Àwọn èèyàn wa ẹkún mu níbi ètò ìsìnkú arábìnrin Oluwamayomikun àti ọmọ rẹ̀ Adesewa tí wọ́n sin sí ìlú Òṣogbo lónìí, ọjọ́ Ẹtì, ọjọ́ kẹsàn-án, oṣù Ṣẹẹrẹ.
Itẹ́ òkú ti ilé ìjọsìn St John Anglican tó wà ní Ita-olookan ní Òṣogbo ni wọ́n sin Oluwamayomikun àti ọmọ rẹ̀ sí.
Àwọn ẹ̀ṣọ́ aláàbò ojú pópó FRSC péjúpésẹ̀ síbi ètò ìsìnkú náà, àwọn gan-an ni wọ́n ṣe èyí tó pọ̀ nínú sínsin rẹ̀.
Ilé ìgbókùúsí ti ilé ìwòsàn ẹ̀kọ́ṣẹ́ òògùn òyìnbó ilé ìwé gíga ìpínlẹ̀ Ọ̀ṣun ni àwọn ẹbí, ará, ọ̀rẹ́ àti àwọn akẹgbẹ́ rẹ̀ láti ìpínlẹ̀ Ogun àti ìpínlẹ̀ Ọ̀ṣun ti lọ gbé òkú Oluwamayomikun àti ọmọ rẹ̀; Adesewa ní aago mẹ́wàá òwúrọ̀.
Adarí àjọ FRSC ìpínlẹ̀ Ọ̀ṣun; Leye Adegboyega àti àwọn mìíràn darapọ̀ mọ́ wọn nínú ọkọ̀ akọ́wọ̀ọ́rìn tó gbé àwọn òkú náà lọ sí itẹ́, wòlíì ìjọ St John Anglican; Lekan Salami ló ṣe ìwàásù níbi ìsìnkú náà. Wòlíì Salami ṣe ìwàásù fún àwọn èèyàn náà láti máa ro àtunbọ̀tán ilé ayé nínú gbogbo ohun tí wọ́n bá ń ṣe. Ìwàásù náà nípọn tó bẹ́ẹ̀ tí àwọn èèyàn fi n bú sẹ́kún lọ bẹẹrẹbẹ.
Kí wọ́n tó gbé àwọn pósí náà sínú ilẹ̀, àwọn akẹgbẹ́ rẹ̀ ṣe ẹ̀yẹ ìkẹyìn fún un, wọ́n fi àsíá orílẹ̀-ède Nàìjíríà àti ti àjọ FRSC bo orí pósí rẹ̀, àwọn èèyàn tún wa ẹkún mu.
Tẹkúntẹkún ni àwọn èèyàn náà túká nígbà tí ìsìnkú náà parí. Àwọn èèyàn sọ ọ̀rọ̀ Oluwamayomikun dáadáa pé èèyàn ire ni nígbà ayé rẹ̀.
Ikú Funmilayo àti ọmọ rẹ̀.
Arákùnrin kan tí orúkọ rẹ̀ ń jẹ́ Fajemirokun ló ṣekú pa Funmilayo Oluwamayomikun àti ọmọ rẹ̀ pẹ̀lú àjọṣepọ̀ àwọn adáhunṣe méjì.
Ìròyìn bó ṣe jẹ́wọ́ kà báyìí:
Victor Fajemirokun; ọ̀rẹ́kùnrin òṣìṣẹ́ ààbò ojú pópó ti ìjọba àpapọ̀ FRSC tí wọ́n pa náà ti ṣe àlàyé bí iṣu ṣe kú àti bi ọ̀bẹ ṣe bẹ ẹ́.
Ẹni ogójì ọdún ni Fajemirokun, ó jẹ́ ọ̀rẹ́kùnrin Lasisi Funmilayo; ìyá Sewa tí òun àti àwọn adáhunṣe méjì jọ pa àti ọmọ rẹ̀ sínú igbó kan ní ìpínlẹ̀ Ọ̀ṣun.
Àlàyé tí Victor ṣe náà ni pé nígbà tí òun jáde sí ọ̀rọ̀ òun ni wọ́n sọ fún òun pé òun kò le lu àlùyọ mọ́ láyé àfi tí Funmilayo bá kú nítorí pé ó ti lo ògo òun. Ìdí rèé tí òun fi tàn án láti ìpínlẹ̀ Ogun lọ sí ìpínlẹ̀ Ọ̀ṣun níbi tí wọ́n ti dá ẹ̀mí rẹ̀ légbodò.
Orí ìkànnì Tiktok ni Victor ti pàdé Gboyega Daramola tó ṣe àyèwò fún un, nígbà tí ọ̀rọ̀ wọ̀ tán ni ó tan Funmilayo lọ sí ilé Gboyega láti tú ara rẹ̀ sílẹ̀ nínú ìgbèkùn tí Funmilayo dè é mọ́, Gboyega ló pe àwọn méjì mìíràn mọ́ra tí wọ́n jọ pa Funmilayo àti Sewa; ọmọ rẹ̀ obìnrin.
Lẹ́yìn tí wọ́n pa wọ́n tán, Victor ní òun sá lọ sí òkè Ikoyi ó sì gba ibẹ̀ lọ sí Ìbàdàn. Ó ní òun kò mọ̀ pé wọ́n yọ ẹ̀yà ara wọn rárá.
James; ọ̀kan nínú àwọn tí wọ́n jọ ṣe iṣẹ́ náà ṣe àlàyé pé ọ̀gá òun; Gboyega ló pàṣẹ kí òun ó pa Funmilayo nítorí pé òun ló de ògo Victor mọ́lẹ̀.
Ọ̀bẹ ni wọ́n fi dú Funmilayo lọ́rùn kí wọ́n tó wá gé e wẹ́lẹwẹ̀lẹ – James.
Gboyega Daramola náà sọ̀rọ̀, ó ní òun kọ́ ló sọ fún Victor pé Funmilayo ti de ògo rẹ̀ mọ́lẹ̀, Victor ti lọ sí ọ̀dọ Àlùfáà kan tẹ́lẹ̀ tó sọ fún un pé Funmilayo ti gba ògo rẹ̀, òun kàn fẹ́ bá a gba ògo náà padà lásán ni àti pé Victor gan-an ló ní kí àwọn ó pa Funmilayo, ojú rẹ̀ làwọn sì ṣe kun ún wẹ́le.wẹ̀lẹ.
Kọmíṣọ́nà ọlọ́pàá ìpínlẹ̀ Ọ̀ṣun; Gotan ṣe àlàyé pé Fajemirokun di àwàtì láti ọjọ́ kejì, oṣù Bélú tó ti ṣiṣẹ́ ibi náà títí di ìgbà tí wọ́n ri i ní ọjọ́ kẹrìndínlógún.
Láàŕrín ìgbà náà ni wọ́n mú Gboyega tí ìnagiẹ rẹ̀ ń jẹ́ Aberefa, Gboyega jẹ́wọ́ pé Fajemirokun ló mú Funmilayo wá sí ilé òun pé kí àwọn ó pa á fún oṣólẹ̀ owó.
Àwọn tí wọ́n jọ pa á náà ni Sunday James, Kehinde àti Idowu.
Ọjọ́ kẹtàdínlógún ni Aberefa mú àwọn ọlọ́pàá lọ sí ibi tó pa Funmilayo sí ní nú igbó, kò sí orí, ọyàn méjéèjì, ọrùn ọwọ́ méjéèjì àti ojú ara lára òkú náà mọ́, gbogbo rẹ̀ ni wọ́n ti yọ.
Èkìtì ni wọ́n ti lọ gbé Sunday James, ó ní òun kàn dú Funmilayo àti ọmọ rẹ̀; Sewa lọ́rùn ni, òun kò bá wọn kun ún wẹ́lẹwẹ̀lẹ.
Kehinde àti Idowu ni ó kun iyá àti ọmọ bí ẹran tí wọ́n yọ àwọn ẹ̀yà ara náà.
Kọmíṣọ́nà ọlọ́pàá ṣe ìlérí pé gbogbo àwọn afurasí yìí ni yóò fi ojú ba ilé ẹjọ́ ní kété tí ìwádìí bá parí.
Láti ìbẹ̀rẹ̀:
Òṣìṣẹ́ ẹ̀ṣọ́ ààbò ojú pópó ìjọba àpapọ̀ FRSC ni Funmilayo Olumayokun Lasisi, Ẹni ọdún mọ́kàndínlógójì níí ṣe.
Ọjọ́ kejì, oṣù Belu ni Funmilayo àti ọmọ rẹ̀ jáde kúrò nílè tí wọn kò sì padà sílé mọ́.
Obasanjo Hiltop Estate ní Oke- Mosan, Abeokuta ni ilé Funmilayo wà, lọ́jọ́ náà, Funmilayo jáde nílé pẹ̀lú ọmọ rẹ̀ obìnrin, àti ìgbà náà ni wọ́n ti ń wá a tòun tọmọ tó mú jáde náà.
Ilé adáhunṣe kan ní ìpínlẹ̀ Ọ̀ṣun ni wọ́n ti rí òkú rẹ̀ tí wọ́n sì tún rí òkú ọmọ rẹ̀ ní inú igbó kan ní ìpínlẹ̀ Ọ̀ṣun kan náà.
Ilé iṣẹ́ ọlọ́pàá ìpínlẹ̀ Ogun ṣe akitiyan láti wá Funmilayo lẹ́yìn tí àwọn ẹbí rẹ̀ fi lọ̀ wọ́n pé wọn kò ríi bẹ́ẹ̀ sì ni aago rẹ̀ kò lọ.
Ayomideji Solanke ló kọ́kọ́ kọ ọ́ sí ojú òpó Facebook rẹ̀ pé wọ́n ti rí òkú Funmilayo ní ilé adáhunṣe kan ní ìpínlẹ̀ Ọ̀ṣun. Bákan náà ni mọ̀lẹ́bí ọkọ Funmilayo fìdí ẹ̀ múlẹ̀ fún àwọn akọ̀ròyìn pé wọ́n rí òkú rẹ̀ lóòótọ́.
Kọmíṣọ́nà ọlọ́pàá ìpínlẹ̀ Ogun; Lanre Ogunlowo náà ṣe àlàyé pé àwọn ṣe àwárí òkú Funmilayo àti ọmọ rẹ̀ Sewa ní ìpínlẹ̀ Osun. Wọ́n ti mú ìyàwó adáhunṣe náà àmọ́ òun gan-an ti na pápá bora nígbà tí ọwọ́ tẹ àwọn afurasí naa.
