Òǹkọrin ẹ̀mí nnì; Bukunmi Akinaanu tí gbogbo àwọn èèyàn mọ̀ sí omijé ojú mi ti dágbére fáyé lọ́jọ́ ìṣẹ́gun, ọjọ́ kejìlá, oṣù Ṣẹẹrẹ.
Ilé ìwòsàn kan ní ìpínlẹ̀ Èkó ni ó dákẹ́ sí. Ọ̀rẹ́ rẹ̀; Ayo Melody ló túfọ̀ ikú Bukunmi lójú òpó X rẹ̀ pé ó ti kí ayé pé ó dìgbóṣe.
Ohun tó ṣe okùnfà ikú rẹ̀ kò tíì jẹ́ mímọ̀ ní pàtó àmọ́ ohun tí àwọn èèyàn ń gbé pòòyì ẹnu ni pé ẹsẹ̀ kan ń bá Bukunmi fínra láti ìgbà díẹ̀ sẹ́yìn.
Nínú fọ́nrán kan tó gbòde, a rí Bukunmi tó jókòò sórí àga tí wòlíì sì ń gba àdúrà sí ẹsẹ̀ tó nà sí orí àga mìíràn. Pásítọ̀ náà ń sọ nínú fọ́nrán náà pé kí ọfà inú ẹsẹ̀ náà kó jáde.
A kò le sọ ní pàtó pé ẹsẹ̀ náà ló ṣokùnfà ikú Bukunmi àmọ́ ohun tó dájú ni pé ó ti lọ bá Ọlọ́run rẹ̀.
Ẹnìkan náà ṣe fọ́nrán bí wọ́n ṣe gbé òkú Bukunmi kúrò nínú yàrá ilé ìwòsàn náà ló sí ilé ìgbókùúsí tó sì fi orí ìtàkùn ayélujára.
ILÉ ẸJỌ́ KỌ̀ LÁTI GBA ONÍDÙÚRÓ PORTABLE.
Ilé ẹjọ́ gíga ìjọba tó wà ní Ọ̀tà, ìpínlẹ̀ Ogun ti kọ̀ láti gba onídùúró Habeeb Okikiola tí gbogbo èèyàn mọ̀ sí Portable.
Portable farahàn níwájú ilé ẹjọ́ lórí ẹ̀sùn ìṣenimọ́kumọ̀ku àti àwọn ẹ̀sùn mìíràn tí ìyàwó rẹ̀ Asabi fi kàn án.
Oluseyi Babaseyi; ẹni tó jẹ́ alukoro fún ilé iṣẹ́ ọlọ́pàá ìpínlẹ̀ Ogun ṣe àlàyé pé adájọ́ kọ̀ láti gba onídùúró rẹ̀ wọ́n sì tari rẹ̀ sí àtìmọ́lé.
Àwọn ẹ̀sùn tí ìjọba fi kan Portable ni pé ó lu ìyàwó rẹ̀ Asabi àti àwọn mìíràn ní ilé ọtí rẹ̀ tó wà ní Iyana Ilogbo, ó jí ọkọ̀ tí iye rẹ̀ ń lọ bíi mílíọ́nù méjìlá náírà, ó sì tún kojú ọlọ́pàá obìnrin kan nígbà tí ìyẹn ń ṣe iṣẹ́ ọba.
Àwọn ẹ̀sùn yìí ni ìjọba fi kan Portable, Asabi fúnra rẹ̀ kò wá sí ilé ẹjọ́ àmọ́ àwọn ẹlẹ́rìí rẹ̀ péjú, bákan náà ni ọlọ́pàá obìnrin tí wọ́n ní ó nà kò wá sí ilé ẹjọ́.
Adájọ́ ní òun kò le gba onídùúró rẹ̀ àfi tí àwọn èèyàn yìí bá yọjú ó sì pàṣẹ kí wọn ó fi sí àtìmọ́lé di ìgbẹ́jọ́ tó ń bọ̀.
ÌJỌBA ÌPÍNLẸ̀ AKWA IBOM NÍ ÀWỌN KÒ MỌ̀ NÍPA ÀBÁDÒFIN ÌBÁṢEPỌ̀ LÁÀRÍN OBÌNRIN ÀTI ỌKỌ ỌLỌ́KỌ TÓ GBÀGBORO KAN.
Ìjọba ìpínlẹ̀ Akwa Ibom ti fèsì sí ọ̀rọ̀ tó ń jà ràìnràìn lórí ìtàkùn ayélujára pé àwọn kò mọ̀ nípa àbádòfin ìjìyà fún obìnrin tó bá ní àjọṣepọ̀ pẹ̀lú ọkùnrin tó ti láya nílé.
Ohun tí àwọn èèyàn ń ṣe àtagbà rẹ̀ ni pé ìjọba ìpínlẹ̀ náà ti gbé àbádòfin kalẹ̀ ní èyí tó sọ pé obìnrin tó bá ní àjọṣepọ̀ pẹ̀lú ọkùnrin tó ti láya nílé yóò ṣe ẹ̀wọ̀n ọdún mẹ́wàá nígbà tí ọkùnrin bẹ́ẹ̀ yóò san mílíọ́nù méjì owó ìtanràn.
Àwọn ọmọ ilé ìgbìmọ̀ aṣòfin ìpínlẹ̀ Akwa Ibom ti fèsì pé àwọn kò mọ̀ nípa àbádòfin bẹ́ẹ̀, wọ́n ní àwọn èèyàn kan ló gbé ọ̀rọ̀ náà jáde kò wá láti ọ̀dọ ìjọba.
Jerry Otu; ẹni tó jẹ́ alága ìgbìmọ̀ ìfitónilétí fún ilé náà ṣe àlàyé pé ìgbìyànjú láti yẹpẹrẹ ilé ìgbìmọ̀ aṣòfin ìpínlẹ̀ náà ni èyí jẹ́, ó ní iṣẹ́ àwọn ká àwọn lára ju irú òfinkófin báyìí lọ.
Àlàyé rẹ̀ tẹ̀síwájú síi pé àwọn tó fẹ́ ba orúkọ igbákejì Gómìnà ìpínlẹ̀ náà jẹ́ ni wọ́n gbé irọ́ bàǹtàbanta náà jáde.
Ó rọ àwọn èèyàn láti yàgò fún ìròyìn òfegèé tí kò fi ẹsẹ̀ múlẹ̀.
