Bashera Ojedeyi ti bọ́ sí ọwọ́ àwọn ajínigbé nígbà tí ó ń bọ̀ láti ìpínlẹ̀ Sokoto lọ sí ìpínlẹ̀ Ọ̀ṣun níbi tí yóò ti ṣe àṣewò iṣẹ́ tó kẹ́kọ̀ọ́gboyè lé lórí.
Igba mílíọ̀nù náírà ni àwọn ajínigbé náà béèrè lọ́wọ́ àwọn òbí rẹ̀ lówó ìtúsílẹ̀.
Àlàyé tí a rí gbà ni pé ọjọ́ Àìkú ni Bashera gbéra láti Sokoto tó lọ sí Òṣogbo níbi tí yóò ti ṣe àṣewò iṣẹ́ rẹ̀ gẹ́gẹ́ ní ẹ̀ka ìlera, nígbà tó dé
Mokwa ní ìpínlẹ̀ Niger, ó pe àwọn ẹbí rẹ̀ pé ọkọ tí òun wọ̀ takú wọ́n sì ń tún un ṣe lọ́wọ́.
Láti ìgbà náà ni wọn kò ti ríi bá sọ̀rọ̀ títí di ọjọ́ Ìṣẹ́gun tí àwọn ajínigbé náà kàn sí àwọn ẹbí rẹ̀ pé ọmọ náà wà ní àkàtà àwọn.
Ẹgbẹ̀rún lọ́nà igba náírà ni wọ́n bèèrè fún owó ìtúsílẹ̀, àwọn ẹbí náà rọ̀ wọ́n láti mú owó náà wálẹ̀ pé àwọn kò le rí irú owó bẹ́ẹ̀ àmọ́ wọ́n kọ̀ jálẹ̀.
Wọ́n ti fi ọ̀rọ̀ náà tó ilé iṣẹ́ ọlọ́pàá ìpínlẹ̀ Niger àti Sokoto létí.
Ilé iṣẹ́ ìpínlẹ̀ Niger fi ìdí rẹ̀ múlẹ̀ láti ẹnu alukoro wọn Wasiu Abiodun bẹ́ẹ̀ náà ni alukoro fún ilé iṣẹ́ ọlọ́pàá ìpínlẹ̀ Sokoto; Rufai Ahmad náà wí pé àwọn ti gbọ́ nípa ìṣẹ̀lẹ̀ náà.
Èyí wáyé lẹ́yìn tí wọ́n gbé Peace àti àbúrò rẹ̀ nígbà tí ó ń bọ̀ láti ibi ètò ìsọnidagbẹjọ́rò.
A mú ìròyìn náà wá pé:
Àwọn ajínigbé tí wọ́n gbé agbẹjọ́rò titun nnì ti kàn sí àwọn ẹbí rẹ̀, ogójì mílíọ̀nù náírà ni wọ́n bèèrè fún owó ìtúsílẹ̀.
Peace Onyesom ni orúkọ agbẹjọ́rò titun yìí, nígbà tí ó ń bọ̀ láti ibi ètò ìsọnidagbẹjọ́rò ni wọ́n jíi gbé ní òpópónà Okene sí Auchi.
Peace àti àbúrò rẹ̀ obìnrin tí wọ́n jọ lọ náà ni àwọn ajínigbé náà palẹ̀ mọ́ lójú ọ̀nà, wọ́n ti wá kàn sí àwọn ẹbí rẹ̀ báyìí pé bí wọ́n bá fẹ́ gbà á sílẹ̀, ogójì ẹgbẹ̀rún náírà ni wọn yóò san.
Àwọn ẹbí Peace rawọ́ ẹ̀bẹ̀ sí ìjọba àpapọ̀ lati ṣe ìrànwọ́ fún wọn lórí ọ̀rọ̀ yìí.
Adaeze; ẹni tó jẹ́ àbúrò sí Peace ṣe àlá pé Gift ni orúkọ àbúrò tí òun àti Peace jọ lọ àwọn sì ń rí wọn bá sọ̀rọ̀ kó tó di pé wọ́n jí wọn gbé.
Wákàtí kan lẹ́yìn tí wọ́n ti wà lọ́nà ilé ni wọn kò rí wọn bá sọ̀rọ̀ mọ́, ẹnìkan ló gbé aago Gift tó sì wí pé ọlọ́pàá ni òun pé wọ́n ti jí àwọn èrò inú ọkọ̀ náà gbé.
Ọjọ́ Àbámẹ́ta ni àwọn ajínigbé náà kàn sí àwọn mọ̀lẹ́bí náà pé ọgọ́rùn-ún mílíọ̀nù ni wọn yóò fi gba àwọn ọmọ náà sílẹ̀, Adaeze wí pé àwọn bẹ̀bẹ̀ títí pé kí wọn ó gba mílíọ̀nù mẹ́ta àmọ́ wọ́n kọ̀, wọ́n tún pè ní ọjọ́ Àìkú pé àwọn yóò gba ogún mílíọ̀nù jálẹ̀ ẹnìkọ̀ọ̀kan ní èyí tí àwọn méjèèjì yóò jẹ́ ogójì mílíọ̀nù.
Adaeze ṣe àlàyé síwájú síi pé àwọn mọ̀lẹ́bí ti ni gbé ìgbésẹ̀ àti ta àwọn dúkìá kan kí wọn ó le rí owó náà san.
Ní àtakò sí èyí, alukoro àgbà fún ilé iṣẹ́ ọlọ́pàá; Benjamin Hundeyin kọ ọ́ sí ojú òpó X rẹ̀ pé àwọn ti gba mẹ́jọ nínú àwọn méjìlá tí wọ́n jí gbé lójú ọ̀nà Okene sí Auchi náà sílẹ̀, ó wí pé àwọn ṣì ń ṣiṣẹ́ lórí bí wọn yóò ṣe gba àwọn ìyókù kalẹ̀.
Ìwádìí ní ibùdókọ̀ tí ọkọ̀ náà ti gbéra fi hàn pé àwọn mẹ́jọ náà ni wọ́n wọ ọkọ̀ náà kìí ṣe méjìlá tí ilé iṣẹ́ ọlọ́pàá sọ.
Bákan náà ni àjọ NURTW tako ohun tí Benjamin sọ yìí, ó wí pé irọ́ tó jìnnà sí òótọ́ ni, wọn kò gba ẹnìkankan sílẹ̀.
Àjọ àwọn agbẹjọ́rò ilẹ̀ yìí NBA bu ẹnu àtẹ́ lu ìṣẹ̀lẹ̀ yìí, wọ́n ṣe àpèjúwe rẹ̀ gẹ́gẹ́ bíi èyí tí kò ṣe é gbọ́ sétí, wọ́n wá rọ àwọn ọlọ́pàá láti ṣe àwárí àwọn ẹni náà.
Ìjínigbé mìíràn tó tún làmìlaaka ni ti àgùnbánirọ̀ obìnrin kan tí wọ́n gbé nígbà tí ó ń padà bọ̀ wá sí ibi tó ti ń sìnlǔ.
Báyìí ni tirẹ̀ ṣe lọ:
Àgùnbánirọ̀ ni Rofiat Lawal, ìlú Ogbomosho ní ìpínlẹ̀ Ọ̀yọ́ ni ó ti ń sin ilẹ̀ bàbá rẹ̀, Ogbomosho náà ló ń lọ tí àwọn ajínigbé fi gbé e lójú ọ̀nà Benin sí Ìbàdàn.
Rofiat lọ sí ilé àwọn òbí rẹ̀ ní ìpínlẹ̀ Edo, Ogbomosho níbi tó ti ń sìnlú ló ń padà sí tí àwọn ajínigbé fi gbé e lọ.
Ọ̀rẹ́ rẹ̀ tí orúkọ rẹ̀ ń jẹ́ Agbakwara ṣe àlàyé pé Rofiat pe òun láti àkàtà àwọn ajínigbé náà pé kí òun ó bá òun wá ogún mílíọ̀nù náírà owó ìtúsílẹ̀.
Agbakwara ló fi ọ̀rọ̀ yìí léde pé àwọn òbí Rofiat kò là bẹ́ẹ̀ ni wọn ò ṣagbe, ìbo ni kí wọ́n ti rí adúrú owó náà?
Aminat Lawal, ẹni tó jẹ́ ẹ̀gbọ́n fún Rofiat bá àwọn oníròyìn sọ̀rọ̀ pé Rofiat pè lórí aago tó sì ń sunkún pé kí wọn ó bá òun tu owó ìtúsílẹ̀ náà. Ogún mílíọ̀nù náírà ni wọ́n bèèrè fún àmọ́ àwọn òbí rẹ̀ ti gba sí mílíọ̀nù márùn-ún náírà.
Aminat rawọ́ ẹ̀bẹ̀ sí gbogbo ọmọ Nàìjíría láti má dá àwọn dá èyí kí wọn ó dákun dábọ̀ fi iye tí wọ́n bá ní ránṣẹ́ kí wọn ó le gba Rofiat kalẹ̀.
Àlàyé rẹ̀ tẹ̀síwájú pé nínú ọ̀rọ̀ tí Rofiat sọ ni wọ́n ti ríi dì mú pé awakọ̀ náà ló kó wọn lé àwọn ajinigbe lọ́wọ́.
Èrò Ìbàdàn ni ọkọ̀ náà kó láti Benin, bó ṣe dé Ore ló dúró tí àwọn ajinigbe ọ̀hún sì jáde láti inú igbó. Fúnra awakọ̀ náà ló kó wọn lé àwọn ajínigbé náà lọ́wọ́ tó sì bá tirẹ̀ lọ.
Aminat ṣe àlàyé pé àwọn ti kàn sí àjọ àgùnbánirọ̀ NYSC lórí ìṣẹ̀lẹ̀ náà àmọ́ èsì tí àwọn gbà náà ni pé Rofiat kò gba ìyànda tó fi lọ sí ilé, wọ́n ní àwọn ti ṣe ìkìlọ̀ fún àwọn àgùnbánirọ̀ láti máa gba ìyànda bí wọ́n bá fẹ́ lọ sí ilé tàbí rin ìrìnàjò kankan.
Àjọ àgùnbánirọ̀ wí pé àwọn ti da àwọn ẹ̀ṣọ́ síta láti wá ọmọ náà jáde.
