Lórí ìkọlù tó wáyé nílé ìjọsìn Àgùdà Francis tó wà ní Ọ̀wọ̀, ìpínlẹ̀ Ondo; ilé ẹjọ́ gíga Abuja ti dájọ́ ikú fún àwọn agbésùnmọ̀mí mẹ́rin.
Ọjọ́ karùn-ún, oṣù Okúdù, ọdún 2022 ni àwọn agbésùnmọ̀mí ya wọ ilé ìjọsìn náà tí wọ́n sì ṣekú pa àwọn olùjọsìn bíi ogójì tí ọgọ́rùn-ún mìíràn farapa.
Adájọ́ Emeka Nwite gbé ìdájọ́ rẹ̀ kalẹ̀ lẹ́yìn tó ṣe àyẹ̀wò ẹjọ́ náà fínní, adájọ́ Nwite pàṣẹ kí wọn ó so àwọn mẹ́rin náà rọ̀ títí ẹ̀mí yóò fi bọ́ lara wọn.
Àwọn mẹ́rin náà ni Idris Abdulmalik Omeiza; ẹni ọdún mẹ́ẹ̀dọ́gbọ̀n, Al Qasim Idris; ẹni ogún ọdún, Jamiu Abdulmalik; ẹni ọdún mẹ́rìndínlọ́gbọ̀n, àti Abdulhaleem Idris; ẹni ọdún mẹ́ẹdọ́gbọ̀n.
Wàyí o, adájọ́ dá Momoh Abubakar; ẹni ọdún mẹ́tàdínláàdọ́ta sílẹ̀ pẹ̀lú àwíjàre pé kò sí ẹ̀rí kan gùnmọ́ pé ó lọ́wọ́ nínú ìkọlù náà.
Gómìnà ìpínlẹ̀ Òǹdó; Lucky Aiyedatiwa àti Ọlọ́wọ̀ ti ìlú Ọ̀wọ̀; Ọba Ajibade Ogunoye fi ìdùnnú hàn lórí ìdájọ́ náà pé ìdájọ́ òdodo fi ẹsẹ̀ múlẹ̀ – Ilé ẹjọ́ dájọ́ ikú
Wòlíì ìjọ náà; Jude Arogundade náà fi ìdùnú hàn lórí ìdájọ́ náà, bí ó tilẹ̀ jẹ́ pé ipa rẹ̀ kò le tán lórí ìjọ náà.
Adájọ́ Nwite sọ nínú ìdájọ́ rẹ̀ pé kò sí àníàní, àwọn mẹ́rin náà jẹ́ ọmọ ẹgbẹ́ afẹ̀míṣòfò tí wọ́n sì ń kó ipa ribiribi nínú ẹgbẹ́ náà, gbogbo ẹ̀rí ló fìdí ẹ̀ múlẹ̀ pé àwọn ló ṣe ìkọlù sí ilé ìjọsìn náà lọ́dún mẹ́rin sẹ́yin.
Ilé ẹjọ́ fìdí ẹ̀ múlẹ̀ pé àwọn mẹ́rin náà jẹ́ ọmọ ẹgbẹ́ agbésùnmọ̀mí Al-Shabaab tó ń ṣọṣẹ́ ní ìpínlẹ̀ Kogi àti agbègbè rẹ̀, àwọn ló ṣe ìkọlù sí ilé ìjọsìn Àgùdà Ọ̀wọ̀ náà lásìkò tì wọ́n ń ṣe ìsìn lọ́wọ́.
Àwọn agbésùnmọ̀mí náà ya wọ ilé ìjọsìn náà, wọ́n kó àwọn olùjọ́sìn ní pápámọ́ra wọ́n sì ṣekú pa ọ̀pọ̀lọpọ̀. Ìbọn ńlá AK47 ni wọ́n lò pẹ̀lú àwọn àdó ìbúgbàmù.
Ẹlẹ́rìí mọ́kànlá àti ẹ̀rí mẹ́tàlélógún mìíràn ló farahàn níwájú adájọ́ Nwite pẹ̀lú àwọn èsì àyèwò ibi ìṣẹ̀lẹ̀ náà.
Ọ̀kan nínú àwọn tó mórí bọ́ ṣe àlàyé àdó ìbúgbàmù bíi mẹ́ta ni wọ́n kọ́kọ́ sọ sínú ilé ìjọsìn náà, èyí ló kọ́ kó ìpayà bá gbogbo wọn kó tó di pé wọ́n wọlé wá yìnbọn pa wọ́n.
Adájọ́ Nwite fìdí ẹ̀ múlẹ̀ lẹ́yìn gbogbo ẹ̀rí àti àtótónu pé afẹ̀míṣòfò ni àwọn mẹ́rin náà, ó sì dájọ́ ikú fún wọn.
Gómìnà ìpínlẹ̀ Òǹdó; lucky Aiyedatiwa dunú sí ìdájọ́ ilé ẹjọ́ yìí, ó kọ ọ́ sínú àtẹ̀jáde rẹ̀ pé ìdájọ́ òdodo ni èyí jẹ́ fún àwọn tó pàdánù ẹ̀mí wọn nínú ìkọlù náà àti àwọn tó farapa – Ilé ẹjọ́ dájọ́ ikú
Ọ̀rọ̀ rẹ̀ tẹ̀síwájú pé akitiyan ikọ̀ tó ṣe ìwádìí náà àti àìfigbákan-bọ̀kan nínú ẹ̀ka ètò ìdájọ́ fi hàn pé ìjọba kò fi ààyè gba ìwá ìfẹ̀míṣòfò. Ìkìlọ̀ ni èyí jẹ́ fún gbogbo arúfin pé wọn kò ní lọ láìjìyà ẹ̀ṣẹ̀ wọn bó ti wù kó pẹ́ tó.
Bákan náà ni Gómìnà kí àwọn ará Ọ̀wọ̀ kú fífi ìwà ọmọlúàbí ṣe àti gbígba àlàáfíà láàyè lẹ́yìn ìṣẹ̀lẹ̀ náà.
Oba Ogunoye náà dunnú lórí ìdàjọ́ náà, ó rọ ìjọba láti má parí ẹjọ́ náà síbẹ̀, kí wọn ó wá àwọn yòókù kí wọn ó ṣe ìdájọ́ tiwọn náà àti gbogbo àwọn tó bá tún lọ́wọ́ nínú ìṣẹ̀lẹ̀ náà.
Ó dúpẹ́ lọ́wọ́ ìjọba àpapọ̀ lórí ìdájọ́ òdodo náà, ó ní èyí yóò dá ìrètí aráàlú nínú ìjọba padà.
Bí irú ìdájọ́ báyìí bá ti ń wáyé tipẹ́ fún àwọn ọ̀daràn ni, orílẹ̀-ède Nàìjíríà kò bá ti dára ju báyìí lọ – Ọba Ogunoye.
Wòlíì Arógundade náà sọ̀rọ̀, ó wí pé ọdún yìí ni yóò pé ọdún mẹ́rin tí ìṣẹ̀lẹ̀ náà wáyé, àwọn olùjọsìn wà níwájú Ọlọ́run pẹ̀lú ìfọ̀kànbalẹ̀ pé ilé Ọlọ́run ni àwọn wà tí àwọn afẹ̀míṣòfò fi wá pa wọ́n nípakúpa.
Ìdájọ́ wáyé lóòótọ́ àmọ́ ipa rẹ̀ kò tán lára, ọmọ kan tilẹ̀ pàdánù àwọn òbí rẹ̀ méjéèjì nínú ìkọlù náà, àwọn mìíràn di aláàbọ̀ ara, ìdájọ́ yìí kò le jí àwọn tó kú àmọ́ inú wa dùn síi- Wòlíì Arogundade.
Irú ìṣẹ̀lẹ̀ báyìí kò fẹ́rẹ̀ jẹ́ ìròyìn mọ́ ní orílẹ̀ èdè wa, àwọn agbébọn á ṣàdédé ya wọ ìlú, agbègbè, ilé ìwé, oko tàbí abà tí wọn yóò sì ṣọṣẹ́ rẹpẹtẹ.
Òmíràn tó mìlú tìtì bíi ti Ọ̀wọ̀ yìí ni ìkọlù tó wáyé ní Rukuba ní ìpínlẹ̀ Plateau:
Ìpínlẹ̀ Plateau ni Angwa Rukuba wà, ìgboro ni ìlú náà kìí ṣe abúlé ó sì kún fọ́fọ́. Ìrọ̀lẹ́ ọjọ́ Àìkú, ọjọ́ kọkàndínlọ́gbọ̀n ni àwọn agbébọn náà ya wọ ìlú náà pẹ̀lú ọ̀pọ̀lọpọ̀ ọ̀kadà, wọ́n ṣíná ìbọn bolẹ̀ wọ́n sì kó àwọn èèyàn náà ní pápámọ́ra. Gbogbo ẹni tí wọ́n rí ni wọ́n yìnbọn mọ́, wọn kò mọ ọmọdé tàbí àgbà, kòsàkòsà ni ìbọn ń dáhùn lára gbogbo ẹni tí wọ́n ká mọ́.
Ọ̀kan nínú àwọn olùgbé Angwa tí orúkọ rẹ̀ ń jẹ́ Caleb bá àwọn akọ̀ròyìn sọ̀rọ̀, ó ṣe àlàyé pé ìkọlù náà kọjá bẹ́ẹ̀, èèyàn mẹ́fà ni wọ́n kọ́ mú balẹ̀ ní fọnná-fọnṣu tí ọ̀pọ̀ sì tún wà ní ilé ìwòsàn Luna ní ẹsẹ̀ kan ayé ẹsẹ̀ kan ọ̀run.
Janet Pam náà ṣe àlàyé pé inú ilé ni òun wà nígbà tí ó bẹ̀rẹ̀ sí ní gbọ́ ìró ìbọn, nígbà tó yọjú síta, àwọn agbébọn ló rí tí wọ́n ń yìnbọn lákọlákọ lórí ọ̀kadà.
Àwọn tí wọ́n ń lọ ní títì àti àwọn tó ń tajà ló fi ara gbọta jù, Janet ní wọ́n pa ará ilé òun kan tó ń ti ilé ìjọsìn bọ̀. Ìyàlẹ́nu ni èyí jẹ́, a kò rí irú èyí rí ní àdúgbò wa, wọ́n sá lọ kí àwọn ọlọ́pàá tó dé – Janet Pam.
Ìkọlù náà ti kó ìpayà bá àwọn ará ìlú, àwọn ọ̀dọ́ tú jáde láti ṣe ìwọ́de tako ìṣẹ̀lẹ̀ náà, wọ́n bèèrè fún kí ìjọba ó fi òfin de alùpùpù ní gbogbo agbègbè náà, lẹ́yìn náà ni wọ́n gbégi dí ọ̀nà tó wọ ìlú náà àmọ́ àwọn ọlọ́pàá tú wọn ká
