Nǹkan bíi aago mẹ́fà àbọ̀ ìdájí ọjọ́rú, ọjọ́ kẹtàdínlógún, oṣù Ọ̀pẹ ni ọkọ̀ àjàgbé eléjò kan pàdánù ìjánu rẹ̀ lójú ọ̀nà márosẹ̀ Meiran Alágbàdo, awakọ̀ náà gbìyànjú àti fi ọkọ̀ náà kọlu ògiri ni ó fi yà bàrà sí òpópónà Meiran, ó fi orí sọ ògiri lóòótọ́ àmọ́ kò ṣàì má mú ẹ̀mí àwọn èèyàn méjì dání.
Odidi kẹ̀kẹ́ márúwá kan ló gbé nílẹ̀ tó sì wọ́ rọ́lu ògiri ilé ìwòsàn ìjọba tó wà ní oríta Meiran náà. Bákan náà ló tẹ ọkọ̀ kórópe kan àti kẹ̀kẹ́ bíi mẹ́rin mìíràn wómúwómú.
Àwọn èrò inú kórópe náà sá àsálà fún ẹ̀mí wọn, wọ́n sá jáde wọ́n sì yè àmọ́ wọn kò ṣaláì má farapa.
Àwọn èèyàn mìíràn náà fi ara gbá nínú ìjàm̀bá yìí, àwọn kan ń lọ tiwọn nígbà tí àwọn mìíràn ń ṣòwò wọn lọ́wọ́ lásìkò ìjàm̀bá náà.
Méjì ni àwọn èèyàn tó kú níbi ìjàm̀bá yìí nígbà tí àwọn yòókù ń gba ìtọ́jú nílé ìwòsàn. Lára àwọn tó kú yìí ni olùkọ́ ilé ìwé kan tí kò jìnnà sí Meiran, olùkọ́ yìí kúrò ní ẹnu iṣẹ́ rẹ̀ lọ ra oúnjẹ jẹ ní oríta náà nígbà tí ó ṣe àgbákò ìkọlù náà.
Abala ogiri ilé ìwòsàn náà rún wómúwómú, àwọn ẹ̀ṣọ́ ilé ìwòsàn náà kò sí nínú yàrá kótópó wọn ni orí fi kó wọn yọ nítorí inú yàrá náà gan-an ni ọkọ̀ náà balẹ̀ sí.
Àwọn ọlọ́pàá Meiran àti àwọn òṣìṣẹ́ LASTMA ni wọ́n yọ àwọn tó há sí inú èérún àwọn kẹ̀kẹ́ márúwá náà àti inú ògiri ilé ìwòsàn náà.
Awakọ̀ àjàgbé náà tó jẹ́ ti ilé iṣẹ́ Dangote fi ẹsẹ̀ fẹ́ ẹ lẹ́yìn ìkọlù náà, àwọn ọlọ́pàá ti bẹ̀rẹ̀ sí wá a báyìí.
Taofik Adebayo; ẹni tó jẹ́ agbẹnusọ fún àjọ LASTMA ló fi ọ̀rọ̀ yìí léde. Ó ṣe àlàyé pé ọkọ̀ náà pàdánù ìjánu rẹ̀ lójijì lórí eré ó sì yà wọ inú òpópónà Meiran, ọ̀pọ̀ kẹ̀kẹ́ ló tẹ̀ nítorí ibùdó wọn ni oríta náà bẹ́ẹ̀ sì ni ó tẹ ọkọ̀ kórópe kan kan látẹ̀rún wómúwómú.
Adarí àjọ LASTMA; Ọ̀gbẹ́ni Bakare Oki bá ẹbí àwọn tó kú náà kẹ́dùn ó sì gbàdúrà ìmúláradá fún àwọn tó farapa.
Ní Lekki:
Àwọn èèyàn márùn-ún ti balẹ̀ sílé ìwòsàn lẹ́yìn tí ọkọ̀ akérò tí wọ́n wà nínú rẹ̀ pàdánù ìjánu rẹ̀ tó sì lọ kọlu àwọn kankéré ẹnu ìloro Lekki.
A gbọ́ pé orí eré ni ọkọ̀ náà wà tó fi pàdánù ìjánu rẹ̀ lójijì tó sì lọ kọlu àwọn kankéré náà.
Àwọn èèyàn mẹ́rin àti awakọ̀ ni wọ́n farapa yánnayànna, wọn kò le kó wọn lọ sí ilé ìwòsàn ìjọba nítorí pé ip̀ wọn burú gan-an kí wọ́n má lọ kú kí wọ́n tó dé ibẹ̀ ni wọ́n fi kó wọn lọ sí ilé ìwòsàn aládàáni kan tó wà nítòsí.
Ọkọ̀ agbáláìsàn ìjọba ló kó àwọn èrò ìyókù lọ sí ilé ìwòsàn ìjọba nítorí àwọn kò nílò ìtọ́jú pàjáwìrì bí àwọn márùn-ún náà.
Adebayo Taofiq; ẹni tó jẹ́ agbẹnusọ fún ẹ̀ka LASTMA ṣe àlàyé pé àwọn ta mọ́ra dé ibi ìṣẹ̀lẹ̀ náà láti dóòlà ẹ̀mí àwọn ẹni náà.
Ó ṣẹlẹ̀ ní ìpínlẹ̀ Kogi:
Kò dín ní àwọn èèyàn mẹ́rin tó ti dèrò ọ̀run látàrí ìjàm̀bá ọkọ̀ tó wáyé ní ojú ọ̀nà Lokoja sí Ajaokuta ní ìpínlẹ̀ Kogi.
Ìpínlẹ̀ Enugu ni ọkọ̀ náà ti gbéra pẹ̀lú èrò méjìdínlógún, ibi tí wọ́n ń lọ náà ni Abuja àmọ́ ìpínlẹ̀ Kogi ni ó ti ní ìjàm̀bá.
Ìròyìn fi yé wa pé ọkọ̀ akérò náà gbìyànjú àti jáwọ́ fún ọkọ̀ àjàgbé akẹ́rù kan tó dojú kọ ọ́ ni ó fi lọ kọlu ọkọ̀ àjàgbé mìíràn tó bàjẹ́ kalẹ̀.
Àwọn èèyàn mẹ́rin ló kú lẹ́sẹ̀kẹsẹ̀ nígbà tí àwọn yòókù fi ara pa yánnayànna. Adarí ẹ̀ka FRSC ìpínlẹ̀ Kogi; Tenimu Etuku ló jábọ̀ ìṣẹ̀lẹ̀ yìí, ilé ìwòsàn ìjọba Kogi ni wọ́n kó àwọn tó farapa lọ nígbà ti wọ́n kó àwọn tó kú náà lọ sí ilé ìgbókùúsí ilé ìwòsàn náà.
Etuku ṣe àpèjúwe ìjàm̀bá yìí gẹ́gẹ́ bíi èyí tó bani lọ́kàn jẹ́ ó sì rọ àwọn awakọ̀ láti máa ṣe jẹ́jẹ́ lójú pópó.
Ìjàm̀bá ọkọ̀ kìí ṣe ìròyìn mọ́ ní ìlú yìí látàrí pé gbogbo ìgbà ló ń wáyé káàkiri àwọn ageb̀gbè àti ìpínlẹ̀. Ọ̀pọ̀ ẹ̀mí ló ti pàdé ikú òjijì látàrí èyí.
Lára àwọn tó ti ṣẹ̀ sẹ́yìn ni:
Ọkọ̀ àjàgbé eléjò kan ló mú ọkọ̀ akérò kan gùn ni ipinle Abia, àwọn èèyàn náà kò kú lẹ́sẹ̀kẹsẹ̀ àmọ́ àwọn mẹ́fà padà kú nígbà tí wọn kò rí wọn yọ lásìkò nígbà tí àwọn yóòkù fara pa yánnayànna.
Òpópónà Mmuri ní ìjọba ìbílẹ̀ Ohafia, ìpínlẹ̀ Abia ni ìjàmbá yìí ti wáyé. Nǹkan bíi aago kan àbọ̀ ọ̀sán ni ìjàmbá náà wáyé . Òpópónà náà kò já geere fún ọkọ̀ láti gbà kọjá ló fa ìjàmbá náà.
Ààrẹ ẹgbẹ́ ìdàgbàsókè Ohafia; Emeka Mba bá àwọn oníròyìn sọ̀rọ̀ pé ó bani lọ́kàn jẹ́ pé ìjàmbá náà mú ẹ̀mí mẹ́fà lọ. Ó bu ẹnu àtẹ́ lu àwọn ẹ̀ka ìṣẹ̀lẹ̀ pàjáwìrì pé wọn kò ní irin iṣẹ́ tí wọ́n le fi wọ́ ọkọ̀ àjàgbé náà kúrò lórí ọkọ̀ akérò náà.
Mba wí pé ó ṣeéṣe kí àwọn èèyàn náà ó má kú bó bá ṣe pé àwọn òṣìṣẹ́ pàjáwìrì ní irin iṣẹ́ tó kúnjú òṣùwọ̀n ni.
Àjọ tó ń rí sí ìgbòkègbodò ọkọ̀ ìpínlẹ̀ Abia fìdí ìṣẹ̀lẹ̀ náà múlẹ̀ pé àwọn ta mọ́ra dé ibẹ̀ pẹ̀lú àwọn òṣìṣẹ́ pàjáwìrì, ọkọ̀ awọ́kọ̀ (Towing vehicle) méjì ni wọ́n gbé lọ àmọ́ agbára wọn kò wọ́ ọkọ̀ àjàgbé náà nítorí ẹrù tó kó wúwo.
Ṣé ẹ rántí èyí tó ṣẹlẹ̀ ní Agege? Níbi tí ọkọ̀ àjàgbé ti jábọ́ láti orí afárá?
Ọkọ̀ àjàgbé eléjò kan ló pàdánù ìjánu rẹ̀ lórí afárá Pen cinema tó sì ṣe bẹ́ẹ̀ jábọ́ sí ìsàlẹ̀.
Ọkọ̀ akérò kórópe méjì ló já lù mọ́lẹ̀. Awakọ̀ àjàgbé yìí dá lápá méjèèjì nínú ìjàmbá náà.
Agbẹnusọ fún ilé iṣẹ́ tó ń mójútó ìgbòkègbodò ọkọ̀ ìpínlẹ̀ Èkó; Adebayo Taofiq fìdí ìṣẹ̀lẹ̀ náà múlẹ̀ pé awakọ̀ ọkọ̀ àjàgbé náà farapa gan-an ni kódà ó dá lápá méjèèjì.
Ó wí pé orí afárá náà ló ti pàdánù ìjánu rẹ̀ léyìí tó mú u jábọ́ sílẹ̀ lu ọkọ̀ méjì.
Ìjàmbá yìí dá súnkẹrẹ-fàkẹrẹ sílẹ̀ àmọ́ àwọn òṣìṣẹ́ ààbò ojú pópó ṣe àmójútó rẹ̀.
Wọ́n fa awakọ̀ ọkọ̀ àjàgbé náà lé àwọn ọlọ́pàá lọ́wọ́ kí wọ́n tó gbé e lọ sí ilé ìwòsàn ìjọba tó wà ní Ile-epo.
Adarí ilé iṣé ààbò ojú pópó ti ìpínlẹ̀ Èkó; Olalekan Bakare-Oki ṣe awakọ̀ náà ní pẹ̀lẹ́ ó sì rọ àwọn awakọ̀ láti máa ṣe jẹ́jẹ́ lójú pópó.
