Arákùnrin kan ni ikú ré kété lórí rẹ̀ lẹ́yìn tí ó há sínú kànǹga àmọ́ tí wọ́n ríi yọ jáde láàyè.
A gbọ́ pé ẹni ọdún mẹ́rìndínlọ́gọ́ta ni ọkùnrin náà, agbègbè Ikotun ní ìpínlẹ̀ Èkó sì ni ìṣẹ̀lẹ̀ náà ti ṣẹ̀.
Ọkùnrin yìí ń ṣiṣẹ́ nínú kànǹga náà lọ́wọ́ ló fi di pé ó há sínú rẹ̀, kànǹga yìí sì jìn níwọ̀n ọgọ́rin ẹsẹ̀ bàtà.
Maria Fadairo; ẹni tó jẹ́ ọ̀gá àgbà ní ẹ̀ka LSFRS ló sọ ọ̀rọ̀ yìí di mímọ̀. Fadairo wí pé àwọn yọ ọkùnrin náà jáde lẹ́yìn tí àwọn gba ìpè pàjáwìrì náà.
Àwọn òṣìṣẹ́ aláàbò gbéra láti Ejigbo lọ sí ibi ìṣẹ̀lẹ̀ náà ní ojúlé kejìlá, òpópónà Aiyeola, Molad, Ikotun. Wọ́n bá ọkùnrin náà níbi tó há sí ní pàlápàlá kànǹga náà.
Maria Fadairo wí pé àìlákàsí ló mú kí ọkùnrin náà ó há nítorí pé kò ṣe àwọn ohun ìdáàbò bò tó yẹ kó ṣe nídìí iṣẹ́ náà. Ó wá rọ àwọn oníṣẹ́ ọwọ́ láti máa ṣètò ààbò nídìí iṣẹ́ wọn.
Obìnrin kan kú sínú kànǹga ní Ijegun.
Ìròyìn tó tẹ̀ wá lọ́wọ́ láti Ijegun, ìpínlẹ̀ Èkó kò ṣẹnure rárá. A gbọ́ pé arábìnrin kan ló kó sínú kànǹga kan ní iwájú ilé tí wọ́n ń kọ́ lọ́wọ́ ní Ijegun, ìpínlẹ̀ Èkó.
Ọgbọ̀njọ́, oṣù Okúdù tó kọjá yìí ni obìnrin náà kó sínú kànǹga yìí., odidi ọjọ́ mẹ́wàá gbáko ló lò nínú rẹ̀ kí wọ́n tó wá yọ òkú rẹ̀ láàárọ̀ yìí. Wọ́n ní àwọn òṣìṣẹ́ ìṣẹ̀lẹ̀ pàjáwìrì kò ní irinṣẹ́ tí wọ́n le fi yọ ọ́ nítorí pé kànǹga náà jìn ní ìwọ̀n ẹsẹ̀ bàtà àádọ́san-án.
Ilé iṣẹ́ panápaná ìpínlẹ̀ Èkó sọ̀rọ̀ láti ẹnu alukoro wọn; Maria Fadairo pé àwọn gba ìpè pájáwìrì náà nípa obìnrin kan tó kó sínú kànǹga ní iwájú ilé tí wọ́n ń kọ́ lọ́wọ́ tó wà ní òpópọ́nà Abuba Anthony, ibùdókọ̀ Obalagbe nítòsí ilé ìtura Fadeko.
Wọ́n ní awọn ta mọ́ra débẹ̀ àmọ́ kànǹga náà jìn gan-an ní ìwọ̀n ẹsẹ̀ bàtà àádọ́sàn-án (170 ft) ní èyí tó gba kí àwọn ó kàn sí àwọn ẹ̀ka mìíràn.
Odidi ọjọ́ mẹ́wàá ló gbà wọ́n láti rí òkú obìnrin náà yọ jáde. Wọ́n ní àwọn bá àwọn ẹbí rẹ̀ kẹ́dùn àwọn sì ti bẹ̀rẹ̀ ìwádìí lórí ẹni tó ni ilé náà.
ILÉ ẸJỌ́ GÍGA ÌPÍNLẸ̀ BAYELSA DÁJỌ́ IKÚ FÚN ÀWỌN TÓ PA AJAYI NÍ ỌDÚN 2001.
Ilé ẹjọ́ gíga tó fìkàlẹ̀ sí ìpínlẹ̀ Bayelsa ti dájọ́ ikú fún àwọn mẹ́rin tí wọ́n ṣekú pa Olanrewaju Ajayi ní ọdún 2001.
A gbọ́ pé lọ́jọ́ náà lọ́hùn-ún, àwọn mẹ́rin yìí dá Ajayi tó jẹ́ awakọ̀ Taxi dúró ní Agudama-Epie ní Yenagoa pé kó gbé àwọn lọ sí Onne ní ìpínlẹ̀ Rivers. Nígbà tí wọ́n dé Okope ní Rivers, ọ̀kan nínú wọn ní òun fẹ́ ṣẹ̀yọ́ kí Ajayi ó dúró, bí ó ṣe dá ọkọ̀ dúró ni wọ́n fún un lọ́rùn, wọ́n so okùn mọ́ ọn lọ́rùn wọ́n sì gún un pa.
Wọ́n wọ́ òkú Ajayi jùnù wọ́n sì lọ ta ọkọ̀ rẹ̀ ní Uyo ní ìpínlẹ̀ Akwa-Ibom ní ẹgbẹ̀ún lọ́nà ọ̀tàlérinwó-ó-dín-mẹ́wàá náírà (#450,000).
Adájọ́ Patience Ziofa Diri wí pé kò sí aníàní lẹ́yìn gbogbo atótónu àti àwíjàre pé àwọn mẹ́rin náà jẹ̀bi ìdigunjalè àti ìpànìyàn, ó wá pàṣẹ pé kí wọn ó yẹgi fún wọn.
WỌ́N TI GÚN AUWAL LỌ́BẸ PA NÍ ÌPÍNLẸ̀ KEBBI.
Ọkùnrin kan, ẹni ọgbọ̀n ọdún tí wọ́n pe orúkọ rẹ̀ ní Auwal Umaru ni wọ́n ti gún pa nínú ìjà kan tó wáyé láàrin òun àti ọ̀rẹ́ rẹ̀.
Abúlé Katami ní ìjọba ìbílẹ̀ Silami ni èyí ti ṣẹlẹ̀. A gbọ́ pé ìjà kan bẹ́ sílẹ̀ láàrin Umaru àti ọ̀rẹ́ rẹ̀ kan tí ìyẹn sì gún un lọ́bẹ ní ọrùn pa tó sì sá lọ.
Àwọn èèyàn ni wọ́n ránṣẹ́ pe àwọn ọlọ́pàá, nígbà tí wọ́n gbé e dé ilé ìwòsàn, àwọn dọ́kítà wí pé Umaru ti kú.
Ọwọ́ tẹ afurasí náà ó sì jẹ́wọ́ pé òun gún Umaru lọ́bẹ nígbà tí àwọn ń jà.
Ilé iṣẹ́ ọlọ́pàá ìpínlẹ̀ Kebbi fi ìdí ìṣẹ̀lẹ̀ náà múlẹ̀.
ỌKỌ̀ ÀJÀGBÉ TẸ ÀWỌN ÈÈYÀN MÉJÌ PA NÍ ÌPÍNLẸ̀ Ọ̀YỌ́.
Àwọn àgbàlagbà méjì kan tí wọ́n ń bọ̀ láti Ìbàdàn wá sí Ọ̀yọ́ ni ọkọ̀ àjàgbé eléjò ti tẹ̀ pa ní Fiditi, ìpínlẹ̀ Ọ̀yọ́.
Ẹni tí ìṣẹ̀lẹ̀ náà ṣojú rẹ̀ ṣe àlàyé fún àwọn akọ̀ròyìn pé ọkọ̀ àjàgbé náà ń pẹ́ kòtò ojú pópó sílẹ̀ ló fà á tó fi lọ kọlu àwọn méjì náà tí wọ́n wà lórí ọ̀kadà tó sì tẹ̀ wọ́n pa.
Ọkùnrin tó wa ọ̀kadà náà kú lójú ẹsẹ̀ nígbà tí obìnrin náà padà kú sí ilé ìwòsàn.
Àwọn akọ̀ròyìn kàn sí ilé iṣẹ́ tó ń mójútó ìgbòkègbodò ọkọ̀ ìpínlẹ̀ Ọ̀yọ́, adarí ilé iṣé náà; Bayode Olugbesan fìdí ìṣẹ̀lẹ̀ náà múlẹ̀, ó wí pé èèyàn kan ni òun mọ̀ pé ó ti kú báyìí, àwọn yóò ṣe àbẹ̀wò sí ilé ìwòsàn náà láti mọ ipò tí ẹnìkejì wà.
A Ó ṢE ÀTÚNṢE AFÁRÁ KEFFI LÁÀRIN ỌGBỌ̀N ỌJỌ́ – ÌJỌBA ÀPAPỌ̀.
Ìjọba àpapọ̀ ti ṣe àbẹ̀wò sí afárá Keffi tí abala rẹ̀ kan ya lulẹ̀. Wọ́n ní àwọn yóò parí àtúnṣe rẹ̀ láàrin ọgbọ̀n ọjọ́.
Mínísítà fún àkànṣe iṣẹ́; David Umahi lọ ṣe àbẹ̀wò sí afárá náà pẹ̀lú àwọn akọ́ṣẹ́mọṣẹ́ ní ọjọ́ Àìkú, Ogúnjọ́, oṣù Agẹmọ.
Ọ̀rọ̀ yìí jẹ́ mímọ̀ láti ẹnu alukoro fún ilé iṣẹ́ mínísítà náà; Mohammed Ahmed pé ìjàmbá tó wáyé ní abẹ́ afárá náà mú ẹ̀mí àwọn èèyàn méjì lọ nígbà tí ọkọ̀ àjàgbé kan tó ga ju ìwọ̀n abẹ́ afárá náà lọ há sí abẹ́ rẹ̀ tó sì fa abala kan ya lé keke maruwa kan lórí.
Ahmed wí pé mínísítà ti pàṣẹ fún ilé iṣẹ́ CGC láti yára bẹ̀rẹ̀ iṣẹ́ àtúnṣe afárá náà yóò sì gbà tó ọgbọ̀n ọjọ́.
ỌKỌ̀ ÀWỌN AKẸ́KỌ̀Ọ́ ILÉ ÌWÉ GÍGA KWARA GBANÁ LÓRÍ ÌRÌN.
Àwọn akẹ́kọ̀ọ́ ilé ìwé gíga ìpínlẹ̀ Kwara méjìdínlógún ni orí kó yọ lọ́wọ́ ikú òjijì nígbà tí ọkọ̀ wọn gbaná lójijì lórí ìrìn.
A gbọ́ pé àwọn akẹ́kọ̀ọ́ náà gbéra láti Ilorin, wọ́n ń lọ fún ìdánilẹ́kọ̀ọ́ ní Malete ni ọkọ̀ wọn gbaná lórí ìrìn. Òpópónà Shao nítòsí ibùdó àwọn ológun tó wà ní Sobi ni ọkọ̀ náà ti gbaná ní nǹkan bíi aago mẹ́jọ òwúrọ̀ ń lọ lù.
Àwọn akẹ́kọ̀ọ́ náà ráàyè sá jáde nínú ọkọ̀ náà àmọ́ ọkọ̀ náà jóná kan éérú. Àwọn panápaná náà sa ipá wọn lórí ìṣẹ̀lẹ̀ náà.
Adarí ẹ̀ka àtẹ̀jáde fún ilé iṣẹ́ panápaná ìpínlẹ̀ Kwara; Hassan Adekunle fi ìdí ìṣẹ̀lẹ̀ náà múlẹ̀ pé àwọn ta mọ́ra láti dóòlà ẹ̀mí àwọn akẹ́kọ̀ọ́ inú ọkọ̀ náà àmọ́ ọkọ̀ náà jóná kanlẹ̀ ní tirẹ̀.
ÀÀRẸ BOLA AHMED TINUBU ṢE ÀYÍPADÀ ORÚKỌ ILÉ ÌWÉ GÍGA MAIDUGURI SÍ ORÚKỌ MUHAMMADU BUHARI.
Ààrẹ Bola Ahmed Tinubu ti ṣe àyípadà orúkọ ilé ìwé gíga Maiduguri UNIMAID sí orúkọ ààrẹ àná tó dágbére fáyé; Muhammadu Buhari.
Orúkọ ilé ìwé náà titun ni Muhammadu Buhari University MBU.
Níbi àpéjọ àwọn àgbààgbà olóṣèlu tó wáyé ní Abuja lánàá, Ọjọ́bọ, ọjọ́ kẹtàdínlógún ni Ààrẹ Tinubu ṣe ìkéde yìí. Ó wí pé Buhari jẹ́ adarí tó nífẹ̀ẹ́ orílẹ̀-èdè yìí dénúdénú tó sì fi ìgbé ayé rẹ̀ sìn ín.
Ààrẹ oní ṣe àpèjúwe ààrẹ àná bíi èèyàn jẹ́jẹ́, onísùúrù, ẹni tó ṣe é fi ọkàn tán. Ó gbé ìgbé ayé ọmọlúàbí ó sì fi ayé rẹ̀ fún Ọlọ́run.
Nípa báyìí, ó pọn dandan láti ṣe àpónlé àti ìṣelọ́jọ̀ orúkọ Buhari kó má baà parun.
