Àwọn èèyàn ló rí Maryam níbi tó ti ń gbìyànjú àti sin ọmọ rẹ̀ tó ṣẹ̀ṣẹ̀ bí láàyè ní Kamba, ìjọba ìbílẹ̀ Dandi ní ìpínlẹ̀ Kebbi.
Ó tilẹ̀ ti ń da iyèpẹ̀ bo ọmọ naa kí wọn ó tó ríi, wọ́n wú ọmọ náà jáde wọ́n sì gbé e lọ sí ilé ìwòsàn.
Àwọn dọ́kítà fìdí ẹ̀ múlẹ̀ pé ọmọ náà wà ní àlàáfíà wọ́n sì fa Maryam lé àwọn ọlọ́pàá lọ́wọ́.
Nafiu Abubakar; ẹni tó jẹ́ alukoro fún ilé iṣẹ́ ọlọ́pàá ìpínlẹ̀ Kebbi ṣe àlàyé pé Maryam wé ọmọ náà láṣọ, ó fi aṣọ dí ẹnu rẹ̀ ó sì lọ sín ín sí inú igbó Malam Yaro tó jẹ́ inú oko Alhaji Kabiru Muhammad.
Níbi tí Kabiru ti ń roko ló ti kófìrí pé ojú ibẹ̀ jọ ilẹ̀ tí èèyàn kan ti hú, ó pe àwọn èèyàn mọ́ra wọ́n sì hú ilẹ̀ náà, ọmọ titun jòjòló ni wọ́n bá nínú ẹ̀.
Àwọn ará àdúgbò ló tọ́ka pé Maryam ni ẹni tó ṣẹ̀ṣẹ̀ bímọ ní àdúgbò náà, wọ́n bá gbéra lọ bèèrè ọmọ rẹ̀ lọ́wọ́ rẹ̀, àìrí ọmọ náà gbé jáde ni wọ́n fi fà á lé àwọn ọlọ́pàá lọ́wọ́.
Ẹni ogún ọdún ni Maryam, ó jẹ́wọ́ lágọ̀ọ́ àwọn ọlọ́pàá pé òun sin ọmọ náà láàyè nítorí pé òun kò ní ohun tí òun yóò fi tọ́jú rẹ̀.
Ilé iṣẹ́ ọlọ́pàá wí pé àwọn yóò fa ọmọ náà lé àjọ tọ́rọ̀ kàn lọ́wọ́ nígbà tí Maryam yóò fi ojú ba ilé-ẹjọ́.
WỌ́N RÍ ÒKÚ ÈÈYÀN MÁRÙN-ÚN NÍ ORETA, IKORODU.
Kò dín ní òkú àwọn èèyàn márùn-ún tí wọ́n rí ní etídò Oreta, Ikorodu ní èyí tó ti kó ìpayà bá àwọn ará àdúgbò náà.
Aṣọ wà lára àwọn òkú yìí gbogbo wọn ló sì ní àpá ẹ̀jẹ̀ lára. Bákan náà ni wọ́n tún rí òkú ẹnìkan ní Bayeku ní Ikorodu kan náà. Àtọwọ́ àtẹsẹ̀ òkú Bayeku yìí ni wọ́n gé lọ.
Nígbà tí àwọn èèyàn kan sọ pé ìkọlù àwọn ọmọ ẹgbẹ́ òkùnkùn ni okunfà ikú àwọn èèyàn náà, àwọn kan wí pé kò rí bẹ́ẹ̀ pé ìjà ilẹ̀ ló fàá.
Títí di àsìkò yìí, ilé iṣẹ́ ọlọ́pàá kò tíì le sọ pàtó irú ikú tó pa àwọn ẹni náà.
Alága ìjọba ìbílẹ̀ Bayeku; Hammed Aroyewun lọ síbi ìṣẹ̀lẹ̀ náà pẹ̀lú àwọn ẹ̀ṣọ́ aláàbò ó sì sọ̀rọ̀ lórí rẹ̀. Ó wí pé kí àwọn ará ìlú ó fi ọkán balẹ̀ kí wọn ó sì ṣe àtìlẹ́yìn fún àwọn ọlọ́pàá lórí bí wọn yóò ṣe dé kúlẹ̀kúlẹ̀ ọ̀rọ̀ náà.
Hameed bu ẹnu àtẹ́ lu ìṣẹ̀lẹ̀ náà, ó wí pé èyí tàpá sí àlàáfíà ìlú Bayero àti agbègbè rẹ̀. Àwọn ẹ̀ṣọ́ aláàbò ti fọwọ́sowọ́pọ̀ ní ẹ̀ka-ẹ̀ka láti wá àwọn tí wọ́n ṣe iṣẹ́ láabi yìí jáde.
Hammed gúnlẹ̀ ọ̀rọ̀ rẹ̀ pẹ̀lú pé kí àwọn ará ìlú náà ó máa pa òfin mọ́ nígbà gbogbo kí wọn ó sì gba àlàáfíà láàyè.
AKẸ́KỌ̀Ọ́ ṢÈTÒ ADURA ỌLỌ́JỌ́ MÉJE FÚN KASHIM SHETTIMA.
Akẹ́kọ̀ọ́ ilé ìwé gíga AlQalam tó wà ní Kastina ti ṣètò adura ọlọ́jọ́ méje fún igbákejì ààrẹ wa; Kashim Shettima ní àyájọ́ ọjọ́ ìbí rẹ̀. Erédìí àdúrà náà ni láti jẹ́ kí ààrẹ Tinubu ó yan Shettima ní igbákejì rẹ̀ lọ́dún 2027.
Muhammad Yakubu ni orúkọ akẹ́kọ̀ọ́ yìí, ẹni ọdún méjìdínlógún níí ṣe, ìpele kejì ni ó wà ní ẹ̀ka ẹ̀kọ́ ìṣèlú.
Òní ni ètò adura náà wá sópin pẹ̀lú ètò ìkásẹ̀ rẹ̀ nílẹ̀.
Yakubu ṣe àlàyé ìdí tó fi ṣètò adura yìí pé Shettima ni àwòkọ́ṣe òun, òun sì nífẹ̀ẹ́ sí bí ó ṣe ń bá ààrẹ Bola Ahmed Tinubu to orílẹ-èdè èdè yìí, àdúrà ló tọ́ sí àwọn méjèèjì. Ó wí pé:
‘Mo fẹ́ rọ àwọn ọ̀dọ́ láti máa fi àdúrà ran àwọn adarí wa lọ́wọ́ pàápàá lásìkò tí ètò ààbò mẹ́hẹ yìí, ọ̀rọ̀ kòbákùbgbé kọ́ ló kàn bikòṣe pé kí a máa ṣe ádùrá fún wọn.
Ọgbọ́n ìṣèlú Shettima àti ipa rẹ̀ nínú ìdàgbàsókè àwọn ọ̀dọ́ àti àwọn àgbẹ̀ ló máa ń wúmi lórí.
BENJAMIN HUNDEYIN GBA ÀGBÉGA LẸ́NU IṢẸ́.
Alukoro fún ilé iṣẹ́ ọlọ́pàá ìpínlẹ̀ Èkó; Benjamin Hundeyin ti gba àgbéga lẹ́nu iṣé báyìí, ilé iṣẹ́ ọlọ́pàá ti yàn án ní alukoro àgbà fún ilé iṣẹ́ ọlọ́pàá, oyè rẹ̀ báyìí ni FPRO,
Àgbéga yìí wáyé lẹ́yìn tí ọ̀gá àgbà; Kayode Egbetokun pàṣẹ kí FPRO Olumuyiwa Adejobi ó máa lọ sí ìpínlẹ̀ Delta gẹ́gẹ́ bíi igbákejì kọ́míṣọ́nà ọlọ́pàá ìpínlẹ̀ náà.
Adejobi ṣe àpèjúwe Benjamin Hundeyin gẹ́gẹ́ bíi ẹni tó yẹ ní ipò náà, ó ní ẹ̀kọ́ tó yè koro ó sì tún ní ìrírí.
LILIAN GÚN OLÓLÙFẸ́ RẸ̀ PA NÍ ÌPÍNLẸ̀ DELTA.
Lilian; ẹni ọdún mọ́kànlélógún tó sì jẹ́ ìyá àwọn ọmọ méjì ti gún ọkọ rẹ̀ pa nígbà tí wọ́n ń jà.
Òpópónà ijanpa ni Lilian ń gbé pẹ̀lú ọkọ àti àwọn ọmọ rẹ̀, ọdún kẹrin rèé tó ti wà nílé ọkọ rẹ̀. Ọmọ méjì ni ó bí fún un.
Àlàyé tí alukoro fún ilé iṣẹ́ ọlọ́pàá ìpínlẹ̀ Delta; Bright Edafe ṣe nípa ìṣẹ̀lẹ̀ náà ni pé lọ́jọ́ náà, Lilian àti ọkọ rẹ̀ bẹ̀rẹ̀ ìjà, Lilian wí pé ọkọ òun ní òun kò fẹ́ òun mọ́ kí òun máa lọ tó sì tún fi ẹgba na òun, ìgbà náà ni òun wọ ilé ìdáná lọ mú ọ̀bẹ tí òun sì gún un pa.
Lilian ní òun fi ọ̀bẹ náà gbèjà ara òun nígbà tó ní kí òun máa lọ. Ó ní ọdún kẹrin rèé tí òun ti ń bá a gbé, ọkùnrin méjì ló bí fún un, àkọ́bí jẹ́ ọmọ ọdún mẹ́ta nígbà tí èkejì jẹ́ ọmọ ọdún méjì.
Lọ́jọ́ Ajé tí ọ̀rọ̀ náà ṣẹlẹ̀, Lilian wí pé ọkọ òun yan òun lódì, nígbà tó yá, ó ní kí òun ó máa lọ sí ilé àwọn òbí rẹ̀ òun pé òun kò fẹ́ ẹ mọ́, ọ̀rọ̀ náà di ìjà láàrin wọn, ó fi ẹgba na òun ó sì tún fọ́ orí òun mọ́ ògiri.
Ìbínú èyí ni òun fi lọ yọ ọ̀bẹ òun kò gbèrò láti pa á.
Ilé iṣẹ́ ọlọ́pàá rọ àwọn tọkọtaya láti máa ṣe pẹ̀lẹ́pẹ̀lẹ́.
HISBAH BA Ọ̀PỌ̀LỌPỌ̀ ÌGÒ ỌTÍ JẸ́ NÍ ÌPÍNLẸ̀ KANO.
Àwọn ọlọ́pàá Hisbah ti fọ́ ọ̀pọ̀ àwọn ìgò ọtí ní ìpínlẹ̀ Kano, wọ́n sì tún mú àwọn èèyàn tí wọ́n bá nílé ọtí náà.
Igbákejì ọ̀gá àgbà Hisbah; Mujahid Aminudeen gbé oríyìn fún àwọn ọlọ́pàá Hisbah náà fún akitiyan wọn láti gbógun ti ọtí mímu.
Ó wí pé òfin kò fi ààyè gba ọtí mímu àwọn yóò sì ríi pé ọtí di ohun ìtàn ní ìpínlẹ̀ náà.
