ÀWỌN ỌMỌ ILÉ ÌGBÌMỌ̀ AṢOJÚṢÒFIN MÉJÌ YAPA KÚRÒ NÍNÚ ẸGBẸ́ ÒṢÈLÚ NNPP.

Àwọn ọmọ ẹgbẹ́ òṣèlú NNPP méjì tí wọ́n jẹ́ ọmọ ilé ìgbìmọ̀ aṣojúṣòfin ló ti digbádagbọ̀n wọn kúrò nínú ẹgbẹ́ òṣèlú NNPP ta kọ́sọ́ sínú ẹgbẹ́ òṣèlú APC.
Kabiru Usman ló ń ṣojú ẹ̀kun Rano mọ́ Bunkere nígbà tí Abdullahu Sani ń ṣojú ẹ̀kun Karaye mọ́ Rago, ìpínlẹ̀ Kano ni àwọn méjéèjì wà.
Agbẹnusọ fún ilé ìgbìmọ̀ aṣojúṣòfin; Tajudeen Abass ló kéde ìyapa yìí níbi ìjókòó ilé tó wáyé láàárọ̀ òní.
Bákan náà ni ọmọ ilé tó ń ṣojú ẹ̀kun Oriade/Obokun ní ìpínlẹ̀ Ọ̀ṣun; Oluwole Oke náà kéde pé òun ti darapọ̀ mọ́ ẹgbẹ́ òṣèlú APC báyìí.

Ìṣọwọ́ tí àwọn olóṣèlú fi ń darapọ̀ mọ́ ẹgbẹ́ òṣèlú APC lẹ́nu lọ́lọ́ yìí ló fà á tí àwọn oníròyìn fi pe Tinubu ní ìjì tó ń da àwọn ẹgbẹ́ òṣèlú yòókù wó.
Bí ẹ bá ń fi ọkàn bá wa lọ, kòpẹ́kòpẹ́ yìí ni Gómìnà ìpínlẹ̀ Delta àti gbogbo àwọn ẹmẹ̀wàá rẹ̀ ta kọ́sọ́ sínú ẹgbẹ́ òṣèlú APC. Ìròyìn náà kà báyìí pé Gọ́mìnà ìpínlẹ̀ Delta; Sheriff Oborevwori ti kéde ìṣípòpadà rẹ̀ láti jíjẹ́ ọmọ ẹgbẹ́ òṣèlú PDP sí ọmọ ẹgbẹ́ òṣèlú APC.
Kìí ṣe Sheriff nìkan ló yapa kúrò nínú ẹgbẹ́ òṣèlú PDP, bí ìgbín bá fà ni ó fi ọ̀rọ̀ náà ṣe, Gómìnà ìpínlẹ̀ Delta tẹ́lẹ̀rí; Ifeanyi Okowa àti gbogbo àwọn ọmọ ẹgbẹ́ òṣèlú PDP ní ìpínlẹ̀ Delta tó fi dé orí alága ìjọba ìbílẹ̀ ni wọ́n ti darapọ̀ mọ́ ẹgbẹ́ òṣèlú APC báyìí.
Ìkéde yìí wáyé ní Ọjọ́rú, ọjọ́ kẹtalélógún, oṣù Igbe ní Asaba tíí ṣe olú ìlú Delta. Ọmọ ilé ìgbìmọ̀ aṣòfin àgbà nnì; James Manager ló fi ìkéde yìí síta lẹ́yìn ìpàdé oníwákàtí mẹ́fà tó wáyé ní ilé ìjọba tó wà ní Asaba.
Aṣòfin James wí pé gbogbo àwọn ọmọ ẹgbẹ́ òṣèlú PDP ní ìpínlẹ̀ Delta pátá ló ti gbà láti darapọ̀ mọ́ ẹgbẹ́ òṣèlú APC. Tó fi dé orí agbẹnusọ fún ẹgbẹ́ òṣèlú PDP, Alága ẹgbẹ́ òṣèlú PDP, àwọn alága ìjọba ìbílẹ̀ pátá tí wọ́n jẹ́ ọmọ ẹgbẹ́ òṣèlú PDP, gbogbo wọn ló ti digbá dagbọ̀n wọn báyìí láti ré kété sínú ẹgbẹ́ òṣèlú APC.
Kọmiṣọ́nà fún ìfitónilétí ní ìpínlẹ̀ Delta; Ọ̀gbẹ́ni Aniagwu Charles náà sọ̀rọ̀ lórí ìṣípòpadà yìí, ó wí pé àwọn kò le wà nínú ọkọ̀ tó ti rì, ó di dandan kí àwọn ó ṣe àtúnṣe sí ètò ìṣejọba àwọn ní èyí tó gba kí àwọn ó ṣe ìpinnu tó nípọn bẹ́ẹ̀.
Ọ̀gbẹ́ni Charles wí pé ìpinnu yìí yóò jẹ́ kí iṣẹ́ rere ó le tẹ̀síwájú ní ìpínlẹ̀ Delta. Dídarapọ̀ mọ́ ẹgbẹ́ òṣèlú APC yóò mú kí ìdàgbàsókè àti ìlọsíwájú ó dé bá ìpínlẹ̀ Delta, ìgbé ayé àwọn ará Delta yóò di ọ̀tun, ìpínlẹ̀ Delta ó wá di ìpínlẹ̀ tí yóò ṣe máa mú yangàn láàrin àwọn ẹgbẹ́ rẹ̀.
Ọ̀rọ̀ ọ̀gbẹ́ni Charles tẹ̀síwájú pé àwọn aṣáájú ló ṣe ìpinnu náà, ó sì di dandan kí gbogbo àwọn ìsọmọgbè ó tẹ̀lé e nítorí pé ìdàgbàsókè ìpínlẹ̀ Delta ló jẹ gbogbo àwọn lógún.

Ẹgbẹ́ òṣèlú APC kò mú ọ̀rọ̀ ìdarapọ̀ yìí ní kékeré rárá, kódà alága ẹgbẹ́ náà ti wí pé gbogbo àwọn olóṣèlú yòókù ni yóò darapọ̀ mọ́ ẹgbẹ́ òṣèlú APC báyìí tó já sí pé kò ní ṣẹ́ku ẹyẹ ló kéré jù nínú àwọn ẹgbẹ́ òṣèlú yòókù.
Níbi ayẹyẹ ìgbaniwọlé tí wọ́n ṣe fún Gómìnà ìpínlẹ̀ Delta àti ikọ̀ rẹ̀ ni Ganduje ti sọ ọ̀rọ̀ náà. Ìròyin náà kà báyìí pé:
Abdullai Ganduje; ẹni tó jẹ́ alága ẹgbẹ́ òṣèlú APC sọ̀rọ̀ níbi ìgbaniwọlé Gómìnà ìpínlẹ̀ Delta àti àwọn ẹmẹ̀wàá rẹ̀ tó wáyé lọ́jọ́ Ajé pé àwọn Gómìnà yòókù náà ṣì ń bọ̀ wá darapọ̀ mọ́ ẹgbẹ́ òṣèlú APC.
Igbákejì ààrẹ; Kashim Shettima ló gba Gómìnà Sherif Oborovwori àti àwọn ikọ̀ rẹ̀ wọlé sínú ẹgbẹ́ òṣèlú APC, ó kí wọn káàbọ̀ ó sì ṣe wọ́n ní pẹ̀lẹ́.
Níbi ètò náà ni Gómìnà Sheriff ti ṣe àlàyé ìdí tí òun àti ikọ̀ rẹ̀ fi darapọ̀ mọ́ ẹgbẹ́ òṣèlú APC. Ó wí pé ààrẹ Bola Ahmed Tinubu ti fi ọ̀pọ̀lọpọ̀ ìfẹ́ hàn sí àwọn ní ìpínlẹ̀ Delta, kò sì sí bí àwọn ṣe le fi ìfẹ́ náà padà bí àwọn bá wà nínú ẹgbẹ́ òṣèlú alátakò ni àwọn ṣe darapọ̀ mọ́ ọn nínú ẹgbẹ́ òṣèlú rẹ̀ kí ìfẹ́ le máa lọ bó ti yẹ.
Gómìnà Sheriff wí pé òun kò ní ìgbàgbọ́ nínú Festus Keyamo àti àwọn ọmọ Agege yòókù, ó ní òun ni aṣáájú ìpínlẹ̀ Delta, ibi tí òun bá sì lọ ni àwọn yòókù ó lọ pẹ̀lú òun.
Gómìnà Sheriff rọ àwọn Gómìnà yòókù tí wọ́n wà nínú ẹgbẹ́ òṣèlú alátakò láti darapọ̀ mọ́ ẹgbẹ́ òṣèlú APC.
Ọ̀rọ̀ Ganduje.
Bí éégún ẹni bá jóo re ni Ganduje fi ọ̀rọ̀ náà ṣe, ó lu Sheriff lọ́gọ enu fún ìgbésẹ̀ akin náà ó sì gbé oríyìn fún ààrẹ Bola Ahmed Tinubu pé ó jẹ́ aṣáájú rere.
Nínú ọ̀rọ̀ rẹ̀ náà ló ti kí àwọn Gómìnà tí wọ́n jẹ́ ọmọ ẹgbẹ́ òṣèlú APC fún akitiyan wọn nínú ìdàgbàsókè orílẹ̀-èdè yìí.

Nígbà tí wọ́n wá sọ pé ẹgbẹ́ òṣèlú APC nìkan ni yóò wà tí wọ́n sì ń gbé ìgbésẹ̀ àti sọ ìdìbò di dandan, kín ni yóò wá ṣẹ́lẹ̀?
Òní yìí ni àwọn ọmọ ilé ìgbìmọ̀ aṣojúṣòfin jókòó lórí àbá tí yóò sọ́ ìbò dídì di dandan fún gbogbo àwọn ọmọ orílẹ̀-ède Nàìjíríà, kódà àbá náà ti wà ní ìpele kejì báyìí. A gbọ́ pé Ilé ìgbìmọ̀ aṣojúṣòfin ti bẹ̀rẹ̀ ìgbésẹ̀ tí yóò sọ ìbò dídì di dandan fún gbogbo àwọn ọmọ orílẹ̀-èdè Nàìjíríà. Wọ́n ní kò sí ààyè fún mọ́ fún jíjókòó sílé lọ́jọ́ ìdìbò. Bákan náà ni ìjìyà tó nípọn yóò wà fún ẹni tí kò bá jáde dìbò.
Àbá yìí ti wà ní ìpele kejì báyìí, ó ku kí wọn ó parí ìjíròrò rẹ̀ kí wọ́n sì fi òǹtẹ̀ lù ú. Agbẹnusọ fún ilé ìgbìmọ̀ aṣojúṣòfin; Tajudeen Abass ló ń ṣe pẹ́pẹ́fúrú lórí bí àbá yìí yóò ṣe di àṣẹ.

Facebook Comments Box

Tags: #iweiroyinyoruba #ìwéròyìnyorùbá #NewsOnline Ìròyìn Tó Gbòde Iwe Iroyin Yoruba news politics trending

Trending Tags

Trending Tags

ÀWỌN ỌMỌ ILÉ ÌGBÌMỌ̀ AṢOJÚṢÒFIN MÉJÌ YAPA KÚRÒ NÍNÚ ẸGBẸ́ ÒṢÈLÚ NNPP.

Ẹgbẹ́ òṣèlú APC ló ta lẹ́nu báyìí.

Discussion about this post

Recommended

Popular News

Newsletter

Category

Site Links

About Us

Welcome Back!

Create New Account!

Retrieve your password