Àwọn ajàfẹ́tọ̀ọ́mọnìyàn ti kóra jọ bu ẹnu àtẹ́ lu bí àwọn ọlọ́pàá ṣe fín tajútajú mọ́ àwọn olùwọ́de ìfẹ̀hónúhàn àti bí wọ́n ṣe mú nínú wọn sí àtìmọ́lé.
Àwọn ará Makoko, Oworonshoki, Owode onirin àti Oko baba kóra jọ wá sí Ikeja láti ṣe ìwọ́de ìfẹ̀hónúhàn lórí bí ìjọba ṣe wó ilé wọn. Wọ́n kóra jọ ní abẹ́ afárá Ikeja wọ́n sì kọ́wọ̀ọ́ rìn lọ sí ilé ìgbìmọ̀ aṣòfin Èkó tó wà ní Alausa.
Oríṣì àkọlé bíi ‘Èkó kìí ṣe fún olówó nìkan, ẹ kò le kọ́ ilé ìgbàlódé sí orí ẹ̀jẹ̀ wa, a fẹ́ ìdájọ́ òdodo, ẹ yé pa wá àti àwọn mìíràn bẹ́ẹ̀’ ni wọ́n gbé lọ́wọ́ tí wọ́n sì tún ń kọ orin ìfẹ̀hónúhàn. Wọ́n ní bí ìjọba ó bá tilẹ̀ lé àwọn kúrò ní ìtẹ̀dó wọn, kí wọn ó ṣètò ibòmíràn fún wọn.
Wọ́n lọ sí ilé ìgbìmọ̀ aṣòfin Èkó láti mú ojú ajé kan onísọ̀ àmọ́ kọmíṣọ́nà ọlọ́pàá fúnra rẹ̀ ló jáde sí wọn, ó kọ̀ láti jẹ́ kí wọn ó wọn ó wọ inú ilé ìgbìmọ̀ náà. Wọ́n ní àwọn kò ní lọ àfi bí àwọn bá rí àwọn aṣòfin náà. Nígbà tó yá, àwọn aṣòfin kan jáde sí wọn láti bá wọn sọ̀rọ̀ àmọ́ wọ́n takú pé àwọn gbọdọ̀ jókòó ṣe ìpàdé nínú ilé náà ni.
Àwọn ọlọ́pàá kò ṣe méní ṣe méjì, wọ́n yin tajútajú mọ́ wọn, ọ̀rọ̀ di bóòlọ-o-yàgò nígbà tí aruku tajútajú gba ilẹ̀ kan, àwọn èèyàn ṣubú lé ara wọn bẹ́ẹ̀ sì ni àwọn kan farapa. A rí obìnrin kan tó ń gbìyànjú láti dóòlà ẹ̀mí ọmọ ọwọ́ rẹ̀ níbi tó ti ń gbé e sá lọ.
Kódà, àkáwòrán fún ilé iṣẹ́ PUNCH; Suleiman Adeniyi dákú nígbà tó fa eruku tajútajú náà símú.
Kọmíṣọ́nà ọlọ́pàá ìpínlẹ̀ Èkó; Moshood Jimoh gbè lẹ́yìn ohun tí àwọn ọlọ́pàá ṣe yìí nínú ohun tó kọ sí ojú òpó X rẹ̀. Ó kọ ọ́ pé àwọn afẹ̀hónúhàn náà dí ojú pópó ní èyí tí àwọn èèyàn kò le lọ sí ibi iṣẹ́ wọn. Wọ́n sọ òkò lu òun wọ́n sì tún bú òun ní àwọn èébú kàbìtìkàbìtì.
Jimoh ní òfin fi ààyè gba ìwọ́de ìfẹ̀hónúhàn àmọ́ bí wọ́ bá fi dí ojú pópó tàbí hu ìwà ìpáǹle báyìí, ó di dandan kí àwọn ó tú wọn ká.
N kò le máa wòran kí ọkọ̀ ó tẹ̀ wọ́n pa lójú pópó tí wọ́n dúró sí, lẹ́yìn tí àwọn aṣòfin mẹ́rin bá wọn sọ̀rọ̀ tí wọ́n sì kọ̀, mo ní kí wọn ó kúrò lọ́nà àmọ́ níṣe ni wọ́n ti àwọn ọlọ́pàá mi tí gbogbo wọn sì ṣubú.
Ìdí nìyẹn tí a fi yin tajútajú fẹ́rẹ́fẹ́ láti tú wọn ká kí àwọn tó ń jáde le rí ọ̀nà lọ.
Wàyí o, arábìnrin Yemi Adamolekun tó jẹ́ ajàfẹ́tọ̀ọ́mọnìyàn tako ohun tí kọmíṣọ́nà sọ yìí, ó ní òun wà níbi ìwọ́de yìí. Arábìnrin Adamolekun ṣe àlàyé pé àwọn olùwọ́de náà kò hu ìwà ìpáǹle bẹ́ẹ̀ sì ni wọn kò dí ojú pópó. Wọ́n fi ètò sí ìwọ́de náà wọn kò sì ṣe jágídíjàgan bí kọmíṣọ́nà ṣe sọ yìí.
Nígbà tí wọ́n fẹ́ yin tajútajú yìí, wọ́n sọ fún wọn pé kí wọn ó jókòó pé wọ́n fẹ́ fún wọn ní omi àti ìpanu àmọ́ bí wọ́n ṣe jókòó tán, tajútajú ni wọ́n yìn sí àárín wọn, èyí ló fàá tí wọ́n fi tẹ ara wọn níbi tí wọ́n ti ń gbìyanjú àti dìde. Adamolekun dá àwọn ọlọ́pàá lẹ́bi fún ìwà yìí, ó ní wọ́n wó ilé àwọn ẹni náà láìṣe ètò ibòmíràn fún wọn, ibo ni kí wọ́n lọ?
Alága àjọ ajàfẹ́tọ̀mọ́mọnìyàn; Debo Adeniran náà bu ẹnu àtẹ́ lu àwọn ọlọ́pàá fún ohun tí wọ́n ṣe yìí. Ó ní ó tàbùkù ẹ̀tọ́ ọmọnìyàn. Adeniran pè fún ìjìyà fún àwọn ọlọ́pàá tó yin tajútajú náà.
Àwọn lájọlájọ náà ti dìde tako èyí, wọ́n bu ẹnu àtẹ́ lu ilé iṣẹ́ ọlọ́pàá fún èyí. Bákan náà ni àwọn ọlọ́pàá mú méjì nínú wọn sí àtìmọ́lé. Wọ́n ní àwọn méjì náà yóò fi ojú ba ilé ẹjọ́ lórí ẹ̀sùn dída àlàáfíà ìlú rú, dídí ojú ọ̀nà márosẹ̀, àti àwọn ẹ̀sùn mìíràn bẹ́ẹ̀.
Àgbà agbẹjọ́rò; Falana fúnra rẹ̀ ló lọ gba ẹjọ́ àwọn tí wọ́n mú náà rò ní ilé ẹjọ́. Wọ́n kọ́ ní kò le gba ẹjọ́ wọn rò nítorí ipò rẹ̀ gẹ́gẹ́ bíí àgbà agbẹjọ́rò SAN, Falana bèèrè ibi tí wọ́n kọ èyí sí nínú ìwé òfin ilẹ̀ wa àmọ́ wọn kò le dáhùn. Ó kojú adájọ́ náà ó sì gba onídùúró àwọn méjì náà kalẹ̀ láì gba owó lọ́wọ́ wọn.
Ó ti pẹ́ tí àwọn ará agbègbè náà àti ìjọba Èkó ti wà lẹ́nu èyí, wọ́n ti fìgbà kan ṣe ìkìlọ̀ fún ìjọba Èkó rí pé àwọn yóò ṣe ìwọ́de ní ìhòhò:
Àwọn obìnrin ìlú Ìlàjẹ tú jáde lọ sí ilé ìgbìmọ̀ aṣòfin Èkó pẹ̀lú oríṣìí àkọlé lọ́wọ́, wọ́n ké sí agbẹnusọ ilé náà ìyẹn Mudashiru Obasa àti àwọn aṣòfin lápapọ̀ láti kìlọ̀ fún àwọn ọba tí wọ́n di ajagungbalẹ̀, wọ́n ní àwọn ọba yìí ń lé àwọn kúrò ní orí ilẹ̀ tí àwọn tẹ̀dó sí wọ́n sì ń ta àwọn ilẹ̀ náà.
Àwọn obìnrin yìí wí pé àwọn yóò ṣe ìwọ́de ní ìhòhò bí èyí kò bá dópin.
Ọ̀kan nínú wọn tí orúkọ rẹ̀ ń jẹ́ Ifagbemi bá àwọn akọ̀ròyìn sọ̀rọ̀, ó ṣe àlàyé pé àwọn ni ìran tó tẹ̀dó sí orí ilẹ̀ náà láti ìgbà tí aláyé ti dáyé, àwọn ọba tí ó ń jẹ lásìkò yìí ń lé àwọn kúrò lórí ilẹ̀, wọn yóò gbé katakata wá wó ilé wọn nígbà tí wọ́n bá ta ilẹ̀ náà mọ́ wọn lórí.
Orúkọ ààrẹ Bola Ahmed Tinubu ní àwọn ọba yìí máa ń dá, wọ́n á ní Tinubu ló pàṣẹ kí wọn ó gba ilẹ̀ náà.
Àwọn obìnrin yìí kóra jọ sí iwájú ilé ìgbìmọ̀ aṣòfin Èkó nínú òjò wẹliwẹli náà, wọ́n ní àwọn mọ̀ pé àwọn ọba yìí kàn ń fi orúkọ Tinubu rẹ́ àwọn jẹ lásán ni òun kọ́ ló rán wọn.
Wọ́n wá fi lé e pé bí èyí kò bá dópin, àwọn yóò ṣe ìwọ́de ní ìhòhò ọmọlúàbí.
Ààrẹ ẹgbẹ́ ọmọ Ìlàjẹ; Rafael Irowainu náà sọ̀rọ̀, ó wí pé orílẹ-èdè Nàìjíríà nìkan ni òfin kò ti fi ẹsẹ̀ múlẹ̀, àwọn ọba ń jẹ ayé fàmílétè-n-tutọ́, wọ́n ń gbé ilẹ̀ onílẹ̀ tà kò sì sí oníbàáwí fún wọn.
Iroiwanu wí pé púpọ̀ nínú àwọn ọba yìí kìí ṣe ọmọ Èkó, ìpínlẹ̀ Ọ̀ṣun àti Èkìtì ni wọ́n ti ṣẹ̀ wá tí wọ́n sì fi èèrú dé orí ipò ọba náà.
Wọn yóò kàn gbé katakata dé sínú àdúgbò wọn yóò sì máa wó ilé láìsí ìwé àṣẹ láti ilé ẹjọ́, àwọn èèyàn yóò di aláìnílélórí láìrò tẹ́lẹ̀, wọ́n ní gbogbo èyí tó gẹ́.
Ọ̀rọ̀ rẹ̀ tẹ̀síwájú pé àwọn wá láti wá fi ẹ̀dùn ọkàn wọn tó Gómìnà Babajide Sanwoolu létí àti àwọn aṣòfin Èkó kí wọn ó wá ojútùú sí ọ̀rọ̀ náà.
Bákan náà ló wí pé wíwó ilé onílé kún ohun tó ń fa ìwà ọ̀daràn nítorí pé àwọn tí kò nílé lórí mọ́ náà yóò padà darapọ̀ mọ́ àwọn ọ̀daràn níbi tí wọ́n bá ti ń wọ̀sùn kiri.
Wole Adewusi tí òun náà jẹ́ olùwọ́de sọ wí pé àwọn obìnrin àti ọmọ ti di asùnta ní Ìlàjẹ látàrí bí àwọn ọba ṣe ń wó ilé yìí, ó ní wọ́n tún ń sun àwọn dúkìá tí wọn kò bá tètè kó, ó ké sí Sanwoolu láti gbọ́ ọ̀rọ̀ àwọn.
Alága ẹgbẹ́ ọmọ Ìlàjẹ; Ọmọba Oluwajimusu bu ẹnu àtẹ́ lu ìwà yìí, ó wí pé kò sí bí wọn yóò ṣe kọ ìtàn ìpínlẹ̀ Èkó tí wọn kò ní dárúkọ ìran Ìlàjẹ, ìjọba fẹ́ pa orírun Ìlàjẹ run ni gbogbo ohun tí wọ́n ń ṣe yìí.
Oluwajimusu wí pé ṣíṣe àyípadà orúkọ òpópónà Ìlàjẹ tó wà ní Bariga sí Sunny Ade jẹ́ ọ̀nà mìíràn tí wọ́n fẹ́ gbà pa ìtàn Ìlàjẹ rẹ́.
