Afurasí àkọ́kọ́ jẹ́ ọmọ orílẹ̀-èdè Spain. Monzo ni orúkọ rẹ̀, ẹ̀sùn tí ìjọba London fi kàn án ni pé sẹkú pa Daniel tó jẹ́ ọmọ orílẹ̀-èdè Nàìjíríà àmọ́ tó ń gbé ní London.
Ìròyìn ìṣẹ̀lẹ̀ náà kà báyìí pé:
Marcus Monzo yóò lo ìṣẹ̀mí rẹ̀ yòókù lọ́gbà ẹ̀wọ̀n lórí ẹ̀sùn pé ó sẹkú pa ọmọ ọdún mẹ́rìnlá kan tó jẹ́ ọmọ ilẹ̀ Nàìjíríà.
A gbọ́ pé London ni Daniel Anjorin ti ń kàwé, ní ọgbọ̀njọ́, oṣù Igbe ọdún tó kọjá, Daniel wà lọ́nà ilé ìwé lójú pópó nígbà tí Monzo gbá a lẹ́ṣẹ̀ẹ́ lójijì, Daniel ṣubú lulẹ̀ Monzo sì dú u lọ́rùn pẹ̀lú abẹ.
Lẹ́yìn náà ni Monzo tún ṣe ìkọlù sí àwọn èèyàn méjì mìíràn àti àwọn ọlọ́pàá méjì kí wọ́n tó rí ì mú. Ogún iṣẹ́jú ni Monzo fi ṣe ìkọlù tó ṣe náà.
Ilé ẹjọ́ fìdí ẹ̀ múlẹ̀ pé àyẹ̀wò ẹ̀jẹ̀ Monzo fi hàn pé ó ti mu òògùn olóró lọ́jọ́ náà. Monzo náà wí pé òun kò rántí nńkankan nípa ìṣẹ̀lẹ̀ náà.
Ó wí pé òun máa ń wo àwọn eré adẹ́rùbani tí wọ́n ń pè ní horror ní èyí tí wọ́n ti máa ń pa àwọn èèyàn.
Adájọ́ wí pé Monzo kò ní àwíjare nítorí pé fúnra rẹ̀ ló mu òògùn olóró náà, ó pàṣẹ pé kí ó lọ lo gbogbo ìṣẹ̀mí rẹ̀ yòókù lọ́gbà ẹ̀wọ̀n.
Ẹni ọdún mẹ́tàdínlógójì ni Monzo báyìí.
Àwọn òbí Daniel náà wà nílé ẹjọ́ lásìkò ìgbẹ́jọ́ náà, wọ́n wo fọ́nrán bí Monzo ṣe pa Daniel.
Wọ́n dárò ọmọ wọn tó lọ, bẹ́ẹ̀ náà ni àwọn àbúrò Daniel bara jẹ́ nílé ẹjọ́.
Afurasí kejì jẹ́ ọmọ orílẹ̀-èdè Nàìjíríà, ibẹ̀ náà ló ti dá ọ̀ràn náà tí wọ́n sì ti dájọ́ rẹ̀. Timileyin Ajayi ni orúkọ rẹ̀, a gbọ́ pé:
Ilé ẹjọ́ gíga tó fìkàlẹ̀ sí Lafia tíí ṣe olú ìlú ìpínlẹ̀ Nasarawa ti dájọ́ ikú fún Timileyin Ajayi lórí ẹ̀sùn ìpànìyàn.
Timileyin Ajayi ni afurasí tó ṣekú pa Salome Adaidu.
Ẹni ọdún mẹ́rínlélógún Àgùnbánirọ̀ ni Salome, Oórin ẹ̀mí ni Timileyin, àwọn méjèèjì ń ṣe wọléwọ̀de ni kí ó tó di pé Timileyin sẹkú pa á.
Ìròyìn Timileyin Ajayi náà kàn kálé káko nígbà tí ó ṣẹlẹ̀. A mú ìròyìn bí ó ṣe ṣẹlẹ̀ àti bí ó ṣe ń lọ wá fún yín nígbà náà pé:
Timileyin Ajayi fojú ba ilé-ẹjọ́ giga Lafia, àwọn ẹlẹrìí mẹ́ta ni awon agbẹjọ́rò olùpẹjọ́ kó wá láti tako òun nìkan.
Ohun tí àwọn mẹ́tẹ́ẹ̀ta náà wí ni pé ilé Àjàyí ni wọ́n ti bá òkú Salome. Ajayi ti kọ́kọ́ fojú ba ilé-ẹjọ́ ní oṣù Ṣẹẹrẹ àmọ́ ó wí pé òun kò jẹ̀bi ni wọ́n fi sún ìgbẹ́jọ́ náà síwájú.
Nílé ẹjọ́ lónìí ni àwọn olùpẹjọ́ ti béèrè fún pé kí ilé ẹjọ́ ó yí orúkọ rẹ̀ padà kúrò ní Timileyin Ajayi sí Oluwatimileyin Daniels Ajayi.
Lẹ́yìn gbogbo atótónu Adájọ́ Simon Aboki sún ìgbẹ́jọ́ di ogúnjọ́ oṣù yìí.
Agbẹjọ́rò Ajayi wí pé ìrètí ṣì ń bẹ nítorí pé ẹjọ́ ṣẹ̀ṣẹ̀ bẹ̀rẹ̀ ni.
Bí ẹ bá ń fọkàn bá wa lọ, a mú ìròyìn wá fún yín nígbà náà pé ọwọ́ tẹ afurasí olórin ẹ̀mí tó sẹkú pa Salome, a kọ ọ́ báyìí pé ‘Akọrin ẹ̀mí ni Timilehin Ajayi, orí àfẹ́sọ́na rẹ̀; Salome Enejo ni wọ́n bá lọ́wọ́ rẹ̀ tí wọ́n sì bá àwọn ẹ̀ya ara yòókù tó ti gé lékìrìlékìrì sínú àpò nílé rẹ̀.
Ọjọ́ Àìkú ni ọjọ́ yìí, Timilehin gbé orí Salome sínú àpò, ìsìń ṣì ń lọ lọ́wọ́, olùjọ́sìn kan ló fura sí Timilehin pé ìrìn rẹ̀ mú ìfura dání bó ṣe ń lọ sí etídò kan tí kò jìnnà sílé ìjọsìn.
Ẹni yìí pe àwọn èèyàn mọ́ra, wọ́n sì tọ ipasẹ̀ rẹ̀, bí Timilehin ṣe rí wọn ló sọ àpò náà sódò. Wọ́n mú un pé kó yọ àpò náà kó sì tú u, ó feré gée àmọ́ wọ́n lé e mú, títú tí yóò tú àpo yìí, orí àfẹ́sọ́nà rẹ̀; Salome ni wọ́n bá nínú rẹ̀.
Ìdájọ́ ọwọ́ ni wọ́n fẹ́ ṣe fún un àmọ́ àwọn ọlọ́pàá gbà á kalẹ̀, lẹ́yìn náà ni wọ́n lọ tú ilé rẹ̀ tí wọ́n sì bá àwọn ẹ̀yà ara Salome nínú àpò méji.
Àwọn ẹbí Salome ṣe ìdámọ̀ ọmọ wọn, ọmọ ọdún mẹ́rìnlélógún ni Salome, àgùnbánirọ̀ sì ni pẹ̀lú.
Olùkọ́ni Bibeli ilé ìjọsìn náà; Caleb Umaru ṣe àlàyé fún àwọn ọlọ́pàá pé ọmọ ìjọ kan ló fura sí Timilehin nígbà tí ara rẹ̀ kò balẹ̀, ó ṣọ́ ọ títí tó fi dé etídò náà kí wọn ó tó wá mú un’
Lẹ́yìn ìgbà náà ni àwọn akọ̀ròyìn bá Timileyin Ajayi sọ̀rọ̀ pé báwo ni ó ṣe rí lára rẹ̀? Ẹ ka ohun tó wí ‘Timileyin Ajayi; akọrin ẹ̀mí tí ọwọ́ tẹ̀ nígbà tó pa Salome wí pé òun kò kábàámọ̀ pé òun pa ọmọbìnrin náà rárá, òun pa á òun pa á náà ni kò sí bàbàrà kankan níbẹ̀, Timilehin ní kí ẹ yé pọ́n jẹ̀bẹ̀ lákìísà.
Àwọn akọ̀ròyìn bá Timileyin sọ̀rọ̀ pé báwo ni ó ṣe rí lára rẹ̀ nígbà tí wọ́n mú un fún ìpànìyàn àti pé báwo ni ó ṣe rí lára rẹ̀ pé ó pààyàn?
Timilehin kó àlàyé ṣe, ó kó ẹjọ́ rò pé kò sí nǹkan bàbàrà nínú pé òun pa Salome o, ó ti lé lọ́dún kan tí òun ti ń fẹ́ Salome, Timilehin ní òun fura síi pé ó ń fẹ́ àwọn ọkùnrin mìíràn ni òun ṣe pa á.
Ohun tí tí àwọn ẹbí Salome wí ni pé Timilehin jí Salome gbé ni pé àwọn kò ríi mọ́ ọmọ àwọn rí. Wọ́n ní ó pa á nípakúpa fún ìdí tí ó yé òun nìkan. Àbúrò bàbá Salome wí pé ìgé tó gé ẹran ọmọ náà lékìrìlékìrì fi hàn pé ó fẹ́ sè é jẹ tàbí tà á fún àwọn tí yóò jẹ ẹ́ ni. Wọ́n ní ìdájọ́ òdodo ni awon ń retí láti ọ̀dọ ìjọba.
Ilé iṣẹ́ ọlọ́pàá wí pé Timilehin yóò fojú ba ilé-ẹjọ́ láìpẹ́, bó bá sì fi le jẹ̀bi, yóò jìyà lábẹ́ òfin’
Ní báyìí, ilé ẹjọ́ ti pàṣẹ kí wọn ó yẹgi fún Timileyin lórí ẹ̀sùn ìpànìyàn.
