Gómìnà àdìbòyàn ti ìpínlẹ̀ Rivers; Siminalayi Fubara ti padà sí orí ipò rẹ̀ lónìí lẹ́yìn oṣù kẹfà tí ààrẹ Bola Ahmed Tinubu ti dá a dúró.
Ààrẹ Bola Ahmed Tinubu fúnra rẹ̀ ló kéde pé òun ti dá Fubara padà sí orí ipò rẹ̀ kí ìjọba ológun tó wà nípò láti ọjọ́ kejìdínlógún, oṣù Ẹrẹ́nà ó kúrò lórí àpèrè.
Ààrẹ wí pé ‘inú mi dùn láti dá Fubara padà sí ipò rẹ̀, gbogbo àwọn ẹ̀rí tó tẹ̀ mí lọ́wọ́ fi hàn pé àgbọ́yé ti wà láàrin àwọn tó ń ṣe ìjọba ìpínlẹ̀ Rivers náà, ó sì yẹ ki wọn ó padà sí ipò.
Èyí jẹ́ ìgbà ọ̀tun fún mi ó sì tún jẹ́ àṣeyọrí gbóògì fún gbogbo wa, kò sí ìdí tí ìjọba pàjáwìrì fi gbọdọ̀ lé ọjọ́ kan síi lóṣù mẹ́fà tí mo dá láti ìbẹ̀rẹ̀.
Mo pa á láṣẹ fún Admiral Ibok-Ete Ibas láti kúrò ní ipò adarí náà kí àwọn tí a dìbò yàn sì bọ́ sí ipò wọn lọ́jọ́ kejìdínlógún, oṣù Ọwẹ́wẹ̀.
Ṣáájú àkókò yìí ni Fubara gan-an ti sọ pé òun kò tilẹ̀ fẹ́ padà sí ipò náà mọ́, ó ní òun yọ̀ǹda fún wọn. Bí ó ṣe jẹ́ rèé:
Gómìnà ìpínlẹ̀ Rivers tí ààrẹ Bola Ahmed Tinubu júwe ilé fún; Siminalayi Fubara ti sọ̀rọ̀ nípa ìhà tó kọ sí ìpadàsípò náà báyìí. Ó wí pé bí wọ́n bá fi dá tòun nìkan, òun kò tilẹ̀ fẹ́ padà sí ipò náà mọ́ nítorí pé ẹ̀mí òun ti ṣí kúrò nínú ìṣèjọba náà àmọ́ àwọn tí wọ́n dúró ti òun lásìkò yìí tí wọ́n sì ń sa ipá wọn láti ríi pé òun padà sípò ni yóò mú kí òun ó padà bí àsìkò bá tó.
Níbi ayẹyẹ ìrántí Alàgbà Edwin Kiagbodo Clark tó wáyé ní àná; ọjọ́ Àìkú ni Fubara ti sọ èyí. Ilé ìjọsìn Royal house of grace ni ayẹyẹ náà ti waye.
Ó wí pé ìgbà àkọ́kọ́ rèé tí òun máa sọ̀rọ̀ ní gbangba láti ìgbà tí wọ́n ti dá òun dúró nínú oṣù Ẹrẹ́nà. Fubara ṣe àlàyé pé kí àwọn èèyàn ó má ṣe sọ ayẹyẹ náà di àpéjọ olóṣèlú, kí wọn ó jẹ́ kó mọ ní ìrántí Alàgbà Edwin Kiagbodo Clark.
Fubara gúnlẹ̀ ọ̀rọ̀ rẹ̀ síbi pé òun ní ìfọ̀kànbalẹ̀ lásìkò yìí ju ìgbà tí òun wà nípò Gómìnà lọ.
Ọ̀rọ̀ yìí jáde lẹ́yìn tí Nyesom Wike; ẹni tí òun àti Fubara jọ ní èdè àìyedè lásìkò gbogbo wàhálà náà wí pé inú òun dùn láti jẹ́ ọ̀kan nínù ìgbìmọ̀ ìṣèjọba ààrẹ Bola Ahmed Tinubu. Ìròyìn náà kà báyìí pé Mínísítà fún olú ìlú wa Àbújá, ẹni tó ti fìgbà kan jẹ́ Gómìnà ìpínlẹ̀ Rivers; Nyesom Wike ṣe àlàyé ọ̀rọ̀ kan pé inú òun máa ń dùn ni ní gbogbo ìgbà tí òun bá rántí pé àwọn èèyàn mọ̀ pé òun jẹ́ ọ̀kan gbòógì nínú ìṣejọba Ààrẹ Bola Ahmed Tinubu.
Bí éégún ẹni bá jóo re, orí a yá atọ́kùn ni ọ̀rọ̀ náà jẹ́ fún Nyesom Wike, gbogbo bí ààrẹ Bola Ahmed Tinubu ṣe ń dábírà lọ́tùn-ún, tó ń ṣe bẹbẹ lósì tí ìlú ń dùn yùngbà, tí eku ń ké bí eku, tì ẹyẹ ń ké bíi ẹyẹ, tí ọmọnìyàn náà sì ń fọhùn bíi ọmọnìyàn ló wú Wike lórí tó fi sọ pé inú òun dùn láti jẹ́ ọ̀kan nínú ìṣejọba yìí.
Nyesom Wike sọ ọ̀rọ̀ yìí lẹ́yìn àbẹ̀wò tó ṣe sí àwọn ojú ọ̀nà tí ìjọba ń ṣe lọ́wọ́ ní Abuja lọ́jọ́ Àbámẹta, ọjọ́ kẹwàá, oṣù Èbìbí. Ó wi pé ìgbé ayé onípele gíga ni ààrẹ Bola Ahmed Tinubu ti pèsè fún àwọn ará Abuja, ètò àti àlàkalẹ̀ Renewed hope; ìrètí ìsọdọtun tí ààrẹ̀ gbé kalẹ̀ ń ṣiṣẹ́ tí a rán an.
Ọ̀rọ̀ Wike tẹ̀síwájú pé òun ti sọ tẹ́lẹ̀ ṣáájú àsìkò yìí pé àìní aṣáájú rere ni ìṣòro wa ní ìlú yìí, ṣé ẹ̀yin náà wá ríi báyìí pé ibi tí aṣáájú rere bá ti wà, gbogbo mùtúmùwà ni yóò jẹ adùn ibẹ̀. Ààrẹ Bola Ahmed Tinubu ti fi àpẹrẹ olórí rere lélẹ̀ ó sì ń wá ìdùnú fún gbogbo àwọn èèyàn.
Wike wí pé òun kò rí ìdí tí èèyan kan ó fi sọ pé ààrẹ Tinubu ò ṣe tó àfi bí ẹni náà bá fọ́ lójú inú tì kò tún fi tòde rína tàbí ki irú ẹni bẹ́ẹ̀ o jẹ́ alábòsí tí kò fẹ́ràn nǹkan ire. Wike wí pé inú òun dùn pé ìlérí ìgbé ayé ìrọ̀rùn tí àwọn ṣe, àwọn ti mú un ṣẹ.
Kò tán síbẹ̀ o, Nyesom Wike wí pé nígbà ti ààrẹ bá ń ṣe àjọyọ̀ ọdún kejì nípò, àwọn yóò sí aṣọ lójú éégún àwọn àkànṣe iṣẹ́ ribiribi tó ti gbé ṣe, lára rẹ̀ ni gbọ̀ngán ìgbàlódé Abuja àti ilé iṣẹ́ omi tí wọ́n ṣẹ̀ṣẹ̀ dá sílẹ̀.
Wike parí ọ̀rọ̀ rẹ̀ síbi pé ní ọjọ́ àjọ̀dún ọdún kejì ààrẹ ni a ó rí ọ̀pọ̀lọ́pọ̀ àwọn àkànṣe iṣẹ́ tí ààrẹ ti gbé ṣe.
Láàrin àsìkò yìí ni ààrẹ Bola Ahmed Tinubu ṣe ìpàdé pẹ̀lú Fubara àti Wike ní Abuja tí wọ́n sì gbé àwọn àlàkalẹ̀ kalẹ fún un báyìí:
Ààrẹ Bola Ahmed Tinubu ti ṣe ìpàdé ìdákọ̀kọ̀ pẹ̀lú Gómìnà ìpínlẹ̀ Rivers tí ó júwe ilé fún; Siminalayi Fubara àti mínísítà fún Olú ìlú wa; Nyesom Wike.
Ìpàdé yìí kò yọ àwọn alẹ́nulọ́rọ̀ ìpínlẹ̀ Rivers sílẹ̀, gbogbo wọn ló péjúpésẹ̀.
Kókó ìpàdé náà ni bí wọn yóò ṣe yanjú aáwọ̀ tó wà láàrin Fubara àti Wike.
Ohun tí a gbọ́ ni pé Tinubu bá Fubara ṣe àdéhùn pé òun yóò dáa padà sípò Gómìnà ìpínlẹ̀ Rivers náà bí ó bá gbà láti ṣiṣẹ́ fún òun nínú ìdìbò ọdún 2027. Bákan náà ni pé Wike ni yóò yan àwọn alága ìjọba ìbílẹ̀ gbogbo, paríparí rẹ̀ ni pé Fubara kò ní díje dupò sáà kejì.
A kò tíì le sọ bí Fubara bá fi ara mọ́ gbogbo nǹkan yìí àmọ́ a rí àwọn àwòrán tí wọ́n jọ yà lẹ́yìn ìpàdé náà.
Ní báyìí tí Fubara ti padà sípò, á jẹ́ pé ó ti faramọ́ àwọn àlàkalẹ̀ tí wọ́n yàn fún un nìyẹn.
A kí gbogbo àwọn ọmọ ìpínlẹ̀ Rivers kú oríire.
