ỌMỌ ỌLỌ́PÀÁ YÌNBỌN PA BÀBÁ RẸ̀ NÍ ÌPÍNLẸ̀ ANAMBRA.

Ọmọdékùnrin kan tí ọjọ́ orí rẹ̀ kò ju ọdún mẹ́wàá lọ ti yìnbọn pa bàbá rẹ̀ tó jẹ́ rìpẹ́tọ̀ ọlọ́pàá.
Ìpínlẹ̀ Anambra ni èyí ti ṣẹlẹ̀, ìròyìn tó tẹ̀ wá lọ́wọ́ ni pé ọmọ náà ń fi ìbọn bàbá rẹ̀ ṣeré ni ìbọn náà bá yìn mọ́ ọn lọ́wọ́, ó ba bàbá rẹ̀ lẹ́yìn ó sì tún ba àbúrò ọmọ yìí ní ọrùn ọwọ́.
Okolie Amechi ni orúkọ ọlọ́pàá yìí, nígbà tí wọn yóò fi gbé e dé ilé ìwòsàn, ó ti dágbére fáyé àmọ́ ọmọ kejì ṣì ń gba ìtọ́jú nílé ìwòsàn.
Ọ̀rọ̀ yìí jẹ́ mímọ̀ láti ẹnu alukoro fún ilé iṣẹ́ ọlọ́pàá ìpínlẹ̀ Anambra; Tochukwu Ikenga. Ó ṣe àlàyé pé ilé iṣẹ́ ọlọ́pàá ìpínlẹ̀ Anambra àti Nàìjíríà lápapọ̀ ń ṣe ìdárò ẹni ire tó lọ, ìyẹn Rìpẹ́tọ̀ Okolie Amechi tí ọmọ rẹ̀ ṣèèṣì yìnbọn pa nínú ilé rẹ̀.
Wọ́n ti gbé òkú rẹ̀ lọ sí ilé ìgbókùúsí wọ́n sì ti gba ìbọn náà pamọ́ fún àyẹ̀wò.

NÍ IPÍNLẸ̀ OGUN.

Láti ọdún 2024 ni Clement Elijah ti ń yọ́ bọ́rọ́ mọ́ àwọn ọlọ́pàá lọ́wọ́ àmọ́ ọwọ́ pálábá rẹ̀ ségi níbi tó tún ti ń gbìyànjú àti jí èèyàn kan gbé ní abúlé Ago tó wà ní Abigi, ìpínlẹ̀ Ogun.
Ilé iṣẹ́ ọlọ́pàá wí pé àwọn ti ń wá Clement tipẹ́ lórí àwọn ìṣẹ̀lẹ̀ ìjínigbé tó wáyé ní abúlé Ajelanwa tó sì jẹ́ pé òun ni afurasí jùlọ. Ẹnìkan ló fún àwọn ọlọ́pàá lọ́wọ́ pé Clement ń múra àti wá jí àwọn èèyàn gbé bíi ìṣe rẹ̀ ní abúlé Ago, èyí ni àwọn ọlọ́pàá fi dọdẹ rẹ̀ tí wọ́n sì mú un síkún.
Àwọn méjì tí wọ́n jọ ń ṣiṣẹ́ náà ti wà ní gbaga àwọn ọlọ́pàá báyìí.

ÀṢÌTA ÌBỌN ṢEKÚ PA ỌMỌ ỌDÚN MẸ́TÀDÍNLÓGÚN NÍ ÌPÍNLẸ̀ ANAMBRA.

Ọ̀dọ́mọkùnrin kan ẹni ọdún mẹ́tàdínlógún ti gba èkuru jẹ lọ́wọ́ ẹbọra lẹ́yìn tí ìbọn bà á.
Òpópọnà Ifejike ní Gúùsù Onitsha ni èyí ti ṣẹlẹ̀. A gbọ́ pé ọmọkùnrin náà jókòó sí iwájú ilé àwọn òbí rẹ̀ nígbà tí àwọn ikọ̀ ẹ̀ṣọ́ aláàbò Agunechemba ń lé afurasí ọ̀daràn kan lọ, ọ̀kan nínú wọn yin ìbọn sókè àmọ́ ọmọ náà ló bà tó sì pa á lẹ́sẹ̀kẹsẹ̀.
Àwọn tí ìṣẹ̀lẹ̀ náà ṣojú wọn ṣe àlàyé pé àwọn ẹ̀ṣọ́ aláàbò náà fẹ́ sá lọ àmọ́ àwọn èrò àti àwọn ọlọ́jà ló dá wọn dúró tí wọ́n sì ní kí wọn ó gbé òkú ọmọ náà dandan. Wọ́n ní èyí kìí ṣe ìgbà àkọ́kọ́ tí wọn ó yin ìbọn pa aráàlú.
Ilé iṣẹ́ ọlọ́pàá wí pé àwọn ti mú àwọn afurasí méjì sí àhámọ́ báyìí.

Ìròyìn òkèrè:

ỌWỌ́ ÀWỌN ỌLỌ́PÀÁ AUSTRALIA TẸ ỌMỌ NÀÌJÍRÍÀ TÓ Ń FI ÀWỌN AKẸ́KỌ̀Ọ́ ṢÒWÒ.
Àwọn ọlọ́pàá orílẹ̀-ède Australia ti mú arábìnrin kan tó jẹ́ ọmọ bíbí orílẹ̀-ède Nàìjíríà tí orúkọ rẹ̀ ń jẹ́ Binta Abubakar lórí ẹ̀sùn pé ó ń fi àwọn ọmọ ṣòwò lábẹ́ ètò ẹ̀kọ́ ọ̀fẹ́ tó gbé kalẹ̀.
Ẹni ọdún mẹ́rìndínlọ́gọ́ta ni Binta, òun ni aláṣẹ ilé iṣẹ́ ètò ẹ̀kọ́ kan nílùú Australia tí orúkọ rẹ̀ ń jẹ́ BIN Educational Services and Consulting.
Ètò ìwé òfẹ́ ní orílẹ̀-ède Australia ni ilé iṣẹ́ yìí sọ pé òun ń gbé kalẹ̀ àmọ́ níṣe ni wọ́n ń fi àwọn akẹ́kọ̀ọ́ tó bá kó sí wọn lọ́wọ́ ṣiṣẹ́ oko tí Binta sì ń gba owó ọ̀yà wọn sápò.
Ó ti lé ní ọdún méjì tí ìjọba orílẹ̀-ède Australia ti ń tọpinpin Binta kí wọ́n tó wá he é bí ìgbín lánàá; Ọjọ́rú, ọjọ́ kejìlá, oṣù Okúdù ní pápákọ̀ òfurufú Brisbane.
Ẹ̀sùn tí ìjọba Australia fi kan Binta ni pé ó ń fi ètò ẹ̀kọ́ òfẹ́ tan àwọn akẹ́kọ̀ọ́ láti orílẹ̀-ède Guinea níbi tó tẹ̀dó sí wá sí orílẹ̀-ède Australia, lọ́gán tí àwọn ọmọ náà bá balẹ̀ sí Australia ni yóò kó wọn lọ sí Queensland níbi tí wọn yóò ti fipá tọwọ́ bọ àwọn ìwé àdéhùn pé àwọn jẹ Binta ní owó ìrìnnà wá sí Australia àwọn sì ṣetán àti ṣiṣẹ́ sìn ín.
Lẹ́yìn náà ni yóò kó wọn lọ sí oko èso níbi tí wọn yóò ti máa ṣiṣẹ́ fún wákàtí mẹ́wàá lójúmọ́. Èyíkéyìí nínú àwọn ọmọ náà tó bá kọ̀ láti ṣiṣẹ́, Binta yóò halẹ̀ mọ́ ọn pé òun yóò fi ẹjọ́ rẹ̀ sun àwọn ọlọ́pàá tàbí kí ó dúnkokò mọ́ àwọn ẹbí rẹ̀ nílé.
Ìjọba Australia wí pé ó ti lé ní àwọn ọmọ mẹ́ẹ̀dógún tó ti kó sí ọwọ́ Binta láàrín oṣù Agẹmọ ọdún 2024 sí àsìkò yìí.
Bákan náà ni wọ́n sọ pé ilé iṣẹ́ tó ni àwọn oko náà

Bákan náà ni wọ́n sọ pé ilé iṣẹ́ tó ni àwọn oko náà kò mọ̀ sí ohun tí Binta ń fi àwọn ọmọ náà ṣe yìí, òun kàn ń san owó ọ̀yà wọn fún ọ̀gá wọn ni.
Èsùn oníkókó mọ́kànlélọ́gbọ̀n ni ìjọba Australia fi kan Binta wọ́n sì ti gba onídùúró Binta báyìí yóò sì fi ojú ba ilé ẹjọ́ ní ọjọ́ kọkàndínlógún, oṣù Òwẹ̀wẹ̀, ọdún yìí

ÈRE LABUBU GBÒDE KAN LÁTI ORÍLẸ̀-ÈDE CHINA.

Ère Labubu ni ohun oge àsìkò yìí tí àwọn ọmọge ń so mọ́ àpamọ́wọ́ wọn. Láti orílẹ̀-ède China ni wọ́n ti ṣe ère yìí wà ó sì ti kárí ayé.
Kasing Lung tó jẹ́ ọmọ orílẹ̀-ède Hong Kong ni ó ya àwòrán ère yìí àmọ́ ilé iṣẹ́ ńlá kan ní orílẹ̀-ède China ló ṣe àgbéjáde rẹ̀.
Ère Labubu yìí ní ìkọ́ lórí tí èèyàn le fi kọ́ àpámọ́wọ́ tàbí ohun ìní, òun ni ohun oge ṣíṣe àsìkò yìí.
Àwọn ìlúmọ̀ọ́nká láti àwọn orílẹ̀-ède UK, Italy, Spain, UAE, Canada àti Korea ni wọ́n gbé ère labubu yìí lárugẹ tó fi di ohun tí àwọn ọmọ Nàìjíríà náà gbà láti fi ṣoge.
Owo iyebiye ni ère yìí jẹ́ ní ẹ̀ṣẹ́wó Nàìjíríà. Nígbà tí àwọn kan ra ojúlówó rẹ̀, àwọn kan ní àwọn kò ní irú owó bẹ́ẹ̀ lọ́wọ́ wọ́n sì fi ọmọlangidi rọ́pò rẹ̀.

ÈÈYAN MỌ́KÀNLÉLÁÀDỌ́TA DÈRÒ Ọ̀RUN NÍGBÀ TÍ ISRAELI SỌ ÀDÓ OLÓRÓ SÍ GÚÚSÙ GAZA.

Kò dín ní èèyàn mọ́kànléláàdọ́ta tó rọ̀run àpàpàndodo nígbà tí àdó olóró Israeli balẹ̀ sí àárín àwọn èrò ní Gúsù Gaza. Igba èèyàn ló farapa pẹ̀lú àwọn ogún mìíràn lẹ́sẹ̀kan ayé ẹsẹ̀ kan ọ̀run.
Ilé ìwòsàn Nasser ni wọ́n kó àwọn èèyàn lọ, ipò tí ilé ìwòsàn náà wà báyìí kò sunwọ̀n lásìkò yìí, gbogbo ìbùsùn ti kún fọ́fọ́, wọ́n tẹ́ àwọn kan sí ilẹ̀ àti ojú ọ̀nà lọ ni.
Èyí ni ọ̀tun ìkọlù tí Israeli ṣe sí Gaza nínú ogun tó ń lọ lọ́wọ́ láàárín wọn.

ÌJỌBA ISRAELI LÉRÍ IKÚ SÍ OLÓRÍ IRAN.

Olórí ogun ilẹ̀ Israeli ti lérí ikú sí olórí ilẹ̀ Iran; Ayatollah Al-Khamenei lórí ẹ̀sùn pé ó ń rán àwọn ẹmẹ̀wàá rẹ̀ lọ ṣe ìkọlù sí Israeli.
Ilé iṣẹ́ Al Jazeera ló fi ìròyìn náà síta pé Iran ṣe ìkọlù sí ilé ìwòsàn Soroka ní èyí tó lòdì sí òfin ogun jíjà.
Wọ́n wí pé ẹni tó ṣetán àti jẹ ìlú àwọn run ò yẹ kó máa gbáyé, ó ti máa ń sọ tipẹ́ pé òun yóò jẹ Israeli run ó sì ti ń mú ìlérí rẹ̀ ṣẹ báyìí, fún ìdí èyí, ìjọba Israeli ní àwọn ṣetán àtipa Ayatollah.

Facebook Comments Box

Tags: #iweiroyinyoruba #newsfeed #newsupdates Ìròyìn Tó Gbòde newsinyoruba newsupdate trending

ỌMỌ ỌLỌ́PÀÁ YÌNBỌN PA BÀBÁ RẸ̀ NÍ ÌPÍNLẸ̀ ANAMBRA.

Àti àwọn ìròyìn mìíràn tó gbòde.

Adeola Olanrewaju

ILÉ ẸJỌ́ DÁJỌ́ ṢE ÌDÁJỌ́ ÀWỌN AFURASÍ MÉJÌ.

Recommended

GÓMÌNÀ ÌPÍNLẸ̀ GOMBE ṢE ÌLÉRÍ MÍLÍỌ̀NÙ MÉJÌ NÁÍRÀ FÚN Ọ̀KỌ̀Ọ̀KAN ÀWỌN ẸBÍ ÀWỌN TÍ ỌKỌ̀ TẸ̀ PA LỌ́JỌ́ ỌDÚN ÀJÍNDE.

Àwọn akẹ́kọ̀ọ́ ilé ìwé gíga Adekunle Ajaasin fipá bá akẹgbẹ́ wọn lò pọ̀.

Popular News

Ọwọ́ tẹ ikọ̀ one-chance ní kebbi.

OLÓLÙFẸ́ DA ÁSÍÌDÌ SÍ ỌMỌṢẸ́ Ọ̀RẸ́BÌNRIN RẸ̀ LÁRA.

ILÉ ẸJỌ́ PÀṢẸ KÍ GBOGBO DÚKÌÁ SYLVA Ó DI TI ÌJỌBA.

AYÉ LÓ ṢE ỌLỌ́PÀÁ TÓ YÌNBỌN PA ÈÈYÀN.

ÀWỌN ỌLỌ́PÀÁ ṢE ÀWÁRÍ AYÉDÈRÚ ILÉ ỌMỌ ALÁÌNÍYÀÁ.

Connect with us

Newsletter

Category

Site Links

About Us

Welcome Back!

Create New Account!

Retrieve your password

ỌMỌ ỌLỌ́PÀÁ YÌNBỌN PA BÀBÁ RẸ̀ NÍ ÌPÍNLẸ̀ ANAMBRA.

Àti àwọn ìròyìn mìíràn tó gbòde.

Related

Recommended

Popular News

Newsletter

Category

Site Links

About Us

Welcome Back!

Create New Account!

Retrieve your password