Nígbà tí àwọn tí wọ́n kó lọ́sẹ̀ tó kọjá ṣẹ̀ṣẹ̀ ń bọ́ sípò padà, àwọn agbébọn tún ti ṣe ìkọlù sí agbègbè Isapa, Eruku, ìpínlẹ̀ Kwara.
A gbọ́ pé ìrọ̀lẹ́ ọjọ́ Ajé ni àwọn agbébọn náà tí iye wọn ń lọ bíi ogún sí ọgbọ̀n ya wọ àdúgbò náà tí wọ́n yìnbọn lákọlákọ, wọ́n pín ara wọn káàkiri gbogbo àbáwọ inú ìlú náà pẹ̀lú ọ̀pọ̀lọpọ̀ màálù.
Wọ́n tọ àárín ìlú náà tí wọ́n sì ń yìnbọn mọ́ gbogbo ilé, ojú ọta ìbọn kún ojú fèrèsé àti ògiri nígbà tí wọ́n lọ tán.
Àwọn èèyàn mọ́kànlá ni wọ́n kó lọ pẹ̀lú aláboyún kan, méje nínú wọn lọ jẹ́ mọ̀lẹ́bí kan.
Àwọn tí wọ́n kó lọ náà ni Talatu Kabiru; ọmọ ọdún mẹ́fà, Magaji; ọmọ ọdún mẹ́fà, Kande; ọmọ ọdún márùn-ún, Hadiza; ọmọ ọdún mẹ́wàá, Mariam; ọmọ ọdún mẹ́fà, Saima; ọmọ ọdún márùn-ún, Habibat, Fatima Yusuf, Sarah Sunday; aláboyún ẹni ọdún méjìlélógún, Lami Fidelis àti Haja Na Allah tó ń tọ́mọ lọ́wọ́.
Àwọn ará ìlú náà ṣe àpèjúwe ìṣẹ̀lẹ̀ náà gẹ́gẹ́ bíi èyí tó burú jáì, inú fu àyà fu ni àwọn èèyàn wà wọn kò sì mọ ohun tí yóò tún ṣẹlẹ̀.
Àwọn ẹ̀ṣọ́ aláàbò ti fèsì pé àwọn ti kán lu igbó láti wá àwọn èèyàn náà jáde nínú igbó tó pààlà Isapa àti Eruku.
Wọ́n wí pé ìkọlù yìí wáyé lẹ́yìn èyí tí ìkọlù ti ilé ìjọsìn Eruku níbi tí wọ́n ti kó àwọn èèyàn méjìdínlógójì. Láti ìgbà náà ni àwọn ẹ̀ṣọ́ aláàbò ti kún àwọn abúlé náà àmọ́ èyí kò dá àwọn agbébọn náà dúró.
Ilé iṣẹ́ ọlọ́pàá ìpínlẹ̀ Kwara ní àwọn kò tíì gbọ́ nǹkankan lásìkò tí a kọ ìròyìn yìí.
Ṣé ẹ rántí ìkọlù tí wọ́n ṣe sí ilé ìwe Aguda ní Niger?
Ilé ìwé ìjọ Aguda ST Mary tó wà ní agbègbè Papiri ní ìjọba ìbílẹ̀ Agwara ní ìpínlẹ̀ Niger, ìkọlù náà nípọn tó bẹ́ẹ̀ tí a kò le sọ pàtó iye àwọn akẹ́kọ̀ọ́ tí wọ́n ti kó lọ báyìí.
Àlàyé tí a rí gbà ni pé òru Ọjọ́bọ ni àwọn agbébọn ya bo ilé ìwé náà, wọ́n ṣíná ìbọn bolẹ̀ jìnnìjìnnì sì bo gbogbo àwọn olùkọ́ àti akẹ́kọ̀ọ́.
Àwọn akẹ́kọ̀ọ́ tí wọ́n kó lọ jẹ́ obìnrin iye wọn sì lé ní ọgọ́rùn-ún. Ìkọlù náà ti mú oríṣìí ìhà jáde láàrin àwùjọ, ọ̀pọ̀ ló bèèrè ipò tí ètò ààbò ilẹ̀ wa wà báyìí.
Agbẹnusọ fún ilé iṣẹ́ ọlọ́pàá ìpínlẹ̀ Niger; Wasiu Abiodun ní òun kò tíì le sọ nǹkan kan báyìí.
ÌJỌBA ÌPÍNLẸ̀ NIGER SỌ̀RỌ̀.
Ìjọba ìpínlẹ̀ Niger ti sọ sí ìkọlù náà láti ẹnu olórí ẹ̀ka àjálù àti ìtura; Ahmed Abdullahi Rofia. Ó wí pé aago mẹ́ta òru ni ìkọlù náà wáyé.
Ọ̀gá ilé ìwé náà ni ìjọba di ẹ̀bi ìkọlù náà lé lórí, ó wí pé gómìnà ti pàṣẹ kí gbogbo ilé ìwé ó wà ní títì pa àmọ́ ọ̀gá ilé ìwé náà kò tẹ̀lé àṣẹ náà.
Lórí ìkọlù yìí kan náà, àwọn akẹ́kọ̀ọ́bìnrin méjì loí kó yọ, wọ́n kó wọ́n ròyìn ohun tí ojú wọn rí lọ́hùn-ún:
Àwọn akẹ́kọ̀ọ́bìnrin méjì tó móri bọ́ lọ́wọ́ àwọn agbésùnmọ̀mí ṣe àlàyé ohun tí ojú wọ́n rí lọ́jọ́ kan tí wọ́n lò náà.
Ọjọ́ Ajé ọ̀sẹ̀ ni àwọn agbésùnmọ̀mí ya wọ ilé ìwé àwọn obìnrin ti ìjọba tó wà ní Maga, Danko ní ìpínlẹ̀ Kebbi, àwọn akẹ́kọ̀ọ́bìnrin mẹ́ẹ̀dọ́gbọ̀n ni wọ́n kó lọ tí wọ́n sì tún ṣekú pa ọ̀gá iléèwé náà; Hassan Makuku.
Àwọn òbí àti olùkọ́ ti pàdé láti mọ bí wọn yóò ṣe rí àwọn ọmọ náà. Láti ìgbà ìṣẹ̀lẹ̀ náà ni ìlú náà ti kan gógó, àwọn aráàlú kóra jọ wọ́n sì ń gbìyànjú ipá wọn lórí rírí àwọ́n ọmọ náà.
Ipa ìjọba:
Ààrẹ Bola Ahmed Tinubu ti pàṣẹ fún àwọn ológun láti wá àwọn ọmọ náà jáde, ìròyìn padà tẹ̀ wá lọ́wọ́ pé àwọn agbésùnmọ̀mí ti dá àwọn ológun náà lọ́nà wọ́n sì ti fi ìbọn ṣe wọ́n léṣe báyìí.
Ṣé wọ́n fẹ́ pa kìrìsìtẹ́nì run ni?
Ọ̀gá àgbà ilé iṣẹ́ ológun ilẹ̀ wa; Olufemi Oluyede ti fèsì sí ọ̀rọ̀ tó ń jà ràìnràìn láti ọjọ́ mélòó pé ìfẹ̀míṣòfò pàápàá àwọn ẹlẹ́sìn kìrìsìtẹ́nì ń ṣẹlẹ̀ ní Nàìjíríà. Olufemi wí pé irọ́ tó jìnnà sí òótọ́ ni èyí, ìgbésùnmọ̀mí ni ó ń Nàìjíríà fínra kìí ṣe ìfẹ́mìí-kìrìsìtẹ́nì-ṣòfò.
Ọ̀rọ̀ yìí ni ọ̀gá àgbà ológun titun fọ̀ ní èsì sí ọ̀rọ̀ tí Ààrẹ orílẹ̀-ède Amẹ́ríkà; Donald Trump sọ pé wọ́n ń pa àwọn kìrìsìtẹ́nì ní Nàìjíríà.
Olufemi wí pé kò sí ọ̀rọ̀ nínú ọ̀rọ̀ Trump yìí, ìgbésùnmọ̀mí ni ó wà ní Nàìjíríà kìí sì í ṣe ohun titun, ó ti pẹ́ tó ti ń bá Nàìjíríà fínra.
Àwọn ológun ń ṣiṣẹ́ takuntakun láti kojú ìgbésùnmọ̀mí yìí tọ̀sàn tòru. Láìpẹ́ yìí ni Ààrẹ Bola Ahmed Tinubu ṣe àtúntò ẹ̀ka ètò ààbò, nítorí kí ètò ààbò ó le nípọn náà ni ààrẹ ṣe yan àwọn tó kájú òṣùwọ̀n sípò a ó sì borí láìpẹ́.
Ìgbésùnmọ̀mí kìí ṣe ìṣòro Nàìjíríà nìkan, gbogbo àgbáyé ló ń kojú rẹ̀ kí ẹ yé fi ẹnu àbùkù pe ti Nàìjíríà – èyí ni àwọn ọ̀rọ̀ tí Olufemi Oluyede sọ nípa ipò ààbò orílẹ̀-ède wa Nàìjíríà.
Wàyí o, ààrẹ Bola Ahmed Tinubu ti fi wá lọ́kàn balẹ̀ pé kò ní máa rí bẹ́ẹ̀ lọ o:
Ààrẹ orílẹ̀-ède wa Nàìjíríà; Bola Ahmed Tinubu ti ṣe ìlérí fún gbogbo ọmọ Nàìjíríà pé kí wọn ó lọ fi ọàn balẹ̀, òun yóò jẹ àwọn agbésùnmọ̀mí run tí éégún wọn ò tún ní ṣẹ́ nílẹ̀ yìí mọ́.
Ààrẹ ní òun yóò bèèrè fún ìrànlọ́wọ́ àwọn adarí àgbáyé láti jẹ́ kí èyí ó wá sí ìmúṣẹ.
Ààrẹ sọ èyí lẹ́yìn tí ààrẹ orílẹ̀-ède Amẹ́ríkà; Donald Trump ṣe ìkìlọ pé bí ìjọba Nàìjíríà kò bá gbógun ti àwọn agbésùnmọ̀mí, òun yóò wá pa wọ́n fúnra òun.
Ààrẹ Bola Ahmed Tinubu wí pé òun yóò ṣiṣẹ́ ní ìfọwọ́sowọ́pọ̀ pẹ̀lú àwọn adarí àgbáyé láti gbógun ti àwọn agbésùnmọ̀mí náà ní èyí tó wà ní ìbámu pẹ̀lú àfojúsùn Renewed Hope Agenda tí yóò sọ Nàìjíríà di ìlú ọlọ́lá àti ọlọ́rọ̀.
Ààrẹ wí pé kí àwọn ọmọ Nàìjíríà ó wà ní ìrẹ́pọ̀ àti ìṣọ̀kan, kí wọn ó sì fi ọkàn balẹ̀ pé ìgbésùnmọ̀mí yóò di ohun àmúpìtàn láìpẹ́.
