Ààrẹ orílẹ̀-ède wa Nàìjíríà; Bola Ahmed Tinubu ti ṣe ìlérí fún gbogbo ọmọ Nàìjíríà pé kí wọn ó lọ fi ọàn balẹ̀, òun yóò jẹ àwọn agbésùnmọ̀mí run tí éégún wọn ò tún ní ṣẹ́ nílẹ̀ yìí mọ́.
Ààrẹ ní òun yóò bèèrè fún ìrànlọ́wọ́ àwọn adarí àgbáyé láti jẹ́ kí èyí ó wá sí ìmúṣẹ.
Ààrẹ sọ èyí lẹ́yìn tí ààrẹ orílẹ̀-ède Amẹ́ríkà; Donald Trump ṣe ìkìlọ pé bí ìjọba Nàìjíríà kò bá gbógun ti àwọn agbésùnmọ̀mí, òun yóò wá pa wọ́n fúnra òun.
Ààrẹ Bola Ahmed Tinubu wí pé òun yóò ṣiṣẹ́ ní ìfọwọ́sowọ́pọ̀ pẹ̀lú àwọn adarí àgbáyé láti gbógun ti àwọn agbésùnmọ̀mí náà ní èyí tó wà ní ìbámu pẹ̀lú àfojúsùn Renewed Hope Agenda tí yóò sọ Nàìjíríà di ìlú ọlọ́lá àti ọlọ́rọ̀.
Ààrẹ wí pé kí àwọn ọmọ Nàìjíríà ó wà ní ìrẹ́pọ̀ àti ìṣọ̀kan, kí wọn ó sì fi ọkàn balẹ̀ pé ìgbésùnmọ̀mí yóò di ohun àmúpìtàn láìpẹ́.
ÒṢÈLÚ:
Gbogbo àwọn ọmọ ilé ìgbìmọ̀ aṣojúṣòfin ìpínlẹ̀ Anugu ti yapa kúrò nínú ẹgbẹ́ òṣèlú wọn ta kọ́sọ́ sínú ẹgbẹ́ òṣèlú APC.
Tajudeen Abass; ẹni tó jẹ́ agbẹnusọ fún ilé ìgbìmọ̀ aṣojúsòfin ló ka ìwé ìfẹgbẹ́sílẹ̀ àwọn ẹni náà kúrò nínú ẹgbẹ́ òṣèlú PDP àti Labour, Gómìnà ìpínlẹ̀ Enugu; Peter Mba ni ó jẹ́ ẹlẹ́rìí.
Àwíjàre àwọn tí wọ́n jápa lọ sínú ẹgbẹ́ òṣèlú APC náà ni pé ẹgbẹ́ òṣèlú PDP àti Labour ń ṣe ṣégeṣège ní èyí tí kò ṣe é gbọ́kànlé fún ọjọ́ ọ̀la rere.
Mẹ́jọ ni àwọn ọmọ ilé ìgbìmọ̀ aṣojúṣòfin náà nígbà tí ọmọ ẹgbẹ́ PDP jẹ́ ẹyọkan.
Nnolim Nnaji; ọ̀kan nínú wọn ṣe àlàyé pé ó di dandan kí àwọn ó darapọ̀ mọ́ Gómìnà Peter Mba nínú ẹgbẹ́ òṣèlú APC nítorí kí ìmọ̀ wọn ó le jọ, ó wí pé Peter Mba ti gbé ọ̀pọ̀lọpọ̀ àkànṣe iṣẹ́ kalẹ̀ sí ìpínlẹ̀ Enugu tí àwọn aráàlú ń jẹ àǹfààní rẹ̀, àsìkò ti tó kí ìpínlẹ̀ Enugu náà ó bọ́ sí gbàdede pẹ̀lú ìtànsán ẹgbẹ́ òṣèlú APC.
Ó ti pẹ́ tí ìpínlẹ̀ Enugu ti jẹ́ alátakò àmọ́ lásìkò yìí, àwọn ṣetán láti fi ọwọ́sowọ́pọ̀ pẹ̀lú ẹgbẹ́ òṣèlú tó ní ọjọ́ ọ̀la rere tó sì ń mú ìtẹ̀síwájú bá orílẹ̀-ède Nàìjíríà.
A kò ṣàdédé wá sí ìpinu yìí, a darapọ̀ mọ́ APC lẹ́yìn ọ̀pọ̀lọpọ̀ àròjinlẹ̀ àti ìfẹ́ aráàlú – Nnaji.
Ìfipábánilò:
Abdullahi Abass yóò lo gbogbo ìṣẹ̀mí rẹ̀ yòókù lọ́gbà ẹ̀wọ̀n lórí ẹ̀sùn pé ó fipá bá ọmọdékùnrin kan tó jẹ́ akẹ́kọ̀ọ́ rẹ̀ lájọṣepọ̀.
Ẹni ọdún mọ́kàndínlógún ni Abdullahi Abass, iṣẹ́ olùkọ́ ló ń ṣe nílé ìwé aládàáni kan ní agbègbè Kwali.
A gbọ́ pé lọ́jọ́ kọkàndínlógún, oṣù Ẹrẹ́nà, lẹ́yìn tí àwọn akẹ́kọ̀ọ́ náà jáde ilé ìwé, Abdullahi rán akẹ́kọ̀ọ́ kan kí ó lọ pe ọmọkùnrin ọmọ ọdún mẹ́sàn-án náà wá, ó tan ọmọ náà lọ sí kọ̀rọ̀ ó sì fipá bá a lò láti ihò ìdí.
Ọmọ yìí sọ fún ìyá rẹ̀ wọ́n sì fi ọlọ́pàá gbé e. ẹ̀sùn oníkókó méjì ni ìjọba fi kan Abdullahi; ìfipábánilò àti ìṣenimọ́kumọ̀ku nípa ti ìbálòpọ̀.
Ọjọ́ kọkàndínlọ́gbọ̀n, oṣù Ọ̀wàrà ni Abdullahi farahàn nílé ẹjọ́ gíga Abuja níwájú Adájọ́ M. Osho-Adebiyi, lẹ́yìn gbogbo atótónu àti àwíjàre, adájọ́ wí pé Abdullahi jẹ̀bi àwọn ẹ̀sùn náà ó sì dá ẹ̀wọ̀n gbére fún un.
ỌLỌ́DẸ FIPÁ GBA ÌBÁLÉ ỌMỌ ỌDÚN MẸ́RÌNLÁ NÍ ÌPÍNLẸ̀ RIVERS.
Àwọn ọlọ́pàá ti mú ọlọ́dẹ kan tí wọ́n pe orúkọ rẹ̀ ní Godday lórí ẹ̀sùn pé ó fipá bá ọmọ ọdún mẹ́rìnlá lò pọ̀.
Agbègbè Trans-Amadi ní Portharcourt tíí ṣe olú ìlú ìpínlẹ̀ Rivers ni èyí ti ṣẹlẹ̀.
Lógúnjọ́, oṣù Ọwẹ́wẹ̀ yìí ni ìyá ọmọ yìí fún un ní káàdì owó láti gba owó wá lẹ́nu ẹ̀rọ nítorí pé ara rẹ̀ kò dá kò sì leè dá lọ.
Ìyá ọmọ yìí ṣe àlàyé pé òun pe ọmọ náà lórí aago ó sì wí pé òun ti gba owó náà.
Nígbà tí kò dé lásìkò tó yẹ ni ìyá rẹ̀ bá tún pè é àmọ́ kò gbé aago náà mọ́.
Ẹ̀yìnọ̀rẹyìn, ọmọ yìí dé pẹ̀lú àpá ní gbogbo ara.
Ó kó ẹjọ́ ó rọ̀ pé ẹnìkan wà lẹ́yìn òun nígbà tí òun ń gba owó lẹ́nu ẹ̀rọ apọwó tí òun kọ́kọ́ lọ, ara fu òun ni òun ṣe Kúrò níbẹ̀ lọ sí ilé ìfowópamọ́ mìíràn, ó tún bá ọkùnrin náà níbẹ̀, lẹ́yìn tó gba owó tán ni ọkùnrin yìí fipá wọ́ ọ wọ inú kọ̀rọ̀ kan nílé ìfowópamọ́ náà tó sì bá a lájọṣepọ̀.
Àwọn ọlọ́pàá ṣe àyẹ̀wò fún ọmọ yìí nílé ìwòsàn wọ́n sì ríi dájú pé wọ́n bá ọmọ náà lájọṣepọ̀.
Ọmọ yìí júwe bí ọkùnrin yìí ṣe rí fún àwọn ọlọ́pàá, wọ́n wá a dé agbègbè náà, àwọn ará ibẹ̀ wí pé ọkùnrin náà ti fìgbà kan jẹ́ ẹ̀ṣọ́ aláàbò ilé ìfowópamọ́ náà.
Ìyá ọmọ yìí wí pé òjìlélọ́ọ̀dúnrún ẹgbẹ̀rún náírà ló dín nínú owó tí òun ní kí ọmọ náà ó gbà.
Wọ́n ti mú Godday sí àhámọ́ báyìí yóò sì fi ojú ba ilé-ẹjọ́ láìpẹ́.
Grace Iringe-Koko; ẹni tó jẹ́ alukoro fún ilé iṣẹ́ ọlọ́pàá ìpínlẹ̀ Rivers ló sọ ọ̀rọ̀ yìí di mímọ̀.
Iyán ọdún mẹ́ẹ̀dógún sẹ́yìn ti jó pásítọ̀ Olawale lọ́wọ́ báyìí.
Pásítọ̀ Aka-Bashorun Olawale; ẹni tó tún jẹ́ agbẹjọ́rò ti balẹ̀ síwájú adájọ́ Hakeem Oshodi ti ilé ẹjọ́ gíga Ikeja lórí ẹ̀sùn pé ó fi ọwọ́ tẹ ọmú ọmọdébìnrin ọmọ ọdún mẹ́rìnlá kan.
Ìròyìn fi yé wa pé Pásítọ̀ Olawale jẹ́ pásítọ́ ní ìjọ ìràpadà, ẹ̀sùn oníkókó kan tí ìjọba fi kàn án náà ni pé ó fi ọwọ́ tẹ ọmú ọmọdébìnrin ọmọ ọdún mẹ́rìnlá kan ní agbègbè Iwaya, ìpínlẹ̀ Èkó.
Agbẹjọ́rò ìjọba; Funmilola Aluko wí pé ohun tí pásítọ̀ Olawale ṣe yìí tako òfin ipínlẹ̀ Èkó àmọ́ agbẹjọ́rò Olawale wí pé Olawale ko jẹ̀bi ẹ̀sùn náà. Morenikeji Oyekunle rọ ilé ẹjọ́ láti gba onídùúró Olawale nítorí pé kò le sá lọ àti wí pé pásítọ̀ ni.
Agbẹjọ́rò fún ìjọba; Funmilola Aluko tako ẹ̀bẹ̀ Morenikeji ó sì rọ ilé ẹjọ́ láti wo ọ̀rọ̀ náà dáadáa.
Adajo Hakeem Oshodi gba onídùúró Olawale pẹ̀lú àṣẹ pé ó gbọ́dọ̀ yọjú ní gbogbo ìgbẹ́jọ́ tió yóò wáyé.
Àlàyé tí ọmọdébìnrin ìgbà náà; ẹni tó ti pé ọmọ ọdún mẹ́tàdínlọ́gbọ̀n nísìn yìí ṣe ni pé lọ́dún 2010 nígbà tí òun wà ní ọmọ ọdún mẹ́jọ ni bàbá òun mú òun lọ gbé ní ilé pásítọ̀ Olawale kí òun le tẹ̀síwájú nínú ẹ̀kọ́ kí òun sì le máa kópa nínú ẹgbẹ́ akọrin ìjọ. Ó wí pé bí òun ṣe dé ibẹ̀́ ni Olawale ti ń ṣe òun mọ́kumọ̀ku, yóò fi ọwọ́ tẹ gbogbo ọmú rẹ̀ yóò sì tún lù ú lálùbami bí ó bá fìdí rẹ́mi nílé ìwé.
Ó ní òun padà sá kúrò nílé Olawale lọ́dún náà lọ́hùn-ún tí òun sì ṣe àlàyé fún ìyá òun.
Lọ́dún 2023 tí òun gbọ́ pé Olawale ṣe irú èyí fún ọmọdébìnrin mìíràn ni òun pe ẹjọ́ náà. Ó wí pé ẹlẹ́rìí òun ni olùkọ́ òun nígbà náà; Arábìnrin Akingbeoyewa nítorí pé òun sọ fún un nígbà náà.
Adájọ́ Oshodi pàṣẹ kí Olawale ó san ẹgbẹ̀rún lọ́nà àádọ́ta náírà fún ọmọbìnrin náà ṣáájú ìgbẹ́jọ́ tó ń bọ̀. Ó sún ìgbẹ́jọ́ sí ọjọ́ kẹsàn-án, oṣù Ọ̀pẹ.
