Ilé ẹjọ́ gíga tó fìkàlẹ̀ sí Iwo ti pàṣẹ kí wọn ó yẹgi fún àwọn ọkùnrin mẹ́ta kan tí wọ́n pa Asiata Yekeen tí wọ́n sì tún kun ún wẹ́lẹ́wẹ́lẹ́.
Ẹni ódún méjìléláàdọ́ta ni Asiata, ṣàdédé ló di àwátì tí àwọn ẹbí rẹ̀ sì fi tó àwọn ẹ̀ṣọ́ aláàbò Àmọ̀tẹ́kùn létí. Àwọn tí wọ́n rí Asiata nígbà tó wọ inú ilé Tunji ló fìdí ẹ̀ múlẹ̀ pé àwọn kò ríi kí ó padà jáde lẹ́yìn tó wọ inú ilé náà.
Àwọn ọlọ́pàá ṣe iṣẹ́ wọn bíi iṣẹ́ wọ́n sì mú Tunji, ó kọ́kọ́ jiyàn àmọ́ nígbà tí wọ́n tú ilé rẹ̀ tí wọ́n sì bá àwọn ẹ̀yà ara èèyàn níbẹ̀, ó jẹ́wọ́ bí ó ṣe pa Asiata àti ibi tó sin ín sí.
Tunji ṣe àlàyé pé òun jẹ Asiata lówó òun sì tàn án pé kí ó wá gba owó náà. Asiata bá Muslim àti Fatai ní ilé Tunji lọ́jọ́ náà, gbogbo wọ́n fi ipa bá a lò pọ̀, lẹ́yìn náà ni wọ́n fún un lọ́rùn pa. Wọ́n tún yọ àwọn ẹ̀yà ara rẹ̀ kí wọ́n tó sin ín sí orí ilẹ̀ kan tó wà ní ẹ̀gbẹ́ ilé Tunji.
Muslim àti Fatai na pápá bora nígbà tí àwọn ọlọ́pàá mú Tunji àmọ́ àwọn ọlọ́pàá wá wọn jáde wọ́n sì fi ojú wọn ba ilé ẹjọ́.
Adájọ́ Sodamade pàṣẹ kí wọn ó yẹgi fún àwọn mẹ́tẹ́ẹ̀ta nítorí wọ́n jẹ̀bi ẹ̀sùn ìpànìyàn àti ẹ̀wọn ọdún mẹ́rin fún ìfipábánilò.
ỌKÙNRIN KAN WỌ́ AFURASÍ OLÈ KAN MỌ́ ỌKỌ̀ AKÉRÒ.
Fọ́nrán kan ti gba orí ìtàkùn ayélujára kan báyìí, nínú rẹ̀ la ti rí ọkùnrin kan tó wà nínú ọkọ̀ akérò tí ó fi ọwọ́ wọ́ afurasí olè kan tó fẹ́ já ẹ̀rọ ìbánisọ̀rọ̀ rẹ̀ gbà.
Ọkùnrin yìí jòkòó sí ẹ̀gbẹ́ fèrèsé ọkọ̀ akérò náà ó sì ń tẹ ẹ̀rọ ìbánisọ̀rọ̀ rẹ̀, nígbà tí ọkọ̀ dé inú gárígádá ní èyí tó fa súnkẹrẹ fàkẹrẹ, afurasí olè yìí gbìyànjú àti já ẹ̀rọ ìbánisọ̀rọ̀ náà gbà àmọ́ ọkùnrin yìí kò kẹ̀rẹ̀ rárá, ó mú ọwọ́ afúrasí náà mọ́ inú ọkọ̀ láti ojú fèrèsé ọkọ̀ sì ń wọ́ ọ lọ bẹ́ẹ̀.
Ojú afurasí náà rí tó ó sì ń bẹ̀bẹ̀ kí ó fi ọwọ́ rẹ̀ sílẹ̀, nígbà tó wọ́ ọ dé ààyè kan tí ẹ̀mí rẹ̀ ti fẹ́rẹ̀ bọ́ ló tó fi ọwọ́ rẹ̀ náà sílẹ̀. Àwọn èèyàn kan ní kò yẹ kó fi sílẹ̀ rárá.
GÓMÌNÀ ÌPÍNLẸ̀ EBONYI KÉDE KÓNÍLÉ-Ó-GBÉLÉ ỌLỌ́JỌ́ MÉJÌ LẸ́YÌN ÌKỌLÙ TÓ BURÚ JÁÌ.
Gómìnà ìpínlẹ̀ Ebonyi; Francis Nwifuru ti kéde kónílé-ó-gbélé oníwákàtí méjìdínláàdọ́ta ní gbogbo agbègbè Amasiri, ó sì tún pàṣẹ kí gbogbo iléèwé ó wà ní títì pa lásìkò yìí.
Ìdí èyí ni ìkọlù burúkú kan tó wáyé ní Amasiri níbi tí wọ́n ti bẹ́ orí àwọn èèyàn mẹ́rin tí wọ́n sì tún kó àwọn orí náà lọ. Fúnra Gómìnà ló ṣe àbẹ̀wò sí ibi ìṣẹ̀lẹ̀ yìí, ó pàṣẹ kí wọn ó rọ gbogbo àwọn baálẹ̀ agbègbè náà lóyè kí wọ́n sì tún dá kọmíṣọ́nà fún ètò ẹ̀kọ́ dúró nítorí ọ̀rọ̀ náà tọ́ka síi.
Ọjọ́ náà gan-an ni Gómìnà ti ṣe ìlérí pé òun yóò fi àwọn ọ̀daràn tó pitú náà jófin.
Ní báyìí, Gómìnà Nwifuru ti kéde kónílé-ó-gbélé ọlọ́jọ́ méjì ó sì ti kó àwọn ẹ̀ṣọ́ aláàbò dà síbẹ̀ bìbà láti pètù sí agbègbè náà àti láti dẹ́kun irú ìṣẹ̀lẹ̀ báyìí lọ́jọ́ iwájú.
SEGUN PA ARA RẸ̀ LẸ́YÌN TÓ GBÌYÀNJÚ ÀTIPA ỌMỌ RẸ̀.
Ilé iṣẹ́ ọlọ́pàá ti bẹ̀rẹ̀ ìwádìí lórí ikú bàbá kan tí orúkọ rẹ̀ ń jẹ́ Segun. Ariwo tó mú ìfura lọ́wọ́ tí àwọn aráalé gbọ́ láti inú ilé Segun àti ọmọ rẹ̀ ni ó mú wọn já ilẹ̀kùn rẹ̀, wọ́n bá Segun tó ń mì dirodiro lórí okùn tó fi pa ara rẹ̀.
Agbègbè Ise/Orun ní ìpínlẹ̀ Ekiti ni èyí ti ṣẹ̀ ní òwúrọ̀ kùtù ọjọ́ Àìkú. Segun gbìyànjú àti fi ọ̀bẹ dú ọmọ rẹ̀ obìnrin ọmọ ọdún méjìlá lọ́rùn tí òun náà sì ki orí rẹ̀ bọ okùn tó ti ṣe sílẹ̀.
Nígbà tí àwọn èèyàn wọ inú ilé náà, wọ́n bá ọmọ náà pẹ̀lú àpá ọ̀bẹ lọ́rùn tó ń jáporó wọ́n sì tún bá Segun tó ń mì dirodiro lórí okùn.
Ọmọbìnrin náà ti wà nílé ìwòsàn báyìí fún ìtọ́jú nígbà tí òkú Segun ti wà ní ilé ìgbókùúsí.
Ìṣẹ̀lẹ̀ náà ya àwọn èèyàn lẹ́nu, wọ́n kò le sọ pàtó ohun tó fà á. Ilé iṣẹ́ ọlọ́pàá ti bẹ̀rẹ̀ ìwádìí lórí rẹ̀.
ÌJÀM̀BÁ ỌKỌ̀ ÀJÀGBÉ MÉJÌ MÚ Ẹ̀MÍ ÀWỌN ÈÈYÀN MÉJÌ LỌ NÍ ÌPÍNLẸ̀ OGUN.
Àwọn èèyàn méjì ti pàdánú ẹ̀mí wọn nígbà tí ọkọ̀ àjàgbé méjì fi orígbárí ní ojú ọ̀nà márosẹ̀ Abeokuta sí Igboora, ìpínlẹ̀ Ogun.
A gbọ́ pé ọ̀kọ̀ àjàgbé kìíní rọ́ lu kòtò gárígádá ojú ọ̀nà ni ó mú un jáwọ́ lọ kọlu ọkọ̀ àjàgbé kejì tó ń bọ̀ níwájú rẹ̀. eré tí àwọn ọkọ̀ májéèjì náà ń sá ló fàá tí ìjàm̀bá náà fi búrú nígbà tí wọ́n fi orígbárí; àwọn èèyàn mẹ́ta ló fi ara pa nígbà tí àwọn méjì mìíràn gbé ẹ̀mí mìn.
ISELETO GÚN ỌMỌ RẸ̀ PA NÍ ÌPÍNLẸ̀ DELTA.
Ọkùnrin kan tí wọ́n pe orúkọ rẹ̀ ní Iseleto ti na pápá bora báyìí lẹ́yìn tí ó gún ọmọ rẹ̀ ọkùnrin tí orúkọ rẹ̀ ń jẹ́ Miracle pa.
Ohun tí Miracle ṣe náà ni pé ó ga ilé fún ìyàwó bàbá rẹ̀ àti ọmọ rẹ̀ obìnrin láti dẹ́kun ìwà tí bàbá rẹ̀ ń hù síi, èyí ló bí Iseleto nínú tó fi tan Miracle lọ inú igbó tó sì gún un lọ́bẹ káàkiri ara. Miracle gbìyànjú àti wọ́ dé ojú ọ̀nà tí àwọn èèyàn fi ríi, wọ́n gbìyànjú àti gbé e lọ sí ilé ìwòsàn àmọ́ kò dé ọ̀hún tó fi kú. Ó sọ fún àwọn ẹni náà pé bàbá òun ló tan òun lọ sínú igbó lọ pa.
Iseleto kò darí sílé lẹ́yìn iṣẹ́ láabi náà, ó na pápá bora ó sì ń pe ọmọ ìyàwó rẹ̀ lórí aago pé bí òun àti ìyá rẹ̀ kò bá padà sílé, òun yóò pa wọ́n bí òun ṣe pa Miracle ni.
Ọwọ́ àwọn ọlọ́pàá padà tẹ Iseleto, ó jẹ́wọ́ pé òun ló pa Miracle lóòótọ́ nítorí pé ó gbé ìyàwó òun sá fún òun.
Ìyàwó Iseleto ṣe àlàyé pé òun ti bí ọmọbìnrin kan tẹ́lẹ̀ kí òun tó fẹ́ ẹ. Obìnrin yìí ṣe àlàyé pé Iseleto máa ń bá òun àti ọmọ rẹ̀ lájọṣepọ̀ papọ̀ lórí ìbùsùn kan náà, ó ní bí òun bá le kọ̀, àjẹbólórí ìyà ni òun yóò jẹ tí yóò sì tún padà fi ipá bá òun àti ọmọ náà sùn. Èyí ni Miracle ọmọ Iseleto rí tó fi gba ilé fún òun kí òun le bọ́ lọ́wọ́ bàbá rẹ̀.
Ohun tí Miracle ṣe rèé tó bí Iseleto nínú tó fi tan ọmọ náà lọ sínú igbó tó sì gún un lọ́bẹ bíi kí ó kú. Miracle gbìyànjú àti wọ́ dé ojú ọ̀nà àmọ́ ó kú kí ó tó dé ilé ìwòsàn lẹ́yìn tó ṣe àlàyé ọ̀rọ̀ fún àwọn tó ràn án lọ́wọ́.
Iseleto ti wà ní àhámọ́ àwọn ọlọ́pàá báyìí níbi tó ti ń ṣẹ́jú pàkòpàkò de ọjọ́ tí yóò fi ojú ba ilé ẹjọ́.
