Lẹ́yìn ìfẹ̀hónúhàn tó gba iwájú ilé ìwé Igbinedion kan ní ọ̀sẹ̀ tó kọjá, ìjọba ti gba èrò àwọn ajàfẹ́tọ̀ọ́mọnìyàn, àwọn òbí àti àwọn mìíràn tí wọ́n ké tantan lórí ìṣẹ̀lẹ̀ ìṣenimọ́kumọ̀ku tó wáyé nílé ìwé náà wọ́n sì ti ṣetán àti bá àwọn akẹ́kọ̀ọ́ tọ́rọ̀ kàn ṣe ẹjọ́ nílé ẹjọ́ àwọn èwe.
Ohun tí àwọn akẹ́kọ̀ọ́ àgbà náà ṣe ni pẹ́ wọ́n dá àwọn akẹ́kọ̀ọ́ kékéré kúnlẹ̀ wọ́n sì fín wọn ní àtòrì gidi, wọ́n ré wọn nípàá wọ́n sì tún kó ìbóm̀bó bo àwọn ọmọ náà. Kò sí ẹni tó wo fọ́nrán náà tí ara kò ta pé àwọn ọmọ náà le ṣe bẹ́ẹ̀ kú, nígbà tí ariwo pọ̀ lórí ìtàkùn ayélujára ni ilé ìwé Igbinedion lé àwọn ọmọ náà kúrò nílé ìwé náà. A rí àwọn èrò tí wọ́n ń ké lé ọ̀kan nínú àwọn ọmọ náà àti bàbá rẹ̀ nígbà tí ó wá mú un lọ sí ilé.
Ní báyìí, ìjọba ìpínlẹ̀ Edo ti fèsì pé àwọn ti mú àwọn ọmọ tọ́rọ̀ kàn náà sí àhámọ́ àwọn yóò sì bá wọn ṣe ẹjọ́ nílé ẹjọ́ àwọn èwe.
Ilé iṣẹ́ ọlọ́pàá sọ ọ̀rọ̀ yìí láti ẹnu ẹni tó jẹ́ agbẹnusọ wọn; Eno Ikoedem pé lẹ́yìn ìwádìí ni àwọn mú àwọn ọmọ náà sí àhámọ́ wọn yóò sì fi ojú ba ilé ẹjọ́ tó ń gbọ́ ti àwọn ògo wẹẹrẹ.
Eno ṣe àlàyé pé ọjọ́ karùn-ún, oṣù Ẹrẹ́nà ni ìṣẹ̀lẹ̀ náà bẹ̀rẹ̀ nígbà tí àwọn ọmọbìnrin méjì kan tí wọ́n jẹ́ ọmọ ọdún mẹ́rìnlá ní gbólóhùn asọ̀ pẹ̀lú akẹgbẹ́ wọn kan, akẹgbẹ́ wọn náà wá fèsì pé Ògún yóò pa bàbá wọn. Èyí bí àwọn ọmọbìnrin yìí nínú wọ́n sì sọ ọ́ di ijà.
Nígbà tí wọ́n jáde ilé ìwé, àwọn ọmọbìnrin yìí dènà akẹgbẹ́ wọn náà wọ́n sì dojú ìjà kọ̀ ọ́, òbí kan tó wá mú ọmọ rẹ̀ gbìyànjú àti dá wọn lẹ́kun àmọ́ wọ́n lu obìnrin náà wọ́n sì fa aṣọ rẹ̀ ya. Ìwà tí wọ́n hù yìí ni àwọn adarí ilé ìwé náà fi lé wọn kúrò pé wọ́n hu ìwà ìpáǹle.
Nígbà tó di ọjọ́ kejì, ọmọkùnrin tí wọ́n lu ìyá rẹ̀ náà ṣe ìkọlù sí ẹ̀gbọ́n àwọn ọmọbìnrin tí wọ́n lu ìyá rẹ̀, ọ̀kan nínú àwọn akẹ́kọ̀ọ́ náà ló ká fọ́nrán rẹ̀ tó sì fi sí orí ìtàkùn ayélujára.
Ọ̀rọ̀ yìí ká kọmíṣọ́nà ọlọ́pàá ìpínlẹ̀ Edo lára, ó pàṣẹ kí àwọn òṣìṣẹ́ ẹ̀ka ààbò ilé ìwé ó karí gbogbo àwọn ilé ìwé ní ìpínlẹ̀ náà kí wọ́n sì ríi pé ètò ààbò tó péye wà ní ilé ìwé gbogbo. Bákan náà ni ó yan àwọn ọlọ́pàá àti ẹ̀ka tó ń gbógun ti ẹgbẹ́ òkùnkùn láti ṣe ìdánilẹ́kọ̀ọ́ fún àwọn adarí ilé ìwé gbogbo ní ìpínlẹ̀ náà.
Kò tán síbẹ̀ o, Gómìnà rọ àwọn òbí láti ṣe àmójútó àwọn ọmọ wọn ó sì tún rọ àwọn èwe láti yàgò fún ìwà ìpáǹle.
Ilé iṣẹ́ ọlọ́pàá rọ ìlú náà láti fi ààyè gba àlàáfíà pé àwọn yóò ríi dájú pé gbogbo àwọn ọmọ tó jẹ̀bi ìṣẹ̀lẹ̀ náà fi ojú winá òfin.
Ẹ̀ka ètò ẹ̀kọ́ ìpínlẹ̀ Edo náà dá sí ọ̀rọ̀ yìí, wọ́n ní ìwà náà kò jẹ́ ìtẹ́wọ́gbà àwọn kò sì ní jẹ́ kí ó lọ bẹ́ẹ̀. Wọ́n lu àwọn ọlọ́pàá lọ́gọ ẹnu lórí ipa wọn lórí ìṣẹ̀lẹ̀ náà wọ́n sì ní àwọn fi ọwọ́ síi kí àwọn ọmọ náà ó fi ojú ba ilé ẹjọ́ àwọn èwe.
Lọ́gán tí ọ̀rọ̀ yìí lu síta ni mọ̀lẹ́bí ọ̀kan nínú àwọn ọmọ náà ti fi ìwé ìtọrọ àforíjìn léde, Choice ni orúkọ ọmọ wọn ní ìdílé Asoro nígbà tí bàbá rẹ̀ ń jẹ́ Tim.
Choice ni ó dàbí ẹni ṣaájú ogun náà nínú fọ́nrán náà bí ó ṣe ń darí àwọn yòókù nígbà tí wọ́n ń lu akẹ́kọ̀ọ́ náà. Àfi bí ìgba tí Choice ti fìgbà kan bá wọn lu òfi rí tàbí lu bàrà láyé àkọ́wá rẹ̀, ó lu ọmọ náà bíi bẹ̀m̀bẹ́ àfi bíi kí ó kú, bó ṣe ń lù ú ló ṣe ń dá a wọ́nlẹ̀.
Bàbá rẹ̀ fi ìwé ìtọrọ àforíjìn léde lẹ́yìn ìṣẹ̀lẹ̀ náà báyìí pé:
Tim Asoro; bàba Choice Asoro ló bu ọwọ́ lu ìwé ìtọrọ àforíjìn náà. Ẹbí Asoro ní ìṣẹ̀lẹ̀ náà ya àwọn lẹ́nu ó sì tún bàwọ́n lọ́kàn jẹ́, fọ́nrán náà jẹ́ ohun kan tó ba àwọn nínú jẹ́ jù láyé yìí gẹ́gẹ́ bíi òbí, ohun ìdòjútì ni fún àwọn pé ọmọ wọn le hu ìwà tó mú ìpalára bá akẹgbẹ́ rẹ̀.
Wọ́n tọrọ àforíjì lọ́wọ́ ọmọ tí wọ́n lù náà, àwọn ẹbí rẹ̀ àti iléèwé náà lápapọ̀. Dọ́kítà ti fìdí ẹ̀ múlẹ̀ pé ọmọ náà wà ní àlàáfíà àmọ́ ipò ìmọ̀lára ọmọ náà kò dára to.
Àwọn ẹbí Asoro ní èyí fi àwọn lọ́kàn balẹ̀ díẹ̀ àwọn sì ṣetán láti ṣe ìrànwọ́ lórí ìmọ̀lára ọmọ náà. Bákan náà ni wọ́n tọrọ àforíjì lọ́wọ́ iléèwé Igbinedion lórí àbùkù tí ó bá orúkọ wọn látàrí ìṣẹ̀lẹ̀ náà.
Ọ̀rọ̀ wọn tẹ̀síwájú pé àwọn ti bá Choice sọ̀rọ̀ gidi ó sì ti ronú pìwàdà lórí ìwà tó hù náà, ó sì ti mọ ohun tó le tẹ̀yìn rẹ̀ yọ fún òun alára, ọmọ tí wọ́n lù náà àti ilé ìwé náà.
Wọ́n ní àwọn ti ń gbé ìgbésẹ̀ lórí bí yóò ṣe di àtúnbí tí yóò rí olùgbaninímọ̀ràn tí yóò sì yí padà di ọmọ rere bíi iyán.
‘Lẹ́ẹ̀kan síi, a tọrọ àforíjì lọ́wọ́ ọmọ tí wọ́n lù yìí a sì ṣe ìlérí pé gbogbo ẹni tí ó fi ara pa nínú ìṣẹ̀lẹ̀ náà ni yóò rí ìwòsàn’ Tim Asoro
Bí bàbá Choice tilẹ̀ tọrọ àforíjìn, ojú àpá kò le e jọ ojú ara, Choice ti wà ní àhámọ́ àwọn ọlọ́pàá báyìí tí yóò sì fi ojú ba ilé ẹjọ́.
