẹ̀ṣẹ̀ dé láti orílẹ̀-èdè Canada ni. Lọ́jọ́ tí ìṣẹ̀lẹ̀ yìí ṣẹ̀, Morufudeen fẹ́ sọdá títì ní Ọjọ́ta nígbà tí àwọn ẹ̀ṣọ́ aláàbò dáa dúró tí wọ́n sì fẹ́ mú un pé ó ti ṣẹ̀ sí òfin.
Morufudeen kò gbà fún àwọn ẹ̀ṣọ́ aláàbò KAI yìí, ó bá wọn ná an tán bíi owó ní èyí tó já sí kí wọn ó gbéná wojú ara wọn.
Ní báyìí, ilé ẹjọ́ tó fìkàlẹ̀ sí Èkó ti pàṣẹ kí Morufudeen ó lọ lo oṣù mẹ́ta lọ́gbà ẹ̀wọ̀n fún kíkojú òṣìṣẹ́ ìjọba.
Kọ́míṣọ́nà fún ètò àyíká àti àwọn ohun àlùmọ́nì inú omi ìpínlẹ̀ Èkó; Tokunbo Wahab ló fi ìròyìn yìí sí ojú òpó X rẹ̀.

Ní ìpínlẹ̀ Ogun:

Nínú fọ́nrán kan tó gbòde kan ni a ti rí àwọn akẹ́kọ̀ọ́ ilé ìwé gíga ìmọ̀ ẹ̀rọ, Igbesa ní ìpínlẹ̀ Ogun tí wọ́n de akẹgbẹ́ wọn lóbìnrin mọ́lẹ̀, wọ́n so ọwọ́ rẹ̀ méjèèjì wọ́n sì ń nà án ní ẹgba.
Ẹ̀sùn tí wọ́n fi kan ọmọbìnrin yìí náà ni pé ó gba ọ̀rẹ́kùnrin ọ̀kan nínú wọn.
Wọ́n na ọmọbìnrin yìí tóbẹ́ẹ̀ gẹ́ẹ́ tí ẹjẹ̀ fi dà lára rẹ̀ tó sì ní àpá lẹ́yìn.
Wọ́n sọ nínú fọ́nrán náà pé ìyá àwọn mọ̀ nípa ohun tí àwọn ṣe yìí, ẹni tó bá mọ̀ ni kó lọ fi ẹjọ́ sùn, wọ́n sọ pẹ̀lú ìgboyà pé kò sí ohun tí yóò ṣẹlẹ̀.
Ilé iṣẹ́ ọlọ́pàá ìpínlẹ̀ Ogun fèsì fún àwọn akọ̀ròyìn pé àwọn ọlọ́pàá Igbesa ti bẹ̀rẹ̀ iṣẹ́ lórí rẹ̀.

Ìṣẹ̀lẹ̀ ìjàm̀bá ọkọ̀ àjàgbé agbépo:
Ìpayà bá àwọn arìnrìnàjò lójú ọ̀nà márosẹ̀ Ọ̀yọ́ sí Ògbómọ̀ṣọ́ lánàá nígbà tí ọkọ̀ àjàgbé agbépo kan pàdánù ìjánu rẹ̀ tó sì ṣubú lulẹ̀.
Kíá ni gbogbo àwọn èrò ti bọ́ sílẹ̀ nínú ọkọ̀ wọn tí wọ́n sì sá sí abẹ́ igi kan tí kò jìnà púpọ̀ ní ìrètí ìgbà tí àwọn panápaná yóò dé.
Oríta Irepo ni èyí ti ṣẹlẹ̀, àwọn tí ó ṣe ojú wọn ṣe àlàyé fún àwọn akọ̀ròyìn pé ọkọ̀ àjàgbé agbépo náà pàdánù ìjánu rẹ̀ lójijì ó sì ń sáré lọ, àwọn ọlọ́kọ̀ yára dá ọkọ̀ wọn dúró kí àwọn èrò ó le sọ̀ kalẹ̀ kí ó tó di pé ọkọ̀ náà fi ẹgbẹ́ lélẹ̀.
Kò sí ẹni tó fara pa tàbí bá ìṣẹ̀lẹ̀ yìí lọ ibi súnkẹrẹ fàkẹrẹ ọkọ̀ ló mọ.

Àwọn arìnrìnàjò yóò tẹ̀síwájú lẹ́yìn tí àwọn panápaná bá gba agbára lọ́wọ́ àgbá epo náà.