Oríṣìí àlàyé ló ti ń lọ lórí ìdí tí àwọn omidan kò fi gbọdọ̀ jáde lásìkò orò ní Ozoro, ọ̀pọ̀ àwọn èèyàn ló ti fi oríṣìí àlàyé àti ìrírí wọn léde lóró orò náà tí a kò sì mọ èyí tó jẹ́ òtítọ́. Àmọ́ ní báyìí, ọ̀rọ̀ ti jáde láti ẹnu ààrẹ ẹgbẹ́ ìtẹ̀síwájú ìlú Ozoro gan-an lórí ìdí tó fi jẹ́ èèwọ̀ fún àwọn omidan láti jáde lásìkò orò náà.
Ọ̀gbẹ́ni Asiafa Berkeley ṣe àlàyé pé orò náà wà fún ìwúre ọmọ bíbí fún àwọn obìnrin tí wọ́n ń wojú Elédùmarè fún ọmọ, nítorí náà ni ó ṣe jẹ́ èèwọ̀ fún àwọn ọ̀dọ́mọbìnrin láti jáde lásìkò orò yìí. Ìdí ni pé bí ọmọbìnrin bá lóyún láì lọ sí ilé ọkọ, ohun ìtìjú ni fún àwọn òbí rẹ̀.
Wàyí o, èyí kò ní nǹkan kan án ṣe pẹ̀lú bí àwọn géńdé ọkùnrin ṣe ṣe àwọn obìnrin mọ́kumọ̀ku níbí orò tó wáyé gbẹ̀yìn yìí, Berkeley wí pé àwọn tí wọ́n hu ìwà náà kò ní ipa kankan nínú orò náà wọ́n kàn fi orò náà kẹ́wọ́ hu ìwà ìpáǹle ọwọ́ wọn ni.
Ọ̀rọ̀ rẹ̀ tẹ̀síwájú pé irú èyí kò ṣẹlẹ̀ rí ní Ozoro, bẹ́ẹ̀ sì ni kò sí ẹni tó fún àwọn ọ̀dọ́ náà ni àṣẹ láti ṣe ohun tí wọ́n ń ṣe.
Berkeley tọrọ àforíjìn lọ́wọ́ gbogbo ìlú pé àwọn náà jẹ̀bi ìṣẹ̀lẹ̀ náà nítorí pé àwọn kò ṣètò ààbò tó péye fún orò náà ló fún àwọn ọ̀dọ́ náà ní àǹfààní gbogbo ohun tí wọ́n ṣe.
Ipa àwọn ọlọ́pàá:
Ilé iṣẹ́ ọlọ́pàá ìpínlẹ̀ Delta ti bẹ̀rẹ̀ iṣẹ́ lórí orò Ozoro tó wáyé ní ìpínlẹ̀ Delta níbi tí wọ́n ti ṣe àwọn obìnrin mọ́kumọ̀ku. Èèyàn mẹ́ta ni wọ́n kọ́kọ́ mú pẹ̀lú abọrẹ̀ àmọ́ ní báyìí, ọwọ́ wọn ti tẹ àwọn mọ́kànlá mìíràn tí wọ́n jẹ́ afurasí.
Ilé iṣẹ́ ọlọ́pàá ìpínlẹ̀ náà ló kọ ọ́ sí ojú òpó wọn pé àwọn ti bẹ̀rẹ̀ ìwádìí lórí orò tó wáyé náà, fọ́nrán ìṣẹ̀lẹ̀ náà ló ṣe atọ́nà wọn lórí bí wọ́n ṣe mú àwọn afurasí náà. Àwọn tí ọwọ́ tẹ̀ náà ni Samson Atukpodo, Steven Ovie, Ugbevo Samson, Afoke Akporobaro, Evidence Oguname àti àwọn mẹ́fà mìíràn.
Ìjọba fi ìdí ẹ̀ múlẹ̀ nínú àgbéjáde náà pé ìfipabánilò àti ìṣenimọ́kumọ̀ku tó wáyé náà kò ní ohunkóhun ṣe pẹ̀lú àṣà àti orò Ozoro, àwọn ọ̀dọ́ pàpàǹlagi ni wọ́n sá sí abẹ́ orò náà láti ṣe iṣẹ́ ibi ọwọ́ wọn.
Bákan náà ni ìjọba ṣe ìlérí pé gbogbo àwọn tó lọ́wó nínú ìṣenimọ́kumọ̀ku náà yóò fi ojú winá òfin.
Àwọn obìnrin náà sọ̀rọ̀:
Àwọn obìnrin tí wọ́n jẹ́ olùgbé Ozoro níbi tí orò Alue-Do ti wáyé ṣe àlàyé bí ọjọ́ orò náà ṣe lọ. Wọ́n ní àwọn wó ìrókò mọ́rí nítorí ìbẹ̀rù ìfipábánilò.
Àwọn tí wọ́n ṣe àkóso orò náà ti kéde pé àwọn obìnrin kò gbọdọ̀ jáde ni àwọn bá yára ti gbogbo ìsọ̀ pa tí wọ́n sì kira mọ́nú ilé.
Ọba ìlú Ozoro; Ọlọ́lájùlọ Anthony Ogbogbo kọ ẹ̀yìn sí àwọn tó ṣe orò yìí. Ọba wí pé òun ti wà lórí ipò náà fún ogún ọdún òun kò sì gbọ́ nípa orò náà rí.
Orí ìtàkùn ayélujára ni mo ti ń rí oríṣìí fọ́nrán nínú èyí tí wọ́n ti ń ṣe àwọn obìnrin mọ́kumọ̀ku, àwọn ọba bẹ̀rẹ̀ sí ní pè mí àti àwọn òṣìṣẹ́ ìjọba pé ṣé èmi ni mò fi àṣẹ sí kí orò náà ó wáyé – Ọba Anthony Ogbogbo.
Ààrẹ ẹgbẹ́ àwọn akẹ́kọ̀ọ́ ilé ìwé gíga Delta; Oribelua Precious tẹ̀lé ìgbìmọ̀ lọ sí ààfin Ọba Anthony, ó fìdí ẹ̀ múlẹ̀ pé ọ̀pọ̀ àwọn obìnrin tọ́rọ̀ kàn náà jẹ́ akẹ́kọ̀ọ́ ilé ìwé náà. Wọ́n ti kó wọn lọ sílé ìwòsàn fún ìtọ́jú, dọ́kítà fìdí ẹ̀ múlẹ̀ pé wọn kò bá wọn ní àjọṣepọ̀ àmọ́ wọ́n tẹ̀ wọ́n nítẹ̀kutẹ̀ wọ́n sì tún ki ìka bọ abẹ́ àwọn kan nínú wọn àmọ́ wọn kò ti okó bọ ìdí wọn rárá.
Precious wí pé bí ó tilẹ̀ jẹ́ pé wọn kò bá àwọn obìnrin náà lò pọ̀, síbẹ̀, òun kò ní fi ọwọ́ yẹpẹrẹ mú ọ̀rọ̀ náà nítorí pé ó tẹ ẹ̀tọ́ ọmọnìyàn lójú mọ́lẹ̀.
Ọ̀rọ̀ rẹ̀ tẹ̀síwájú pé àwọn fi ìkéde orò náà sí ojú òpó ilé ìwé àmọ́ àwọn akẹ́kọ̀ọ́ ní kò yé àwọn pàtọ́ àfi ìgbà tí wọ́n fi ojú ara wọn rí i. Ó wí pé òun rọ àwọn adarí ìlú náà láti máa fi ẹ̀kúnrẹ́rẹ́ àlàyé nípa orò tàbí ìṣẹ̀ṣe wọn ránṣẹ́ sí àwọn nítorí pé àlejò ni wọ́n jẹ́ ní ìlú náà wọn kò sì mọ ojú ilẹ̀. Àwa náà ní àṣà tiwa níbi tí a ti wá a sì fi ọ̀wọ̀ fún àṣà ìlú tí a ti wá ka ìwé, ìṣẹ̀lẹ̀ yìí tẹ ẹ̀tọ́ wa lójú mọ́lẹ̀ a kò sì ní gbà – Precious Oribelua.
Láti ìbẹ̀rẹ̀ pẹ̀pẹ̀:
Ọ̀pọ̀ àwọn obìnrin àti akẹ́kọ̀ọ́bìnrin ni wọ́n ṣe àgbákò ìfipábábánilò àti ìṣenimọ́kumọ̀ku ní agbègbè Ozoro ní ìpínlẹ̀ Delta lọ́sẹ̀ tó kọjá. Orò Alue-Do ni àwọn ará Ozoro ṣe ní ọjọ́ kọkàndínlógún, oṣù Ẹrẹ́nà yìí níbi tí wọ́n ti ṣe àwọn obìnrin tí ọwọ́ wọn tẹ̀ bí ọṣẹ ṣe ń ṣe ojú.
Àwíjàre wọn ni pé àwọn ti kéde pé obìnrin kankan kò gbọdọ̀ jáde lásìkò orò yìí àti pé obìnrin tí ọwọ́ wọ́n bá tẹ̀ yóò rí okó he.
Ọ̀pọ̀ fọ́nrán ló jáde lọ́jọ́ náà nínú èyí tí àwọn géńdé ọkùnrin ti ń fa aṣọ àwọn obìnrin ya tí wọ́n sì ń fi ọwọ́ tẹ gbogbo ògo ara wọn. A rí obìnrin kan tí wọ́n wọ́ bọ́ sílẹ̀ láti orí ọ̀kadà tí wọ́n ya aṣọ ọrùn rẹ̀, àwọn ọkùnrin pé lé e lórí wọ́n sì ń tẹ̀ ẹ́ lára, obìnrin yìí náà jà fitafita wọ́n sì padà fi sílẹ̀ nígbà tí wọ́n tẹ́ ara wọn lọ́rùn tán.
Àwọn èèyàn bu ẹnu àtẹ́ lu ìṣẹ̀lẹ̀ yìí, wọ́n bèèrè fún ìdájọ́ òdodo fún àwọn obìnrin tí ọ̀rọ̀ kàn náà.
Àwọn ará agbègbè náà fìdí ẹ̀ múlẹ̀ pé orò ìlú náà ni ó sì máa ń wáyé lóòrèkóòrè, obìnrin tí wọ́n bá mú lóde lásìkò orò náà yóò ṣe àgbákò ìfipábánilò.
