Ilé alájà méjì kan ti dà wó ní ìdájí ọjọ́ Ajé, ọjọ́ kẹtàdínlọ́gbọ̀n, oṣù Ọ̀wàrà ní Oyingbo. Ọ̀pọ̀ àwọn èèyàn ló ti há sí abẹ́ rẹ̀.
Ìròyìn tó tẹ̀ wá lọ́wọ́ ni pé ilé alájà méjì náà tó wa- ní ojúlé kẹrìnléláàdọ́ta, òpópónà Cole ní Oyingbo, ìpínlẹ̀ Èkó náà ṣàdédé dà wó lulẹ̀ ní àfẹ̀mọ́jú ọjọ́ Ajé nígbà tí àwọn olùgbé inú rẹ̀ ṣì ń sùn lọ́wọ́.
A gbọ́ pé ilé náà ti ń dẹnu kọlẹ̀ ṣáájú àkókò tí ó dà wó náà kó tó di pé ó dà wó pátápátá.
Magaret Adeseye; ẹni tó jẹ́ adarí ilé iṣẹ́ panápaná ìpínlẹ̀ Èkó ṣe àlàyé pé àwọn ti fi àmì sí ilé náà pé ó ti wà nípò ewu àmọ́ àwọn olùgbé rẹ̀ kọ̀ láti kó jáde.
Àwọn òṣìṣẹ́ panápaná ẹ̀ka Sari-Iganmu ni wọ́n ta mọ́ra dé ibẹ̀ tí wọ́n sì gbìyànjú àti dóòlà ẹ̀mí àwọn tó há sí abẹ́ rẹ̀.
Èèyàn mẹ́ẹ̀dógún ni wọ́n ti rí yọ lásìkò yìí, nínú wọn ni ọkùnrin méje, obìnrin mẹ́rin àti àwọn ọmọdé mẹ́rin. Ilé ìwòsàn ìjọba Ebute Meta tó wà ní ọjà Ọdàn ni wọ́n gbé wọn lọ.
Ìgbìyànjú ṣì ń lọ láti yọ àwọn tó kù sí abẹ́ ilé náà títí di àsìko yìí.
Àwọn ìṣẹ̀lẹ̀́ ilé dídàwó mìíràn tó wáyé ní Èkó.
Ilé iṣẹ́ tó ń mójútó ìṣẹ̀lẹ̀ pàjáwìrì ní ìpínlẹ Èkó ti ṣe àlàyé ipò tí ilé tó dà wó ní Adeniji ìsàlẹ̀ Èkó náà wà ṣáájú kí ó tó di pé ó dà wó.
Wọ́n ní àwọn ti já ìwé ẹ-kó-jáde fún àwọn olùgbé ilé náà láti ọjọ́ tó ti pẹ́ nítorí pé ilé náà ti dẹnu kọlẹ̀ gan-an.
Àwọn olùgbé ilé náà ló kọ etí ikún sí ìkìlọ̀ ìjọba ló fà á tí ilé náà fi padà wó lé wọn lórí.
Ọjọ́bọ, ọjọ́ kẹta, oṣù Agẹmọ yìí ni ilé náà dà wó, a mú ìròyìn náà wá pé:
Ilé kan tó wà ní Adeniji Adele ní ìsàlẹ̀ èkó ti dà wó lulẹ̀ báyìí o. òwúrọ̀ kùtù Ọjọ́bọ, ọjọ́ kẹta, oṣù Agẹmọ ni ilé náà dà wó.
Ọ̀pọ̀ àwọn èèyàn ló há sí abẹ́ rẹ̀ nítorí pé ilé ìgbé ni ilé náà. Àwọn òṣìṣẹ́ ìṣẹ̀lẹ̀ pàjáwìrì, àwọn ọlọ́pàá àti àwọn mìíràn ti tètè dé ibẹ̀ láti ṣe aájò àwọn tó há náà.
A kò tíì le sọ pàtó iye àwọn èèyàn tó há báyìí, wọ́n ti gbé àwọn tí wọ́n ti rí yọ lọ sí ilé ìwòsàn.
Ní báyìí, ìjọba Èkó wí pé àìgbọràn àwọn olùgbé náà ló jẹ́ kí wọn ó ṣe àgbákò ìjàm̀bá náà.
Bakan naa:
Ilé alájà méjì kan tó wà ní òpópónà ọ̀rẹ́mẹ́ta ní Ojodu-Berger, Èkó ti dà wó ní àárọ̀ ọjọ́ Àbámẹ́ta, ọjọ́ kọkàndínlógún, oṣù Igbe. Inú ilé yìí ni ilé oúnjẹ ìgbàlódé nnì Equal right wà, ọ̀pọ̀ àwọn èèyàn ni wọ́n wà níbẹ̀ lásìkò tó dà wó náà.
Àlàyé tí a rí gbà ni pé nǹkan bíi aago mẹ́sàn-án àárọ̀ ń lọ lù ni ilé náà ṣàdédé bì wó. A rí àwọn ọlọ́pàá, àwọn òṣìṣẹ́ ìṣẹ̀lẹ̀ pàjáwìrì àti àwọn òṣìṣẹ́ ilé iṣẹ́ panápaná tí wọ́n ti ń gbìyànjù láti dóòlà ẹ̀mí àwọn tó há náà.
Akọ̀wé fún ilé iṣẹ́ tó ń mójútó ìṣẹ̀lẹ̀ pàjáwìrì, ẹ̀ka ìpínlẹ̀ Èkó; Dọ́kítà Oluwafemi Oke-Osanyintolu ṣe àlàyé fún àwọn akọ̀ròyìn pé èèyàn márùn-ún ni àwọn ti rí yọ láàyè báyìí, wọ́n ní ọgbọ́n ni ọ̀rọ̀ náà gbà àwọn sì ti kó àwọn irin iṣẹ́ ńlá ńlá tí wọn yóò lò dé. Dọ́kítà Oluwafemi wí pé àwọn ń ti igun kan bọ́ sí ìkan ni láti wá àwọn èèyàn tó há náà.
Ní báyìí, ìròyìn ti fìdí ẹ̀ múlẹ̀ pé wọ́n ti rí òkú ẹnìkan nínú èérún ilé náà, ilé iṣẹ́ to ń mójútó ìṣẹ̀lẹ̀ pàjáwìrì wí pé àwọn ko le sọ iye àwọn èèyàn tó há gan-an ní pàtó nítorí pé àwọn èrò pọ̀ nínú ilé oúnjẹ náà lásìkò tó wó. Wọ́n ní àwọn ń tẹ̀síwájú nínú wíwá àwọn èèyàn náà jáde nígbà tí àwọn èèyàn ní ìrètí àtirí ẹbí wọn padà láàyè.
IPÒ WO NI ILÉ TÓ DÀ WÓ NÁÀ WÀ TẸ́LẸ̀?
Gẹ́gẹ́ bí ẹ ti mọ̀ pé ẹ̀ṣẹ́ kan kìí déédé ṣẹ́, àwọn akọ̀ròyìn gbìyànjú láti mọ ipò tí ilé alájà méjì náà wà tẹ́lẹ̀ ṣáájú kí ó tó dà wó yìí. Ẹnìkan tí ìsọ̀ rẹ̀ wà ní ìtòsí ibẹ̀ àmọ́ tí a kò ní le dárúkọ rẹ̀ ṣe àlàyé pé ilé náà ti kẹ láti ọjọ́ tó ti pẹ́, ó ní òun kìí tilẹ̀ ra oúnjẹ níbẹ̀ nítorí pé gbogbo èèyàn ló mọ̀ pé ó le dà wó nígbàkúùgbà.
Ẹlòmíràn náà wí pé ó ti pẹ́ tí àwọn ará àdúgbò ti ń ṣe ìkìlọ̀ pé ilé náà le dà wó nítorí pé ó ti kẹ kalẹ̀ àmọ́ kò sí ẹni tó kọbi ara sí ìkìlọ̀ yìí.
Ilé mìíràn dà wó ní Agarawu, Èkó: ilé alájà mẹ́ta tí wọ́n ń kọ́ lọ́wọ́ dà wó ní Èkó.
Ilé alájà mẹ́ta tí wọ́n ń kọ́ lọ́wọ́ ní òpópónà Agarawu ní Island, Èkó kò jẹ́ tí wọn ó kọ́ òun tán tó fi dà wó lulẹ̀. Ọjọ́ Àìkú, ọjọ́ kẹtàlá, oṣù Igbe tí a wà yìí ni ilé náà dà wó lulẹ̀ wìì. Àwọn òṣìṣẹ́ méjì ló farapa yánnayànna.
Nínú ọ̀rọ̀ tí agbẹnusọ fún ilé iṣẹ́ ọlọ́pàá ìpínlẹ̀ Èkó; Benjamin Hundeyin sọ ni a ti ríi dì mú pé nǹkan bíi aago méjì ọ̀sán ni ilé náà bì wó lọ́jọ́ náà, ilé yìí sì farati ilé ìwòsàn ìjọba alábọ́dé primary health center Agarawu ni. Kíá ni wọ́n ti gbé àwọn òṣìṣẹ́ méjì náà lọ sí ilé ìwòsàn ìjọba tó wà ní Marina fún ìtọ́jú.
