Ìyàwó Samson Haruna tó jẹ́ ọmọ ogun ilẹ̀ yìí ti dáná sun ún lẹ́yìn oṣù kẹfà tí wọ́n ṣe ìgbéyàwó.
A gbọ́ pé arábìnrin Retyit Obadiah Dalong Samson Haruna àti ọkọ rẹ̀ ní gbólóhùn asọ̀ nílé wọn tó wà ní ibùdó àwọn ológun, Ibagwa, ìpínlẹ̀ Akwa Ibom.
Ìjà náà gbomi láàrín wọn tí Reytit fi da epo bẹntiróòlù sí inú ilé tó sì sọ iná síi. Ọkọ rẹ̀; Haruna jóná gidi nínú iná náà tó sì padà já sí ikú.
Ilé ìwòsàn Battalion tó wà ní Uyo ni Haruna dákẹ́ sí lẹ́yìn gbogbo ìgbìyànjú láti dóòlà ẹ̀mí rẹ̀.
Ilé iṣé ológun bu ẹnu àtẹ́ lu ìṣẹ̀lẹ̀ yìí wọ́n sì bá àwọn ẹbí Haruna kẹ́dùn.
ÌJÀMBÁ ỌKỌ̀:
ỌKỌ̀ AJÀGBÉ ELÉJÒ TẸ ÈÈYÀN MÁRÙN-ÚN PA NÍ ÌPÍNLẸ̀ OGUN.
Ọkọ̀ àjàgbé eléjò kan ti tẹ kẹ̀kẹ́ maruwa tó kó àwọn èèyàn márùn-ún pa ní alẹ́ ọjọ́ Ẹtì. Nǹkan bíi aago mẹ́jọ àbọ̀ alẹ́ ni èyí ṣẹ̀ ní ojú ọ̀nà Papalanto sí Ilaro ní ìjọba ìbílẹ̀ Gúùsù Yewa, ìpínlẹ̀ Ogun.
Àlàyé tí a rí gbà lẹ́nu agbẹnusọ fún ẹ̀ṣọ́ aláàbò ojú pópó ìpínlẹ̀ Ogun; Babatunde Akinbiyi ni pé ọkọ̀ àjàgbé náà pàdánù ìjánu rẹ̀ lórí eré ó sì mú kẹ̀kẹ́ maruwa náà gùn mọ́lẹ̀. Àwọn èèyàn márùn-ún inú kẹ̀kẹ́ náà ló tẹ̀ pa lẹ́sẹ̀kẹsẹ̀.
ỌKỌ̀ ÀJÀGBÉ JÁBỌ́ LÉ ỌKỌ̀ AYỌ́KẸ́LẸ́ NÍ ÌPÍNLẸ̀ Ọ̀YỌ́.
Ọkọ̀ àjàgbé eléjò kan ti ṣekú pa awakọ̀ ayọ́kẹ́lẹ́ kan nígbà tó yẹ̀ tó sì jábọ́ lé e lórí.
Ìpínlẹ̀ Ọ̀yọ́ ni èyí ti ṣẹlẹ̀ lọ́jọ́ Àìkú tó lọ yìí, ojú ọ̀nà márosẹ̀ Èkó sí Ìbàdàn ni ó ti ṣelẹ̀.
A gbọ́ pé ní nǹkan bíi aago méjì ọ̀sán ni ọkọ̀ àjàgbé eléjò náà tó kó aṣọ kún bámú náà yẹ̀ tó sì ó pa ọkọ̀ Micra náà mọ́lẹ̀ pátápátá.
Àwọn ẹ̀ṣọ́ aláàbò ojú pópó ẹ̀ka ìpínlẹ̀ Ọ̀yọ́ sa ipá wọn, wọ́n yọ òkú awakọ̀ Micra náà jáde nínú ọkọ̀ tó há sí, wọ́n sì tún wọ́ àwọn ọkọ̀ náà kúrò lójú pópó.
Àlàyé tí a rí gbà lẹ́nu òṣìṣẹ́ FRSC náà nip é ọkọ̀ ajàgbé náà jáde láti ojú ọ̀nà Èkó wọ Ìbàdàn, ó jáwọ́ fún àwọn kankéré tí wọ́n tò kalẹ̀ ó sì lọ kọlu ọkọ̀ Micra náà, ó wọ́ ọkọ̀ Micra yìí títí ó sì padà dànù lé lórí.
Àwọn tí ìṣẹ̀lẹ̀ náà ṣojú wọn dá àwọn tó ṣe títì náà lẹ́bi ìṣẹ̀lẹ̀ náa, wọ́n wí pé ó yẹ kí wọn ó ti kó àwọn kankéré náà kúrò nígbà tí wọ́n ti parí títì náà.
Ilé ìgbókùúsí ilé ìwòsàn Adeoyo ni wọ́n gbé òkú awakọ̀ náà sí.
ÌDÁJỌ́ TÓ WÁYÉ LỌ́SẸ̀ YÌÍ:
OGUIBE DÈRÒ Ẹ̀WỌ̀N LẸ́YÌN TÓ FỌ́WỌ́ RÁ ẸGBẸ̀LẸ́GBẸ̀ NÁÍRÀ.
Ilé ẹjọ́ gíga ìpínlẹ̀ Èkó ti sọ Oguibe Nwachukwu sí ọgbà ẹwọn kirikiri lórí ẹ̀sùn pé ó ja olè igba mílíọ́nù náírà.
Àjọ tó ń gbógun ti ìwà àjẹbánu EFCC ló wọ́ Oguibe turutu lọ síwájú adájọ́ Rahmon Oshodi. Ẹ̀sùn tí wọ́n fi kàn án náà ni pé ilé iṣẹ́ tó ń bá ṣiṣẹ́ tẹ́lẹ̀; Travelstar fi mílíọ́nu mẹ́rìndínlógójì dọ́là pamọ́ sí ìkáwọ́ Oguibe ní èyí tí ó gbé fo gánna. Lẹ́yìn èyí, ó tún pa orúkọ ohun ìní ilé iṣẹ́ náà dà sí tirẹ̀ lọ́dún 2018.
Nígbà tí wọ́n ka gbogbo ẹ̀sùn yìí síi létí tán, Oguibe ní òun kò jẹ̀bi ọ̀kankan nínú rẹ̀, agbẹjọ́rò àjọ EFCC náà; A.A Usman rọ ilé ẹjọ́ láti má gba onídùúró rẹ̀, adájọ́ sì gbà bẹ́ẹ̀.
Agbẹjọ́rò Oguibe; Kelvin C. Uzozie gbìyànjú láti gba onídùúró rẹ̀ àmọ́ kò báa, Oguibe ti wà ní kirikiri báyìí títí di ọjọ́ ìgbẹ́jọ́ tó ń bọ̀.
ÌFIPÁBÁNILÒ:
ỌLỌ́DẸ FIPÁ GBA ÌBÁLÉ ỌMỌ ỌDÚN MẸ́RÌNLÁ NÍ ÌPÍNLẸ̀ RIVERS.
Àwọn ọlọ́pàá ti mú ọlọ́dẹ kan tí wọ́n pe orúkọ rẹ̀ ní Godday lórí ẹ̀sùn pé ó fipá bá ọmọ ọdún mẹ́rìnlá lò pọ̀.
Agbègbè Trans-Amadi ní Portharcourt tíí ṣe olú ìlú ìpínlẹ̀ Rivers ni èyí ti ṣẹlẹ̀.
Lógúnjọ́, oṣù Ọwẹ́wẹ̀ yìí ni ìyá ọmọ yìí fún un ní káàdì owó láti gba owó wá lẹ́nu ẹ̀rọ nítorí pé ara rẹ̀ kò dá kò sì leè dá lọ.
Ìyá ọmọ yìí ṣe àlàyé pé òun pe ọmọ náà lórí aago ó sì wí pé òun ti gba owó náà.
Nígbà tí kò dé lásìkò tó yẹ ni ìyá rẹ̀ bá tún pè é àmọ́ kò gbé aago náà mọ́.
Ẹ̀yìnọ̀rẹyìn, ọmọ yìí dé pẹ̀lú àpá ní gbogbo ara.
Ó kó ẹjọ́ ó rọ̀ pé ẹnìkan wà lẹ́yìn òun nígbà tí òun ń gba owó lẹ́nu ẹ̀rọ apọwó tí òun kọ́kọ́ lọ, ara fu òun ni òun ṣe Kúrò níbẹ̀ lọ sí ilé ìfowópamọ́ mìíràn, ó tún bá ọkùnrin náà níbẹ̀, lẹ́yìn tó gba owó tán ni ọkùnrin yìí fipá wọ́ ọ wọ inú kọ̀rọ̀ kan nílé ìfowópamọ́ náà tó sì bá a lájọṣepọ̀.
Àwọn ọlọ́pàá ṣe àyẹ̀wò fún ọmọ yìí nílé ìwòsàn wọ́n sì ríi dájú pé wọ́n bá ọmọ náà lájọṣepọ̀.
Ọmọ yìí júwe bí ọkùnrin yìí ṣe rí fún àwọn ọlọ́pàá, wọ́n wá a dé agbègbè náà, àwọn ará ibẹ̀ wí pé ọkùnrin náà ti fìgbà kan jẹ́ ẹ̀ṣọ́ aláàbò ilé ìfowópamọ́ náà.
Ìyá ọmọ yìí wí pé òjìlélọ́ọ̀dúnrún ẹgbẹ̀rún náírà ló dín nínú owó tí òun ní kí ọmọ náà ó gbà.
Wọ́n ti mú Godday sí àhámọ́ báyìí yóò sì fi ojú ba ilé-ẹjọ́ láìpẹ́.
Grace Iringe-Koko; ẹni tó jẹ́ alukoro fún ilé iṣẹ́ ọlọ́pàá ìpínlẹ̀ Rivers ló sọ ọ̀rọ̀ yìí di mímọ̀.
ÌJÀ ILẸ̀:
OKWUCHUKWU ṢÁ MỌ̀LẸ́BÍ RẸ̀ PA NÍTORÍ ÌJÀ ILẸ̀.
Okochukwu Ezimuo ti ṣá Joseph Dikeh ládàá pa ní ìpínlẹ̀ Anambra.
Ẹni ọdún márùndínláàdọ́ta ni Okochukwu nígbà tí Joseph jẹ́ ẹni ọdún mẹ́rìndínláàdọ́ta.
A gbọ́ pé èdè àìyedè wáyé láàrin Joseph àti Okochukwu lórí ìjà ilẹ̀, wọ́n ṣe aájò Joseph dé ilé ìwòsàn àmọ́ àwọn dọ́kítà wí pé ó ti kú.
Ohun tó ṣe okùnfà èdè àìyedè náà ni ọ̀rọ̀ ilẹ̀ tó jẹ́ ti mọ̀lẹ́bí wọn.
Tochukwu Ikenga; ẹni tó jẹ́ alukoro fún ilé iṣẹ́ ọlọ́pàá ìpínlẹ̀ Anambra ló sọ ọ̀rọ̀ yìí di mímọ̀.
Kọ́míṣọ́nà ọlọ́pàá ìpínlẹ̀ Anambra ti pàṣẹ kí wọn ó tari ẹjọ́ náà lọ sí ẹ̀ka tó kàn gbọ̀ngbọ̀n.
