Méjì nínú àwọn ilé ìtajà ìgbàlódé tí ọ̀rọ̀ náà kàn ti fèsì, ilé ìtajà Rennie àti So Rite tọrọ àforíjìm lọ́wọ́ àwọn oníbàárà nígbà tí àwọn yòókù kọ̀ láti fèsì.
Christain; adarí ilé ìtajà Rennie tọrọ àforíjìn lọ́wọ́ àwọn oníbàárà wọn, ó wí pé kìí ṣe àṣà wọn láti ta àwọn ọjà tí gbèdéke ọjọ́ wọn ti ré kọjá, èyí tí wọ́n bá lórí igbá wọn wáyé bẹ́ẹ̀ ni.
A mọ̀ pé irú àwọn ọjà báyìí le fa àìlera fún àwọn èèyàn ó sì léwu gidi àti pé fin kò gbà wá láyè láti ta ọjà tó ti ré kọjá kò sì sí nínú ìṣe wa nílé ìtajà wa.
A ti gbé ìgbìmọ̀ abẹ́nú dìde láti wádìí bí àwọn ọjà tí wọ́n bá lórí igbá wa náà ṣe jẹ́, n ó ṣiṣẹ́ pẹ̀lú ìgbìmọ̀ yìí láti mọ bí àwọn ọjà náà ṣe rápálá dé orí igbá wa.
Awọn òṣìṣẹ́ mẹ́ta la gbà fún ṣíṣe àyẹ̀wò gbèdéke ọjọ́ àwọn ọjà tí wọn kò sì ní iṣẹ́ mìíràn, bí irú èyí bá wá ṣẹlẹ̀, dandan ni kí wọn ó ṣe àlàyé bí ó ṣe jẹ́.
Mo tọrọ àforíjìn lórúkọ ilé ìtajà Rennie, a ó ríi dájú pé irú èyí kò wáyé mọ́. Èyí ni àwọn ọ̀rọ̀ tí Christain sọ.
Ilé ìtajà So Rite náà fèsì pé àwọn yóò ṣe ìwádìí ìjìnlẹ̀ lórí ẹ̀sùn yìí àwọn yóò sì fi gbogbo òṣìṣẹ́ tí ajere rẹ̀ bá ṣí mọ́ lórí jófin.
Etim; ẹni tó jẹ́ olùṣirò àgbà ilé ìtajà náà wí pé ọ̀gá àgbà kò sí ní ìlú báyìí, ó rin ìrìn àjò lọ sí òkè òkun àmọ́ ó ti pàṣẹ kí àwọn ó bẹ̀rẹ̀ ìwádìí lórí ìṣẹ̀lẹ̀ náà.
A kò fi ọwọ́ yẹpẹrẹ mú ọ̀rọ̀ gbèdéke ọjọ́ ọjà nítorí a mọ̀ dájú pé ó le pa ìlera àwọn èèyàn lára.
A ó ṣe ìwádìí fínní, alámòójútó ẹ̀ka tí wọ́n ti bá àwọn ọjà náà ni yóò ṣe ẹ̀kúnrẹ́rẹ́ àlàyé bí ó ṣe jẹ́.
Àwọn òṣìṣẹ́ ìjọba a máa wá ṣe àyẹ̀wò ilé ìtajà wa wọn kò sì bá irú rẹ̀ lórí igbá wa rí.
A fi dá gbogbo ẹ̀yin oníbàárà wa lójú pé irú rẹ̀ kò ní wáyé mọ́ – Etim lórúkọ ilé ìtajà So Rite.
Àwọn ilé ìtajà yòókù tí ọ̀rọ̀ náà kàn kò fèsì, wọn kò gbé aago wọn kò sì fèsì sí àwọn àtẹ̀jíṣẹ́ gbogbo.
Bákan náà lọmọ ṣorí ní ìpínlẹ̀ Anambra:
Ọwọ́ àwọn ọlọ́pàá ìpínlẹ̀ Anambra ti tẹ àwọn èèyàn kan tí wọ́n ní ilé iṣẹ́ ìpọntí ayédèrú ẹlẹ́rìndòdò ní agbègbè Okpoko ní ìjọba ìbílẹ̀ Ogbaru, ìpínlẹ̀ Anambra.
Òjìjì ni àwọn ọlọ́pàá kán lu ilé iṣẹ́ náà tí wọ́n sì bá ọ̀pọ̀lọpọ̀ àwọn ọtí ẹlẹ́rìnròdò tí orúkọ rẹ̀ ń jẹ́ Iyi Obeleagu, afurasí kan ti wọ́n bá nílé iṣẹ́ náà ti wà ní àhámọ́ báyìí.
Tochukwu Ikenga; ẹni tó jẹ́ alukoro fún ilé iṣẹ́ ọlọ́pàá ìpínlẹ̀ Anambra ló fi ọ̀rọ̀ yìí léde pé ẹni tó ni ilé iṣẹ́ náà kò gba àṣẹ lọ́wọ́ àjọ NAFDAC tó fi ń pọn ọtí náà fún àwọn èèyàn mu.
Ilé iṣẹ́ ọlọ́pàá wí pé ọtí Iyi Obeleagu yìí léwu fún ìlera tọmọdétàgbà.
Kọ́míṣọ́nà ọlọ́pàá ìpínlẹ̀ Anambra; Ikioye Orutugu ti pàṣẹ kí àwọn ọlọ́pàá ó wádìí ọ̀rọ̀ náà délẹ̀.
Bákan ni ó ṣe ìkìlọ̀ fún àwọn tí wọ́n ní irú àwọn ilé iṣẹ́ báyìí láti ki ọwọ́ ọmọ wọn bọ asọ nítorí pé ilé iṣẹ́ ọlọ́pàá yóò fi ojú wọn winá òfin bí ọwọ́ bá tó wọn.
Ọ̀rọ̀ náà tàbùkù àjọ NAFDAC:
Mariam Kuranga; ẹni tó jẹ́ aṣèwádìí oúnjẹ bu ẹnu àtẹ́ lu àjọ NAFDAC pé lábẹ́ igi imú wọn ni àwọn ọjà báyìí ti gba gbogbo ilé ìtajà kan, Mariam ṣe àfiwé àjọ NAFDAC gẹ́gẹ́ bíi ajá tó ń gbó àmọ́ tí kò le bu èèyàn jẹ.
Ọ̀rọ̀ Mariam tẹ̀síwájú pé àwọn ilé iṣẹ́ omi inú ọ̀rá ni àjọ NAFDAC ń lé kiri tí àwọn ilé ìtajà ìgbàlódé sì ń ta májèlé fún àwọn èèyàn nígboro.
Bí a bá wọ àwọn ilé ìtajà, ọ̀pọ̀ àwọn ohun mímu àti jíjẹ ni kò ní òǹkà ìforúkọsílẹ NAFDAC tí yóò fi hàn pé kò léwu, síbẹ̀ àjọ NAFDAC kò ṣe nǹkankan síi.
Kuranga wí pé àwọn mìíràn a máa ha nọ́ḿbà kan kúrò nínú déétì ọjà náà láti rú u mọ́ oníbàárà lójú.
Gbogbo àwọn ọjà yìí ló le fa àisàn sí àgọ́ ara tí yóò sì pa ìlera àwọn èèyàn lára.
Odunayo Sunday, ẹni tó jẹ́ onímọ̀ oúnjẹ náà ṣe àlàyé pé àwọn ọjà báyìí ti di májèlé nítorí pé àwọn èròjà inú rẹ̀ kò ní ṣe ara lóore mọ́, wọn yóò fa àwọn kòkòrò àìfojúrí sínú ara.
Àwọn kòkòrò yìí ni yóò ṣarajọ fa àisàn tàbí ba àwọn ẹ̀yà ara jẹ́.
Arábìnrin Odunayo rọ àwọn èèyàn láti yẹra fún àwọn ọjà ẹ̀dínwó kí wọn ó sì máa wo gbèdéke ọjọ́ àwọn ọjà tí wọ́n bá fẹ́ rà.
Àjọ NAFDAC náà fèsì:
Lórí ọ̀rọ̀ tó ń jà ràìnràìn nípa àwọn ilé ìtajà tó ń ta àwọn ‘májèlé’ fún àwọn èèyàn àti ẹ̀sùn tí wọ́n fi kan àjọ NAFDAC pé wọn kò ṣe iṣẹ́ wọn bí iṣẹ́, àjọ NAFDAC ti fèsì pé àwọn kò le mọ gbogbo ohun tí ó ń lọ nítorí àwọn kò le sí níbi gbogbo.
Sayo Akintola; ẹni tó jẹ́ adarí àtẹ̀jáde àjọ NAFDAC ṣe àlàyé pé àwọn kò le lọ sí ibi gbogbo, ohun tó yẹ ni kí àwọn èèyàn ó kàn sí àwọn bí wọ́n bá ṣe àkíyèsí irú nǹkan báyìí.
Akintola wí pé lórí àbábọ̀ ẹ̀ka tó ṣe ọ̀fintótó yìí, àwọn yóò nílò ọjà tí wọ́n rà nílé ìtajà náà gẹ́gẹ́ bíi àrídájú, wọn yóò kó àwọn ọjà náà kúrò wọn yóò sì tún fi òfin gbé àwọn aláṣẹ ilé ìtajà náà.
Nípa pé a kò mọ iṣẹ́ wa bíi iṣẹ́, irọ́ tó jìnnà sí òótọ́ ni, Akintola wí pé àwọn ń ṣe iṣẹ́ wọn dé ojú àmì àwọn sì mú iṣẹ́ wọn lókùnkúndùn.
Kò sí bí a ṣe le mọ gbogbo àwọn ilé ìtajà tó wà nígboro nítorí pé wọn ò níye, àwọn aráàlú náà ni yóò máa ran àwọn lọ́wọ́.
