Àwọn ọlọ́pàá ṣe àwárí ayédèrú ilé ọmọ aláìníyàá ní ìpínlẹ̀ Edo. Ẹni tó ni ilé yìí kò ní ìwé ìforúkọsílẹ̀ bẹ́ẹ̀ sì ni kò ní ìwé àṣẹ.
Grace Efe Uwadia ni orúkọ obìnrin tó ni ilé ọmọ aláìníyàá yìí nígbà tí orúkọ ilé náà ń jẹ́ Uwadia Children Home. Agbègbè Afuze ní ìpínlẹ̀ Edo ni ó fi ìkàlẹ̀ sí.
Euginia Abdallah; ẹni tó jẹ́ kọmíṣọ́nà fún ọ̀rọ̀ obìnrin àti ìdàgbàsókè àwùjọ ló fi ọ̀rọ̀ yìí léde pé ìjọba ìpínlẹ̀ Edo ti mú Grace fún ìdásílẹ̀ àti ìṣàkóso ilé ọmọ aláìníyàá lọ́nà tí kò bá òfin mu.
Ohun tó ṣe okùnfà bí wọ́n ṣe mú un náà ni ẹnìkan tó fi ẹjọ́ sun àwọn ọlọ́pàá pé Grace lu òun ní jìbìtì mílíọ́nù méjì náírà láti gba ọmọ tọ́ nílé iṣẹ́ rẹ̀ náà – Àwọn ọlọ́pàá ṣe àwárí ayédèrú ilé ọmọ aláìníyàá ní ìpínlẹ̀ Edo.
Monday Akpaduma ni orúkọ ẹni tó fẹ́ gba ọmọ tọ́ náà, ó lọ sí Uwadia Children Home láti gba ọmọ tọ́ àmọ́ ó fura pé ejò lọ́wọ́ nínú àwọn ìlànà tí wọ́n ń lò. Èyí ló mú un tọ ẹ̀ka tó ń gbọ́ ti ọ̀rọ̀ obìnrin lọ ṣàlàyé. Wọ́n ṣe ìwádìí lóòótọ́, wọ́n sì ríi pé orúkọ ilé náà kò ní ìwé tàbí àṣẹ ìforúkọsílẹ̀.
Akpaduma ṣe àlàyé pé òun san ẹgbẹ̀rún lọ́nà ọ̀tàlérúgba-ó-dín-mẹ́wàá náírà fún ètò ìgba-ọmọ-tọ́, lẹ́yìn náà ni wọ́n ní kí òun ó san mílíọ́nù kan náírà kí wọ́n tó le gbé ọmọ fún òun. Lẹ́yìn ọ̀pọ̀ ìdádúró, wọ́n ní owó rẹ̀ gbọdọ̀ pé mílíọ́nù méjì bí yóò bá gba ọmọ.
Ìdí rèé tí Monday fi tọ ẹ̀ka náà lọ, wọ́n ṣe àyẹ̀wò àwọn ìwé tí wọ́n fún un wọ́n sì ríi pé ayédèrú ni àwọn ìwé náà. Ìwé àtijọ́ ti ẹ̀ka náà ni wọ́n fún un wọn kò sì lò ó mọ́.
Nínú ìwádìí ni wọ́n ti ríi pé ọ̀kan nínú àwọn òṣìṣẹ́ ẹ̀ka náà ló ń ṣiṣẹ́ pẹ̀lú Grace, òun ló kó ìwé àṣẹ àtijọ́ fún Grace kí ó máa fi lu jìbìtì.
Àwọn ọlọ́pàá wí pé àwọn kò tíì rí òṣìṣẹ́ yìí mú nítorí ó ti na pápá bora àmọ́ àwọn ṣì ń wá a – Àwọn ọlọ́pàá ṣe àwárí ayédèrú ilé ọmọ aláìníyàá ní ìpínlẹ̀ Edo.
Irú rẹ̀ wáyé ní ìpínlẹ̀ Èkó náà:
Àwọn ẹ̀ṣọ́ aláàbò ṣe àwárí ibi tí wọ́n ti ń fi ọmọ ṣòwò – Àwọn ẹ̀ṣọ́ aláabò NSCDC ti ṣe àwárí ibìkan tí wọ́n ti ń fi ọmọ titun ṣe òwò. Ilé náà wà ní Okuju ní Badagry, ìpínlẹ̀ Èkó.
Òru ọjọ́rú mọ́jú ọjọ́bọ ni àwọn ẹ̀ṣọ́ NSCDC ya wọ inú ilé náà tí wọ́n sì kó wọn ní pápámọ́ra. Àwọn ọ̀dọ́mọbìnrin méjìdínlógún ni wọ́n gbà sílẹ̀ àti àwọn ọmọdé mẹ́wàá. Àwọn obìnrin méjìdínlógún yìí wà nínú oyún, gbogbo wọn ló ń retí ọmọ titun jòjòló. – Àwọn ẹ̀ṣọ́ aláàbò ṣe àwárí ibi tí wọ́n ti ń fi ọmọ ṣòwò.
Bákan náà ni ọwọ́ tẹ àwọn tó ń darí ilé òwò ọmọ yìí, orúkọ wọn ni Joy Okeke àti Raphael Agwu. Àwọn obìnrin náà ṣe àlàyé pé wọn kò fi ipá mú wọn, fúnra wọn ni wọ́n fi orúkọ sílẹ̀ lórí ìkànnì facebook.
Ilé náà ni wọn yóò máa gbé títí wọn yóò fi bímọ tí wọn yóò sì tà á. Ẹ̀ẹ́dẹ́gbẹ̀ta ẹ̀gbẹ̀rún náírà sí mílíọ́nù kan ààbọ̀ náírà ni wọn ń ta ọmọ kan. Àwọn kan nínú wọn gbé ọmọ tí wọ́n ti bí tẹ́lẹ̀ wá tà níbẹ̀.
Àwọn ọmọdé mẹ́wàá tí wọ́n bá náà kò tíì rí ẹni rà wọ́n ni wọ́n ṣì ṣe wà níbẹ̀. Ọjọ́ orí àwọn obìnrin yìí wà láàrín méjìdínlógún sí ọgbọ̀n, àwọn ọlọ́pàá fi wọ́n hàn ní àgọ́ wọn tó wà ní Ibereoko.
Adedotun Keshinro; ẹni tó jẹ́ adarí àjọ NSCDC ìpínlẹ̀ Èkó ṣe àlàyé pé ọ̀sẹ̀ mẹ́ta ni awọn fi tọpinpin. Wọ́n ya bò wọ́n láìròtẹ́lẹ̀.
Keshinro ṣe àlàyé pé àwọn òṣìṣẹ́ wọn wà ní ìgboro bámú. Iṣẹ́ wọn ni láti tan àwọn ọ̀dọ́mọbìnrin tí wọ́n rí oyún he wá sí ilé náà. Wọ́n á rọ̀ wọ́n kí wọ́n wá sí ilé náà fún ìtọ́jú wọn yóò sì tún ta ọmọ náà. Ìdí ni pé wọn kò nílò rẹ̀. Lọ́gán tí wọ́n bá ti bímọ tán ni wọn yóò fún wọn lówó wọn tí wọn yóò sì padà sí ìgboro.
Àlàyé Keshinro tẹ̀síwájú pé oyún bàjẹ́ lára ọ̀kan nínú àwọn obìnrin náà látàrí ìjayà nígbà tí wọ́n ya bò wọ́n. Ìdúnáàdúrà sì ti ń lọ lórí àwọn ọmọdé náà kó tó di pé wọ́n kó wọn.
Keshinro ní ọ̀ràn ńlá ni ohun tí àwọn ẹni náà ṣe yìí. Wọn yóò fà wọ́n lé àwọn ọlọ́pàá lọ́wọ́ fún ìgbẹ́jọ́.
Joy Okeke; ẹni tó ń darí ilé náà ṣe àlàyé ọ̀rọ̀. Ó ní Ìkòròdú ni òun ti ń ṣe òwò òun tẹ́lẹ̀ àmọ́ ibẹ̀ kò gba òun mọ́. Ìdí rèé tí òun fi wá ilé tó tóbi wá sí Badagry.
Kò tíì ju oṣù mẹ́fà lọ tó kó lọ Badagry tí wọ́n fi mú un yìí. Ó ní oore ni òun ń ṣe ní tòun. Ìdí ni pé àwọn tí wọn ní ìṣòro ọmọ bíbí ni òun ń ràn lọ́wọ́. Nípa pé yóò gba ọmọ lọ́wọ́ àwọn tí kò fẹ́ yóò sì tà á fún àwọn tó ń wá ọmọ. Ó ní òun kò le sọ ju bẹ́ẹ̀ lọ àfi ìgbà tí agbẹjọ́rò òun bá dé.
Angwu; ẹni tó jẹ́ igbákejì Okeke náà sọ̀rọ̀. Ó wí pé àwọn obìnrin náà ti ọwọ́ bọ ìwé àdéhùn pé wọn yóò ta ọmọ tí wọ́n bá bí. Ó ṣe àlàyé pé àwọn ń ṣe ìrànwọ́ fún àwọn tí wọ́n fẹ́ ṣẹ́ oyún wọn ni. Èyí tí wọn yóò fi ṣẹ́ oyún náà dànù ni wọn yóò fi ṣe ìrànwọ́ fún àwọn tó ń wá ọmọ.
Ọ̀rọ̀ Angwu tẹ̀síwájú pé àwọn kò fi ipá mú ẹnikẹ́ni, fúnra wọn ni wọ́n fẹ́ ta ọmọ wọn. Wọ́n lóyún tí wọn kò fẹ́ ni àwọn fi ń ṣe wọ́n lóore. Fún ìdí èyí, àwọn kìí ṣe ọ̀daràn.
Àwọn mìíràn gan-an mú ọmọ tí wọ́n ti bí tẹ́lẹ̀ wá fún títà nítorí bùkátà ló jẹ́ fún wọn. Àwọn yóò bá wọn ta irú ọmọ bẹ́ẹ̀ fún àwọn tó ń wá ọmọ, kò sí ọ̀ràn nínú èyí.
Àwọn obìnrin náà kìí ṣe iṣẹ́ kankan, kí wọ́n jẹun, kí wọ́n sùn kí wọ́n sì lo òògùn wọn ni. Ọ̀pọ̀ nínú wọn ni kò fẹ́ kí ẹbí rẹ̀ mọ ibi tó wà nígbà tí àwọ́n mìíràn máa ń gba àlejò mọ̀lẹ́bí wọn. Àdéhùn náà tẹ́ wọ́n lọ́rùn ni wọ́n fi ń wá síbẹ̀, àwọn mìíràn ti bí ju ọmọ kan lọ fún wọn tà. Agwu ní òun àti ọmọ òun ni àwọn ń tọ́jú ilé náà àti àwọn obìnrin náà.
