Mínísítà tẹ́lẹ̀rí fún lílọ bíbọ̀; Rotimi Amaechi ti fèsì sí ọ̀rọ̀ tí àwọn èèyàn ń jẹ lẹ́nu pé òun yóò díje ipò igbakejì ààrẹ pẹ̀lú Abubakar Atiku nínú ètò ìdìbò ọdún 2027. Amaechi ní òun kò le jẹ igbákejì ààrẹ rárá, ipò ààrẹ gan-an ló tọ́ sí òun àti wí pé òun yóò díje dupò ààrẹ nínú ètò ìdìbò tó ń bọ̀ náà.
Ọ̀rọ̀ tí Dele Momodu sọ ló bí gbogbo àlàyé yìí, nígbà tó ń bá àwọn akọ̀ròyìn sọ̀rọ̀ nípa ìdíjedupò ààrẹ Abubakar Atiku lọ́dún 2027, ó ní Peter Obi kọ̀ láti díje pẹ̀lú Atiku gẹ́gẹ́ bíi igbákejì, èyí yóò mú kí Atiku ó mú ọ̀kan nínú àwọn gómìnà ìpínlẹ̀ Rivers tẹ́lẹ̀rí; Rotimi Amaechi.
Nínú ọ̀rọ̀ rẹ̀, Dele Momodu gbé oríyìn fún Amaechi lórí ipa ribiribi tó kó nígbà tó wà ní ipò gómìnà ìpínlẹ̀ Rivers. Ó ní ó ṣe gudugudu méje tòun yàhàyà mẹ́fà, gbogbo ohun tí Wike ń ṣe lásìkò yìí, kò le dán an wò pẹ̀lú Amaechi.
Dele Momodu gúnlẹ̀ ọ̀rọ̀ rẹ̀ pẹ̀lú pé bí Peter Obi ò bá tètè ṣe ìpinu rẹ̀ lórí àti jẹ igbákejì Atiku, Amaechi ni yóò gba ipò náà.
David Iyofor; ẹni tó jẹ́ ọlọ́wọ́ ọ̀tún Amaechi lórí àtẹ̀jáde ló fèsì sí ọ̀rọ̀ tí Dele Momodu sọ yìí pé Amaechi ò lérò láti díje dupò igbákejì ààrẹ pẹ̀lú Atiku tàbí ẹnikẹ́ni. Ipò ààrẹ gan-an ni ó wù ú láti dù.
Ọ̀rọ̀ Iyofor tẹ̀síwájú pé Amaechi kò bá Atiku ní àjọsọ irú rẹ̀ àti pé yóò díje dupò ààrẹ lọ́dún 2027 lábẹ́ àsíá ẹgbẹ́ òṣèlú ADC. Ó rọ àwọn èèyàn láti yàgò fún ọ̀rọ̀ tí kò fi ẹsẹ̀ múlẹ̀ báyìí.
LEVI KÚ SÍ ÀHÁMỌ́ ÀWỌN ỌLỌ́PÀÁ:
Àwọn ẹbí oníṣòwò kan tí orúkọ rẹ̀ ń jẹ́ Levi Opara fẹ́ mọ ohun gan-an tó pa Levi sí àhámọ́ àwọn ọlọ́pàá Tiger Base tó wà ní ìpínlẹ̀ Imo.
A gbọ́ pé ọjọ́ kẹtàlá, oṣù Ọ̀wàrà, ọdún 2023 ni wọ́n gbé Levi ní ilé rẹ̀ tó wà ní Owerri lẹ́yìn tí òun àti ìyawó rẹ̀ jà.
Ọjọ́ kejìdínlógún oṣù náà ni wọ́n sọ fún àwọn ẹbí rẹ̀ pé ó ti kú. Àwọn ẹbí rẹ̀ takú pé àwọn fẹ́ mọ̀ ikú tó pa á gan-an ní pàtó. Wọ́n fi ẹ̀sùn kan àwọn ọlọ́pàá pé àwọn ló pa á nítorí pé wọn kò rí àlàyé kan pàtó gbà lórí ohun tó ṣe okùnfà ikú rẹ̀.
Ọmọ márùn-ún ni Levi fi sílẹ̀ sí ayé lọ tí àwọn ẹbí rẹ̀ sì ń bèèrè fún àlàyé lórí ikú rẹ̀ títí di òní.
MI Ò MỌ ỌJỌ́ ORÍ MI NÍ PÀTÓ – OLUSEGUN OBASANJO.
Ààrẹ orílẹ̀-ède wa tẹ́lẹ̀rí, ẹni tó darí orílẹ̀-èdè yìí fún odidi ọdún mẹ́rìndínlógún ti sọ gudugbẹ̀ ọ̀rọ̀ lórí ọjọ́ orí rẹ̀.
Ó wí pé òun kò le sọ ní pàtó ọjọ́ orí òun, òun kàn máa ń fi ọjọ́ orí àwọn akẹgbẹ́ rẹ̀ ṣe òdiwọ̀n ọjọ́ orí tirẹ̀ ni.
Mẹ́fà nínú àwọn tí a jọ lọ ilé ìwé ni wọ́n ṣì wà láyé tí k̀ sì sí èyí tó dín ní ọmọ àádọ́rùn-ún nínú wọn, ẹ fi èyí wo ọjọ́ orí mi – Olusegun Obasanjo.
ILÉ ÌWÉ ÌMỌ̀ ÒFIN ADAMAWA PÀDÁNÙ AKẸ́KỌ̀Ọ́ KAN.
Akẹ́kọ̀ọ́ ilé ìwé ìmọ̀ òfin Adamawa tó wà ní olú ìlú náà ti pàdánù ẹ̀mí rẹ̀ nígbà tó fo ìgànná ilé ìwé náà.
Àlàyé tí a rí gbà ni pé lọ́jọ́ kẹfà, oṣù Ọ̀pẹ ní déédé aago mọ́kànlá ààbọ̀ òwúrọ̀ ni Ayomiposi dé sí ilé ìgbé rẹ̀ ní ilé ìwé náà nínú kẹ̀kẹ́ márúwá, ó sọ̀ kalẹ̀ àmọ́ èyí tí yóò fi gba ẹnu ọ̀nà àbáwọlé, ìgànná ló fò wọ inú ọgbà iléègbé náà, ó ṣubú ó sì ń bì.
Aṣọ́gbà tó ríi lọ sí ọ̀dọ rẹ̀, ó báa tí ó ti bì sí gbogbo ara tí iyè rẹ̀ sì ti lọ. Ilé ìwòsàn kan tó wà ní ìtòsí ni wọ́n gbé e lọ àmọ́ àwọn dọ́kítà ní ó ti kú.
Ọmọ ọdún mẹ́tàdínlọ́gbọ̀n ni Ayomiposi, wọ́n ti gbé òkú rẹ̀ lọ sí ilé ìgbókùúsí fún àyẹ̀wò.
Kọmíṣọ́nà ọlọ́pàá ìpínlẹ̀ Adamawa; Dankombo Morris ti pạ̀ṣẹ kí àwọn ọlọ́pàá ó ṣe ìwádìí fínní lórí ikú ọmọ náà.
Èyí ni ìgbà àkọ́kọ́ tí ilé ìwé náà yóò pàdánù akẹ́kọ̀ọ́ láti ogún ọdún tí wọ́n ti dá a sílẹ̀.
TORDUE ṢÁ BÀBÁ RẸ̀ PA NÍTORÍ OWÓ.
Bàbá kan tí wọ́n pe orúkọ rẹ̀ ní Ankayambe Hembaor ni ọmọ rẹ̀; Tordue ti ṣá ládàá pa nítorí ó kọ̀ láti fún un lówó.
Ìròyìn tó tẹ̀ wá lọ́wọ́ ni pé lọ́jọ́ Àbámẹ́ta ní déédé aago mẹ́wàá àṣálẹ́, Tordue bèèrè owó lọ́wọ́ bàbá rẹ̀; Ankayambe àmọ́ kò fún un. Ọ̀rọ̀ náà di ìjà láàrín wọn tí Tordue fi fa àdá yọ tó sì fi ṣá bàbá rẹ̀ láṣàápa.
Agbègbè Nyamatso Mbagen ní ìjọba ìbílẹ̀ Buruku, ìpínlẹ̀ Benue ni èyí ti ṣẹlẹ̀. Ilé ìwòsàn Agbecha ni wọ́n gbé bàbá náà lọ àmọ́ aṣọ kò bá ẹ̀pa kò bá oró mọ́.
Ilé iṣẹ́ ọlọ́pàá ti bẹ̀rẹ̀ ìwádìí lórí ìṣẹ̀lẹ̀ náà wọ́n sì ti ń wá Tordue nítorí bó ṣe dá ọ̀ràn náà tán ló na pápá bora.
AKẸ́KỌ̀Ọ́JÁDE ILÉ ÌWÉ GÍGA AMBROSE ALLI PÀDÁNÙ Ẹ̀MÍ RẸ̀ NÍNÚ AYỌ̀ ÌKẸ́KỌ̀Ọ́JÁDE.
Àwọn akẹ́kọ̀ọ́jáde titun ti ilé ìwé gíga Ambrose Alli wa ọkọ̀ kágboro láti ṣe àjọyọ̀ ìkẹ́kọ̀ọ́jáde wọn. Èyí ni wọ́n ń ṣe tí ọ̀kan nínú ọkọ̀ wọn fi kọlu ọkọ̀ àjàgbé akẹ́rù nígbà tó gbìyànjú àti la ọkọ̀ tó wà níwájú rẹ̀.
Ní kété tí wọ́n kọ ìdánwò tó gbẹ̀yìn àṣekágbá wọn ni wọ́n kó àwọn ọkọ̀ náà sí ojú ọ̀nà tí wọ́n sì ń sá eré àsápajúdé. Ọ̀kan nínú àwọn akẹ́kọ̀ọ́ náà gbìyànjú àti la ọ̀kan léré ló fi lọ rá wọ inú ọkọ̀ àjàgbé akẹ́rù kan tí wọ́n gbé kalẹ̀ akẹ́kọ̀ọ́ tó wa ọkọ̀ náà kú lẹ́sẹ̀kẹsẹ̀ nínú ìjàm̀bá náà.
Àwọn tí ìṣẹ̀lẹ̀ náà ṣe ojú wọn sọ wí pé àwọn akẹ́kọ̀ọ́ náà kò bìkítà fún ewu ojú ọ̀nà ráá, eré àsápajúdé gbáà ni wọ́n sá.
Àjọ àwọn akẹ́kọ̀ọ́ NAN ló fi ìròyìn yìí léde.
